Udiana Ñwed Kọrint 6
6
1Nte mbon i-inamma utom keed inọọ Abasi, ñnyịn imikpe ndufo ubọk ite, ikiiyak mfọn Abasi a-ndufo ebọọhọ awuọ utak-utak. 2Sia anye abo ntom,
“Ke ini mfọnido mmi ami mmauyie fiin,
ke usen adinyaaña ami mmaanyʌñ unyaaña fiin.”
Sese, ini mfọn Abasi ado ami; sese usen adinyaaña amọ ado ami.
Mme Ufen Pọọl
3Ñnyịn inịmme ñkpọ iduọ ke usʌñ awo ndomokeed, mbaak awo adibiat utom a-ñnyịn inamma. 4Ado ke afịd usʌñ imiwọt ndufo ke ñnyịn ido ataa mme asañautom Abasi: Ke akwa adiyọ, ke ini ntịme, ke ukuud ye ke mbaba, 5ke ntiim, ke ñkpakọb ye ntịme, ke akpọsọñ utom, ke utaba idab ye ke ukpa abiọọñ, 6ke adisana ido, ke ifiọk, ke ime, ke mfọnido; ke Adisana Sịbidịd ye ke ataa ima, 7ke ikọ akpanikọ ye ke adudu Abasi; ye ñkpọekọñ adinenido ke ubọk nnasia ye ke ufiin, 8ke ini ukpono ye ke ini asuenne, ke idiọọk etob ye ke eti etob; i-ibat ñnyịn nte mbon abiaña, ado ñnyịn ido mbon akpanikọ; 9i-ibat ñnyịn nte mbon a-awo imiidiọọñọke, ado afịd awo idiọọñọ ñnyịn; nte mme akpañkpa, ke ini ibaaha ke uwem, nte mbon e-emiaha, ado iwottowot; 10i-idat ñnyịn nte mbon mfʌhọ, ado iba ke idadesịd afịd-afịd ini; nte mme uweene ado inam uwak awo enie ñkpọ; nte mme anana ñkpọ ke ini inieghe afịd ñkpọ.
11Ñnyịn imineme nneme inwañ-inwañ ye ndufo mbon Kọrint, inyʌñ inwañña esịd ñnyịn inọ ndufo. 12Ñnyịn imitat esịd ima ndufo ado ndufo itatta esịd ndufo ima ñnyịn. 13Inọ ñnyịn usiene akemme ke se ñnyịn inọọ ndufo; ntañ ami nte ntañ nnọ nditọ mmi. Inie inwañ-inwañ esịd ye ñnyịn.
Ndʌdutọñ a-Abañake Ukpono Ndem
14Ikiidian idem ndufo ye mbon i-imiinịmme Abasi ke akpanikọ. Nsoo ewuana ke adinenido anie ye ukwañ ido? Nsoo ewuana ke unwana anie ye ekịm? 15Nsoo ewuana ke Krais anie ye Belial#6:15 Ke usem Greek Beliaasʌk ado Belial? Nsoo udeeme ke andinịm ke akpanikọ anie ye awo i-imiinịmme ke akpanikọ? 16Nsoo edioomo ke tembịd Abasi anie ye mme usọsọiñkpọ? Sia ñnyịn ido tembịd aduuwem Abasi. Kpa naña Abasi abo ate:
“Ami ñyaadʌñ ye ammọ
ñnyʌñ nsaña ke atu ammọ,
ndin ami ñyaado Abasi ammọ,
ammọ eyaenyʌñ edo ikọd mmi.”
17Ke ntoro,
“Iwuọñọ ke atu afịd ammọ inyʌñ ibakka ida ke
idem ndufo isio-isio,
Abọọñ atañ.
Ikiituuk ndedeghe ñkpọ ndomokeed;
ndin ami ñyaidaara ndufo.”
18Ñko,
“Ami ñyaado Ete inọ ndufo, ndin ndufo eyaedo
nditọ ideen ye nditọ ibaan mmi,
ntom ke Abọọñ Andikponñkan atañ.”
Currently Selected:
Udiana Ñwed Kọrint 6: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
