Utom 10
10
Kọnediọs adọñ ekood Bita
1Ete keed amaaba ke Siseria a-akekereke Kọnediọs. Anye akedo sentudiọn ke atu mme udịm ekọñ ake Itadi. 2Anye ye afịd ufọk amọ emaekpono enyʌñ ebaak Abasi; ñko anye amaasinọ mme awo enọ anyʌñ abọñ akam ke ini ke ini. 3Usen keed, ke ñkpọ nte ñkanika ita uweeme, anye amaakịt ñkukịd inwañ-inwañ nte enyere Abasi adi ufọk amọ adikood anye ke anyịñ, “Kọnediọs!”
4Anye amaatat anyen ase enyere anyʌñ akop ndịk, ndin abịp abo, “Ado die Abọọñ?”
Enyere amaabọọrọ ate, “Akam ye mme enọ mfo a-anọọghọ uweene edọọk esịm Abasi nte ñkpọ uwa aditoiyo. 5Dọñ mme awo eka ke Yopa idahami, ekeyem awo a-akereke Saimọn, a-anyịñ amọ mfen adooho Bita. 6Anye aba ye Saimọn, adeppeikpa, u-ufọk amọ abaaha ke mben inyañ.”
7Enyere Abasi a-aketañña ikọ anọ Kọnediọs amaakenyọñ, anye amaakood awo iba ke atu nditọufọk amọ ye awo ekọñ a-asikpemeke anye afịd ini, a-akesikponoke Abasi. 8Anye amaatañ afịd ñkpọ anọ ammọ, anyʌñ adọñ ammọ eka Yopa.
Ñkukịd Bita
9Edem usen, ke ñkpọ nte ñkanika duob mme iba uweeme, nte ammọ ekesañake ekpere abio Yopa, Bita amaadọọk anyọñ ufọk aka adibọñ akam. 10Mbiọñ amaadọñ anye, anye anyʌñ ayem se akpedia, ado idaha e-ekesʌkkọ enam ndidia ke ubọk, anye amaakịt ñkukịd. 11Anye amaakịt ikpaanyọñ nte abeere, ndin esuuk ñkpọ nte ekamba afọñ e-ekemʌmmọ ke inuuk amọ inaañ. 12Mme nsio-nsio afịd utọ unam: mme anie ukod inaañ-inaañ ke isọñ, mme ñkpọ se inyọnyọọn ñkọrọ mme inuen anyọñ emaedọọñọ do. 13Ndin uyo abo ate, “Dakka da Bita, wot nyʌñ ta.”
14Ado Bita amaabọọrọ ate, “Idooho ntodo, Abọọñ, sia kpaanam ami ndiaha ñkpọ a-ammiisanake me se ideghe.”
15Ndin uyo ado amaabo anye ayọhọ ñkañ iba, “Se Abasi amaakenam asana, ukemeke adibat ke ndek.”
16Emaenam ntom ñkañ ita mbemiso afọñ ado akemaana adọọk anyọñ.
17Nte Bita asʌkkọ akere abaña se ñkukịd ami awuọ, mme isʌñutom a-Kọnediọs akedọññọ emaekịt ufọk Saimọn enyʌñ esọñeda ke inuaatob. 18Ammọ emaekood enyʌñ ebịp me Saimọn a-akekereke Bita akeba do.
19Ado naña Bita asʌkkọ akere abaña ñkukịd ami, Sịbidịd Abasi amaabo anye ate, “Saimọn, ideen ita esʌk uyem. 20Dakka da, sọiyọ isọñ, kuunyʌñ uyịk adikeene ammọ ndomokeed, sia ami ndọñ ammọ.”
21Ndin Bita amaasọiyọ abịne mbon a-Kọnediọs akedọññọ, abo ate, “Ami ndo awo a-ndufo eyemme. Nso-o ido ntak edieghe?”
22Ammọ emaebo ete, “Kọnediọs, awo sentudiọn akidọñ ñnyịn. Anye ado adinen awo, afeghe Abasi, afịd mme Yuu enyʌñ ekpono anye. Anye akekịt adisana enyere a-akebooho yak anye adọñ nọ ukood fiin adi ufọk imọ nọ anye akop se afo anie aditañ.” 23Ndin anye amaakood ammọ asịn ke ufọk anọ ammọ itie nna nte isenawo amọ.
Bita ke ufọk Kọnediọs
Edem usen, Bita amaatọọñọ isañ ye ammọ, ndin usʌk mme andinịm ke akpanikọ e-etooho Yopa ekeene esaña. 24Edem usen ammọ emaewuọ Siseria. Kọnediọs a-amaakekokood mme uyakka ye mme akpan ufan amọ abok, akesʌk abet ammọ. 25Naña Bita akedʌkkọ adi, Kọnediọs amaasaña abịne anye, aduọ ke ukod amọ, atuak iwuod akpono anye. 26Ado Bita abenne anye abo, “Dakka da, ami ke idem mmi ñko ndo awo.”
