Utom Mme Abọsịd 7
7
Ikọ a-Stifịn Aketañña Anọ Esob Sanhidrin
1Ndin ekamba aku amaabịp Stifịn abo, “Se etañ ami udian fiin ado akpanikọ?”
2Anye amaabọọrọ: “Nditọeka ye mme ete, ikpañ utọñ innọ miin! Ubọọñ Abasi amaayaara anọ ete ñnyịn Ebraham, ke ini anye akesʌkkọ aba ke Mesopotemia, mbemiso anye akedʌñ ke Haran. 3Abasi amaabo anye ate, ‘Kpọñ idʌñ mfo ye mbon mfo, nyʌñ kaa ke isọñ a-nduuwọt fiin.’
4“Ndin anye amaakpọñ isọñ mbon Kaldi akaa akedʌñ ke Haran. Ke ete amọ amaakekpa, Abasi amaanọ anye akaa abio a-ndufo edʌññọ mfịn ami. 5Abasi ikinọọhọ anye udeeme amọ mi, ukpọk etək itie isọñ se anye awuuk ñkpad. Ado Abasi amaanwọñọ abo ke anye ye ubon amọ eyaedat isọñ ado enie, akpesʌkado Ebraham imiikinieghe ayịn idahado. 6Ntom ke Abasi aketañ ikọ anọ anye abo: ‘Ke isua ikie inaañ, mme ubon mfo ediido isenawo ke idʌñ i-imiidooho ake ammọ, ñko eyaesịn ammọ ufʌn, enyʌñ etʌkkọ ammọ. 7Abasi abo: Ado ami ñyaamia idịd a-ammọ enamma ñkpọ enọ nte ifʌn ufen;’ ndin ke ado amaaboiyo, ammọ eyaewuọñọ ke idịd ado enyʌñ ediñkpono miin ke itie ami. 8Ndin anye amaanọ Ebraham edioomo ufọọrọ edʌd. Akema Ebraham amaabon Aisik, anyʌñ afọọrọ anye edʌd ke ayọhọ usen itiaita. Aisik amaanyʌñ abon Yekọb, Yekọb anyʌñ adikappa ado ete anọ mme nsọbom ñnyịn duob mme iba.
9“Sia mme nsọbom ami ekefịbeke Yosef ufịb, ammọ emaenyam anye nte afʌn enọ Iyib. Ado Abasi amaaba ye anye, 10anyʌñ anyaaña anye asio ke afịd mfịna amọ. Abasi amaanọ Yosef ifiọk anyʌñ anam anye akịt mfọn ke iso Fero, adidem Iyib. Ndin Fero amaanam anye ado andikara Iyib ye afịd ufọk amọ.
11“Akem akañ amaadidʌk afịd isọñ Iyib ye Kenan, adat ekamba ukuud adi, ndin mme eteete ñnyịn ikinieghe ndidia se edia. 12Yekọb akekop ke abakpa amaaba ke Iyib, anye amaasio mme eteete ñnyịn adọñ akpa ini. 13Ke etịmmeke eka, Yosef amaakeyaara idem amọ anọ nditọete amọ, ndin Fero amaadidiọọñọ ñkpọ abaña ubon Yosef. 14Ke ami aboiyoke, Yosef amaadọñ ate ekeben ete amọ, Yekọb, ye afịd ufọk amọ e-ekedooho awo ata mme duob mme ition edi. 15Ndin Yekọb amaaben isañ akaa Iyib. Do ke anye ye mme eteete ñnyịn ekekekpañña. 16Emaekoono akpo ammọ etịmme edi Sekem edibuuk ke udi e-Ebraham akedeppe ato nditọ Hamọ ke ekọmudua.
17“Ke ini a-Abasi akenwọñọke anọ Ebraham akedikpereke, ibad nditọ ñnyịn ke Iyib emaetọt eti-eti. 18Akem ufa adidem, a-Yosef imiikidooho ñkpọ ndomokeed inọ anye, amaadida ukara ke Iyib. 19Anye akedu uwem ñkara-ñkara ye ikọd ñnyịn anyʌñ atʌkkọ mme eteete ñnyịn, anam ammọ etoomo mme ufa nsek nditọ e-ekemanake eduọọñọ nọ ekekpañña.
