Udiana Ñwed Kọrint 9
9
Enọ e-Ebọọhọ Enọ Ufọkabasi ke Yeruselem
1Ufọn ibaaha ami adiwet inọọ ndufo mbaña utom mfọn e-enamma enọ mme ndisana ikọd Abasi. 2Sia mmediọọñọ ke ndufo emenie udọñ adinwam, mmenyʌñ idat ndufo nduaak inua nnọ mbon Masidonia mbo ke tọọñọ isua ako, ndufo ke Akaya emaebeeñe idem adinọ enọ; ndin eti udọñ ndufo amaademme udọñ uwak ammọ. 3Ado ami mmedọñ mme nditọeka ke Krais edi ibịne ndufo mbaak nduaak inua a-ñnyịn inamma ibaña ndufo adiwuọọñọ ikpu-ikpu, ado nọ ndufo eba ke mbeeñeidem naña ami ñkebo. 4Sia adieke awo Masidonia ndomokeed asañake ye ami adi ndin adikịt naña ndufo imiikibeeñeke idem, iyaikop abuud akeene inua se ñnyịn ikiduaak. 5Ntom ke ami ñkekere mbo ke a-afọn adikpeiye nditọeka ke Krais ubọk mbo yak ammọ ebemiso edi ukañ ndufo, enyʌñ ekweeñe mme ndutʌm enọ ntadubọk a-ndufo ekenwọñọke adinọ. Ndin ayaado se enọ anye nte enọ ima esịd, idooho nte anye e-enọọhọ ke ufiik.
Ufọn Adinọ ke Ntadubọk
6Itoiyo ibo ke awo a-atọọhọ etək-etək adiidọk etək-etək; awo a-atọọhọ ke ntadubọk, adiidọk uwak-uwak. 7Awo keedekeed akpena anọ naña anye akeduak ke esịd amọ, ke anọọ mmeeñe-mmeeñe, me nte enyeenyịk; sia Abasi amama awo a-anọọhọ ke inemesịd. 8Ndin Abasi ayaidiọñ ndufo ke uwak-uwak usʌñ, nọ ato ke afịd ñkpọ ye ke afịd ini ndufo enieñe afịd se eyem enyʌñ eyọhọ ye afịd nti utom. 9Kpa naña ewet:
“Ammọ esuan inie ammọ enọ uweene ke ntadubọk;
adinen ido ammọ a-asọọñọ ada ke nsi-nsi.”
10Ndin, anye a-anọọhọ atọ inwañ ñkpasi nọ atọ, a-anyʌññọ anọ udia, ayainọ ndufo uwak-uwak ñkpasi ke ise ndufo, anyʌñ anam idọk mfịd adinenido ndufo awak. 11Eyaenam ndufo enie ñkpọ ke afịd usʌñ nọ ndufo ekan enọ ke ntadubọk afịd-afịd ini, ndin ato ke ñnyịn, enọ ntadubọk ndufo ayaadat ekọọm asọk Abasi.
12Sia utom a-ndufo enamma itreke ke adinọ ndisana ikọd Abasi se ammọ enana, ado adat uwak ekọọm anọ Abasi. 13Ke ntak utom mfọn a-ndufo edoññoke uwọdñkpọ, mbon mfen eyaetooro Abasi ke ñkobitem a-asañake ye nsuukiwuod a-ndufo enọọhọ eti etob Krais, ye ntadubọk ndufo ke adiwuana ye ammọ ye afịd mbon mfen. 14Ammọ ke idem ammọ ñko e-ebọñ akam inọ ndufo enyʌñ enie udọñ adisoobo ye ndufo ke ntak ekamba mfọn Abasi a-abaaha ye ndufo. 15Ekọọm anie Abasi ke enọ amọ i-inua imiikanna itañ!
Currently Selected:
Udiana Ñwed Kọrint 9: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
