Utom Mme Abọsịd 25
25
Ikpe Pọọl ke Iso Festus
1Usen ita amaakeboiyo ke Festus akediwuọ ikpeghe ukara ado, anye amaato Siseria akaa Yeruselem, 2ndin mme ñkpoon aku ye mme etubom mme Yuu emaeben ikpe Pọọl ekenịm anye ke iso. 3Ammọ emaekpeiye Festus ebo inọ mmimọ mfọn, anọ Pọọl adi Yeruselem, sia ammọ emaebeeñe idem adidịbe ke usʌñ ñwot anye. 4Ado Festus amaabọọrọ, “E-emọmʌm Pọọl enịm ke Siseria, ñko ami ke idem mmi ñyaasọp ñkaa do. 5Yak ubaak mme adadusʌñ ndufo eñkeene miin eka, ndin adieke anye adueghe ñkpọ ndomokeed, ammọ ekeme adikoot anye ikpe ke udo.”
6Ke Festus amaakeba do ye ammọ ke ñkpọ nte usen itiaita me duob, anye amaakaa Siseria. Edem usen anye amaakoot esob anyʌñ anọ uyio ate eben Pọọl edi iso imọ. 7Ke Pọọl amaakediwuọ esob, mme Yuu e-eketooho Yeruselem edi emaeda ekanna anye ekʌk, enyʌñ etaañ uwak ndiọi ikọ edot anye, ado ammọ ikikanna iwọt ke ikọ se ammọ edot anye akedo akpanikọ.
8Akekem Pọọl amaadifaaña idem amọ abo ate: “Ami ndueghe ñkpọ mbaña mbed mme Yuu me ake tembịd me ake Sisa.”
9Ado Festus, a-akeduakka adiwọt mme Yuu ufọn amaabo Pọọl, “Nte afo amebeeñe idem adika Yeruselem ñkeda ikpe ke iso mmi ke abaña mme ikọ u-udotto fiin mi?”
10Pọọl amaabọọrọ, “Ami nda ke iso esob Sisa a-akpenaaha akpe ikpe mmi. Ami ndueghe mme Yuu ndomokeed, nte afo atʌmmọ adiọọñọ. 11Ado adieke ami ndueghe ñkpọ a-adotto ñkpa, ami nsịnne adikpa, ado akpedo uyio a-mme Yuu endotto idooho akpanikọ, awo ndomokeed inieghe unen adiñkappa miin nnọọ ammọ. Ami mmeben ikpe mmi ñketʌmọ Sisa!”
12Ke Festus amaakedioomo ye mbon esob amọ ama, anye amaabo, “Sia adooho afo amenọ ebeeñe mfo esọk Sisa, iso Sisa ke afo uduuka!”
Festus Abọ Item Ato Adidem Akrippa
13Usen ifañ akeboiyo, Adidem Akrippa ye Benis emaekewuọ Siseria adikikọọm Festus. 14Sia ammọ emaekeba ke Siseria uwak usen, Festus amaaben mfịna Pọọl aneme anọ adidem abo ate, “A-aba awo mi a-Feliks akekpọññọ ke ñkpakọb. 15Ke ini ami ñkekaaha Yeruselem, mme ikpọ aku ye mme ñkpisọñ mme Yuu emaeben anye edi esob enyʌñ ebo nọ ebiere ikpe ñkpa enọ anye.
16“Ami mmaadọkkọ ammọ ke mbed eduuwem Rom iyakka ebiom awo ikpe ke ini awo imiinọọhọ anye ufañ nọ akañ idem amọ ke iso mbon e-edotto anye ikọ. 17Ammọ emaekedi mi, ami ñkibiada ini, mmaakoot esob ke edem usen, mbo eben Pọọl edi. 18Ado mbon e-ekekoodo anye ikpe ekedakka eda aditañ ikọ, ammọ ikitañña ibaña idiọọk ñkpọ ndomokeed se ami ñkekere mbaña a-Pọọl anamma. 19Utu ke ado, utọk ammọ ye anye akebaña edu ukpono Abasi, ye awo e-ekoodo Yisọs, a-amaakekpa, a-Pọọl asʌkkọ abo ke mmọdo ke uwem. 20Sia ndiikikanna nduuñọ utọ ñkpọ ami, ami mmaabo me anye anyịmme adika Yeruselem nọ ekekpe ikpe amọ ke abaña mme ikọ e-etañña edot anye. 21Ado Pọọl amaabeeñe ate yak eben ikpe imọ esọk Sisa, ndin ami mmaanọ uyio nte emʌm anye enịm tutu ñkan nnọ anye esọk Sisa.”
22Festus aketañ ami ama, Adidem Akrippa amaabo anye, “Ami ke idem mmi ñkpaama adikop nto Pọọl.”
Ndin Festus amaabọọrọ anye ate, “Ayaakop ato anye ñkpọñ.”
Eben Pọọl Ekaa Iso Akrippa
23Edem usen, Akrippa ye Benis emaedi uko-uko, edidʌk ufọk esob, esaña ye mme ikpọ awuọiso mbon ekọñ ye mme awuọiso awo ke abio. Festus amaanọ uyio ate eben Pọọl edʌk edi. 24Ndin Festus amaabo: “Adidem Akrippa ye afịd awo se iba mfịn ami ye ñnyịn, ise awo ami! Afịd idịd mme Yuu e-enam ebeeñe ebaña anye ennọ ke Yeruselem ye mi ke Siseria, enyʌñ ebọñ ñkpo ete ke ikpinaaha anye aba ke uwem aba. 25Ado ami ke idem mmi mmeyʌkkọ ke anye inamma ñkpọ ndomokeed a-adotto ñkpa, ado sia anye ke idem amọ amaakebeeñe abo Sisa akpe ikpe imọ, mmaabiide adinọ anye aka Rom. 26Ado ami nnieghe ataa akpan ñkpọ adiwet nnọọ Adidem mbaña anye. Ke ntoro, ami mmeben anye ndi ke iso afịd ndufo, akpan-akpan iso mfo, Adidem Akrippa, nọ ato ke utịd nduuñọ ami, ami nnie ñkpọ se ñwet. 27Sia ami ñkere ke ufọn ibaaha adinọ awo ñkpakọb aka Rom ke ini awo miitʌmmọ itañ se ndiọiñkpọ anye anam.”
Currently Selected:
Utom Mme Abọsịd 25: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