20“Ke ini ado ke Moses akemana, ado anye ikidooho ñkaña ayịn, akedo asaña-asaña ayịn ke iso Abasi. Ete ye eka amọ ekebọọk anye ke ufọk ammọ ke ñkpọ nte afiọñ ita. 21Ke emaekesio anye enịm ke anwaesiin, adiaha Fero amaaben anye abọọk, akama anye nte ayịn amọ. 22Moses amaabọ ukpeebñkpọ ke afịd usʌñ ifiọk nditọ Iyib, anyʌñ akappa ado akpọsọñ awo ke ikọ inua ye ke edu unam ñkpọ.
23“Ke ini Moses amaakeyọhọ isua aba ke emana, anye amaabiide ke esịd amọ adika ñkese nditọete amọ, nditọ Isrel. 24Anye akekịt naña ayịn Iyib keed afʌnnọ ayịn ammọ keed, anye amaakaa adinyaaña anye, ndin amaawot ayịn Iyib ke usiene anọ awo ammọ e-ekefʌnnọke. 25Moses akekere ke mbon amọ eyaediọọñọ ke Abasi akikama imọ anyaaña ammọ, ado ammọ ikidiọọñọke ntoro. 26Edem usen, Moses amaakịt nditọ Isrel iba naña enwana anwan. Anye amaanwana adisịn emem nnọọ ammọ ke adibo: ‘Ukañ ñnyịn, ndufo edo nditọeka; ntak a-ndufo eyemme inam emọ-emọ ibak-a?’
27“Ado awodeen andikinam ntịme ye awodeen anye ako amaanək Moses asio, abo anye, ‘Anie awo ikumek fiin andikara ye abiideikpe inọọ ñnyịn? 28Ayem adiñwot miin naña akewot awo Iyib ñkpọñ a-akeboiyoke?’ 29Moses akekop ami, anye amaafeghe akedʌñ ke abio Midian nte asenawo anyʌñ abon nditọ ideen iba do.
30“Ke isua aba amaakeboiyo, enyere Abasi amaayaara idem awọt Moses ke edemeikañ a-aketaaha ikọd ke akpautatan a-akekpereke Abod Sainai. 31Moses akekịt ami, idem amaakpa anye. Ndin anye akesaña akpere adikinekke nse utọ utịppe ñkpọ ami, anye amaakop uyio Abọọñ naña abo: 32‘Ami ndo Abasi mme eteete mfo, Abasi Ebraham, Aisik ye Yekọb.’ Idem amaanyeñ Moses, ndịk amaamʌm anye, anye ikideeghede idomo adise aba.
33“Akem Abọọñ amaabo anye ate, ‘Sịññe ikpaukod mfo ke ukod, sia itie a-afo adaaha do ado adisana isọñ. 34Ke akpanikọ, ami mmekịt naña efʌnnọ ikọd mmi ke Iyib. Mmekop ñkuun ammọ, anam mmedi adisio ammọ ke ukuud. Di idahami, ami ñyaudọñ fiin atịmme akaa Iyib.’
35“Kpasʌk Moses a-ammọ ekesịnne do ado ami, e-ekebooho, ‘Anie awo ikumek fiin andikara ye abiideikpe?’ Kpa Moses ado ke Abasi akedọñ enyere a-akewọttọ anye idem ke ikọd ado ate anye akedo andikara ye andinyaaña nditọ Isrel. 36Anye amaadat ammọ awuọ ke isọñ Iyib anyʌñ anañña mme utịppeñkpọ ye utom idiọọñọ ke Iyib, ke Ndad-ndad Akpainyañ ye anaan ke isua aba.
37“Anye asʌk ado kpa Moses ado a-akebooho nditọ Isrel, ‘Abasi ayaasio prọfed a-abaaha nte ami ke atu ndufo inọ ndufo.’ 38Anye akeba ke mbono ke anaan ye enyere a-akenemeke nneme ye anye ke Abod Sainai, ye mme eteete ñnyịn, anyʌñ abọ aduuwem ikọ isọk ñnyịn.
39“Ado mme eteete ñnyịn ikikoppo uyio amọ. Utu ke do, ammọ emaesịn anye, ndin ke esịd ammọ, emaetịmme ekaa Iyib. 40Ammọ emaebo Erọn, ‘Bot mme abasi mfen e-ediidat ñnyịn usʌñ. Amaado awo ami, Moses, a-akidatta ñnyịn usʌñ awuọ ke isọñ Iyib, ñnyịn idiọọñọke se itịppe inọ anye!’ 41Ini ado ke ammọ ekenam ubobodñkpọ ke mbid abaakenañ. Ammọ emaewa uwa enọ anye, enyʌñ enam usọrọ adidat ñkpono se ubọk ammọ akebot. 42Ado Abọọñ amaawọññọ iso akpọñ ammọ anyʌñ anam ammọ ekappa ekpono mme udịm anyọñ nte utịn, afiọñ ye mme ntantaafiọñ, nte Abasi ammọ. Ami asaña akekem ke se ewet ke ñwed mme prọfed ebo:
“ ‘Ubon Isrel, nte ndufo emaekoono uwa ye mme enọ ensọk miin,
ke isua aba a-ndufo ekebaaha ke anaan?
