Akpa Ñwed Timoti 5
5
Ke Abaña mme Ebekpa, Ñkpisọñ ye Ifʌn
1Kuunọọ ekamba awo item ke nduaiya, ado nọ nte anọ ete mfo. Dat ñkparawa nte nditọeka mfo, 2ikpọ ibaan nte mme eka, nyʌñ dat ubọikpa nte nditọeka ibaan ke ataa adisana usʌñ.
3Nọ mme ebekpa ukpono a-adotto, akpan-akpan mme ebekpa eyemme unwam ke akpanikọ. 4Ado ebekpa akpenie nditọ me nditọ-nditọ, yak nditọ ado ebemiso eben ikọ Abasi esịn ke adinam ke edise ñkpọ mbaña mme eka ye ete e-ekekamake ammọ, sia ami a-anem Abasi esịd eti-eti. 5Ebekpa a-anekkeke ayem unwam, anyʌññọ aba ikpọọñ anie idodanyen ke Abasi, anyʌñ ayịre ke akam ye ñkpeubọk uweemeayio ye akonayio abeeñe unwam ato Abasi. 6Ado ebekpa a-abaaha ke udia uwem, anye a-akpakpa akpesʌkado anye asʌkkọ aba ke uwem. 7Nnọ ikọd ufọkabasi mme item ami, mbaak edibiom awo ndomokeed ikpe. 8Awo akeedodo i-imiiseghe ñkpọ ibaña ubon amọ, akpan-akpan mbon ufọk amọ, a-akañ mbuọdidem amọ, anyʌñ adiọọk akan awo i-imiinịmme Abasi ke akpanikọ.
9Kuusịn anyịñ ebekpa ndomokeed ke ñwed nte ebekpa ke anye imiiyọhọke isua ata, anyʌñ anam akpanikọ ye ebe amọ, 10ñko, enekke ediọọñọ anye ke nti utom nte awo a-aketʌmmọ akama nditọ, akama isenawo, ase ñkpọ abaña mme anam utom Abasi, anwam mbon e-ebaaha ke ukuud, anyʌñ akaa iso ke adinam nsio-nsio nti utom.
11Kuusịn anyịñ mme ebekpa e-edoññoke ubọikpa, sia udọñ itọñ abʌkidem amaadi, ammọ eyaekpọñ enwọñọ ammọ ke Krais, ekedọ ndọ. 12Ke adinam ntom, ammọ eyaeben ubiomikpe enọ idem ammọ, sia ammọ e-ebiat akpa enwọñọ a-ammọ ekenamma ye Abasi. 13Ñko ammọ eyaedoñño ifu, enyʌñ ewuọ esaaña ke ufọk ke ufọk. Ammọ idiitreke ke adidoñño ifu kpọd, ado eyasaaña ekeñ inua, esịn idem ke ndubeghe mbon mfen; etaañ ndisịme ye mme ikọ se ammọ imiikpitañña. 14Item mmi ado, yak mme ebekpa i-imiisọññọ edọ ndọ, eman nditọ, enyʌñ ese ufọk ammọ, ndin mme asua idiikanna inie idiọọk se etañ edian ammọ. 15Sia usʌk mme ebekpa emaewuọwuọ ekpọñ usʌñ, ekeene Setan.
16Adieke awonwaan a-adooho andinịm ke akpanikọ anieghe mme ebekpa se anye ase ñkpọ abaña, yak anye aka iso anwam ammọ, ke ayaak ammọ edo mbiomo enọ ufọkabasi, nọ ufọkabasi akan anwam ataa mme ebekpa e-eyemme unwam.
17Mme adaiwuod e-ekamake utom ufọkabasi afọn e-edot ayọhọ ukpono, akpan-akpan mbon e-esịnne ifịk ke adikwọrọ ikọ ye adikpekpeep. 18Sia ikọ Abasi abo, “Kuubọp abaakenañ inua ke ini anye akịmme isọñ utọ abakpa,” amaana adian do, “Anamutom a-adot akʌk utom amọ.” 19Kuukpañ utọñ unọ ikọ edem e-etañña edian adaiwuod ufọkabasi, ibọhọke afo akop ato inua ntiense iba mme ita. 20Nyʌñ sua nọ mme adaiwuod ufọkabasi e-enamma idiọọkñkpọ anwa-anwa, nọ mbon mfen ekop ndịk, enyʌñ etre edinam idiọọk. 21Mmesọọñọ uwuuk fiin ke iso Abasi ye Abọọñ ñnyịn Krais Yisọs, ye ndimek mme enyere, nte yak akpeme anyʌñ anam item ami, usioho awo eto, kuunyʌñ unam ñkpọ ndomokeed ke adusad.
22Kuusọp adidot awo ubọk, kuunyʌñ unie ewuana ke idiọọkñkpọ awo mfen. Nịm idem mfo asana.
23Tre adinwọñ mmọọñ kpọd, nwọñ etək ukọd ke ntak idịb mfo, ye naña udọñọ ufịna fiin ndin-ndin.
24Ndiọiñkpọ usʌk awo ena inwañ-inwañ, enyʌñ esịm itie ikpe mbemiso ammọ; ado usʌk idiọọkñkpọ ekeene awo ke edem. 25Ukem-ukem ado ñko, nti utom awo ena inwañ-inwañ, ndin kpayeado mbon i-imiinaaha inwañ-inwañ ikemeke idịbe ke nsi-nsi.
Currently Selected:
Akpa Ñwed Timoti 5: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