27Idaha Bita aketañña ikọ ye Kọnediọs, anye amaadʌk ufọk anyʌñ akekịt uwak awo nte ebono itie keed. 28Anye amaabo ammọ, “Ndufo emenekke ediọọñọ ebo ke ibed akpan awo Yuu adiwana ewana me adika ufọk awo Yentaid. Ado Abasi amaaben añwọt abo ke ami mbo ke awo mfen ifọnnọ inyʌññọ isana. 29Ado anam nọ ami ndi, mfaañake ke mmaakekop ke asʌk añkood. Yak ubịp fiin ndin me nso-o ikido yak adọñ eñkood?”
30Kọnediọs amaabọọrọ abo ate, “Usen ita a-akeboiyoke ke ñkeba ke akam ye utreudia ke ufọk mmi ke awa ami ke ñkanika ita uweeme. Nte nse awo ada ke iso mmi ye nsem-nsem afọñ, 31anyʌñ ambo, ‘Kọnediọs, Abasi akop akam mfo anyʌñ atoiyo mme enọ a-afo anọọhọ mme uweene. 32Dọñ eka ke Yopa, ekekood Saimọn a-akereke Bita. Anye ado asenawo ke ufọk Saimọn adeppeikpa, a-adʌññọ ke mben inyañ.’ 33Kpa idaha-idaha ado, ami mmaadọñ nte edukood, ndin afọn nte afo akedieeghe. Idahami afịd ñnyịn iba ke iso Abasi adikop se Abọọñ akenọ uyo abo idọkkọ ñnyịn.”
34Ndin Bita amaatọọñọ aditañ ikọ, ate, “Ke akpanikọ mmekịt idahami mbo ke Abasi isattasat awo, 35ado anyịmme afịd awo ke afịd idịd e-eteeñeke anye anyen, enyʌñ enam se ifọn. 36Ndufo emediọọñọ etob a-Abasi akenọọhọ esọk nditọ Isred, a-akedooho eti etob emem ke Yisọs Krais a-adooho Abọọñ afịd awo. 37Ndufo emediọọñọ se ikitịppe ke afịd Yudia, tọọñọ ke Kadidi, ke Yọọn amaakekwọrọ uduọkmmọọñ amọ, 38naña Abasi akeyet Yisọs Ayịn Nasared adan ye Adisana Sịbidịd ye adudu, ye naña anye akesaña anañña nti ñkpọ anyʌñ akọk afịd mbon udọñọ mme awo e-ekebaaha ke ukad andidiọọk, sia Abasi amaaba ye anye.
39“Ñnyịn ido mme ntiense ke afịd ñkpọ a-anye akenamma ke isọñ mme Yuu ye ke Yerusedem. Ammọ emaewot anye ke adikọñ anye ke eto krọs. 40Anye ke Abasi akenam aset ke ñkpa ke ayọhọ usen ita, anyʌñ anam ekịt anye anwa-anwa. 41Idooho afịd awo ekekịt anye, ado mme ntiense a-Abasi akemekke, ye ñnyịn i-ikidiaagha inyʌñ inwọñ ye anye ke anye amaakeset ke ñkpa ikikịt anye. 42Anye amainọ iwuuk abo yak ikwọrọ iko inọ mme awo inyʌñ itañ ikọ ntiense ibo ke imọ ido awo a-Abasi akemekke nte abiireikpe anọ mme adu uwem ye mme akpañkpa. 43Ado anye ke afịd mme brọfed edo ntiense enọ, ebo ke anyịñ amọ eyaefeen ukwañ ñkpọ afịd awo e-enịmme anye ke akpanikọ.”
44Nte Bita asʌkkọ atatañ ikọ ami, Adisana Sịbidịd amaadidoro afịd mbon e-ekesʌkkọ ekop etob ami. 45Mbon e-emaekena mboppo, e-enịmme ke akpanikọ, e-ekesañake ye Bita edi, emaeba ke mkpaidem naña mme Yentaid ñko ekebọ enọ Adisana Sịbidịd. 46Sia ammọ emaekop naña mme Yentaid ami esem nsio-nsio usem, enyʌñ etooro Abasi.
Ndin Bita amaabo ate, 47“Ke akpanikọ awo ndomokeed ikemeke ibiọọñọ ibon ami adibọ uduọkmmọọñ, ke ini ammọ emaekebọ Adisana Sịbidịd nte ñnyịn ñko.” 48Anye amaanọ uyo ate enịm ammọ uduọkmmọọñ ke anyịñ Yisọs Krais. Ndin ammọ emaebo Bita atie ye mmimọ ke ñkpọ nte usen ifañ.
Currently Selected:
Utom 10: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