43Ndufo emedịppe atayad Mọlek
ye ntantaafiọñ abasi ndufo Refan,
ye mme ñkpọ a-ndufo ekebotto ebon ekpono.
Ndin ami ñyaibịne ndufo nsịññe ke abio tutu ndufo esuana ebọhọ Babilọn.’
44“Mme eteete ñnyịn emaenie atayad edioomo mbed enwọñọ ke ini ammọ ekebaaha ke anaan. Ekebọp anye naña Abasi aketemme Moses akeene mbid se anye akekịt. 45Atayad ami amaakaa iso aboiyo ke ubọk mme eteete ñnyịn tutu Yọsua akeben anye adʌk isọñ mme idịd a-Abasi akebịneke asiooño ke iso ammọ. Do ke atayad ado akeba tutu asịm ukara Defid, 46a-akekịtte mfọn Abasi anyʌñ abeeñe Abasi abo ayak nọ imọ ibọp itieidʌñ inọ Abasi Yekọb.#7:46 Usʌk mme ñkaan ikpañwed ewet ufọk Yekọb 47Ado Sọlọmọn akekappa abọp ufọk ado anọ Abasi.
48“Ado, Abasi Andikoñ Ñkan idʌññọ ke ufọk u-ubọk awo abọppọ. Nte prọfed abooho:
49“ ‘Hefịn ado ebekpo mmi,
isọñ anyʌñ ado udodukod mmi.
Nsoo utọ ufọk ke afo uduubọp unnọ miin?
Abọọñ abo.
Itie nduọkadudu mmi adiiba ke ñke?
50Idooho ubọk mmi akenañña afịd mme ñkpọ ami?’
51“Ndufo mbon nsọñiwuod! Esịd ye utọñ ndufo asʌk adodoro ufiọọn. Ndufo enyʌñ eba nte mme eteete ndufo: Esʌk ebọọbiọñọ Adisana Sịbidịd afịd ini! 52Akee prọfed ke mme eteete ndufo imiikikọbọke? Ado ammọ ekekap ewot mbon e-ekeyaarake adidi Adinen Ayịn Awo. Idahami, ndufo emetap anye enyʌñ ewot anye, 53ndufo e-ekebọọhọ mbed eto mme enyere, ekap edo mbon i-imiinamma se mbed abo enam.”
Etọọñ Stifịn ke Itiad
54Mbon esob Sanhidrin ekekop ami, ammọ emaekop akpọsọñ ifiobesịd enyʌñ ekwaaha ntak eded ese anye. 55Ado Stifịn, a-akeyọhọke ye Adisana Sịbidịd, amaawuuk anyen ase hefịn anyʌñ akịt ubọọñ Abasi, ye naña Yisọs ada ke ubọk nnasia Abasi. 56Anye amaabo ate, “Ami mmekịt naña hefịn abeere ye naña Ayịn Awo ada ke ubọk nnasia Abasi.”
57Ke ammọ ekekoppo ikọ ami, ammọ emaesiit ubọk ke utọñ, ebọñ ñkpo ke akpọsọñ uyio, afịd ammọ enyʌñ ebịmme ebịne anye emʌm, 58edʌt anye esio ke abio, enyʌñ eketọọñ anye ke itiad. Ndin mme ntiense emaebon afọñ ammọ ke iso akparawa keed a-akekereke Sọọl.
59Ke idaha a-ammọ ekesʌkkọ etọọñ anye ke itiad, Stifịn amaabọñ akam abo ate, “Abọọñ Yisọs, bọ sịbidịd mmi.” 60Ndin anye amaatọọñọ edọñ anyʌñ abọñ ke akpọsọñ uyio ate, “Abọọñ, kuudat idiọọkñkpọ ami udot ammọ ke iwuod.” Anye aketañ ami ama, amaakpa.
Currently Selected:
Utom Mme Abọsịd 7: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
