Akpa Ñwed Kọrint 13
13
1Adieke ami nsemme usem mme awo ye ake mme enyere, ado nnieghe ima, ami nnam uyom nte akpañkpañ. 2Adieke ami nnieghe enọ prọfesi ñnyʌñ ñkan ndiọọñọ mme ndịbe-ndịbe ñkpọ ye ifiọk, mmaana nnie mbuọdidem a-akemeke idịppe mme ikpọabod, ado nnieghe ima, awuọñọ ikpu-ikpu. 3Adieke ami mbenne afịd inie mmi nnọ mme uweene, ñnyʌñ ñyaak idem mmi nnọ nsọñọñkpọ nọ ami ñwọk inua, ado nnieghe ima, udod indoroke miin ndomokeed.
4Ima ado ime, ima afọfọn ido. Inieghe udu, inyʌññọ iduaak inua, ikokkoke idem. 5Inanake ukpono inọ mbon mfen, iyemme ufọn idem amọ, isọppọ iyadesịd, ibatta nnamndue. 6Ima ikoppo inem ke idiọọk, ado adaara ke akpanikọ. 7Ima akpekpeme afịd ini, anịm ke akpanikọ, anie idodanyen, anie nsọọñọnda.
8Ima akenanam ikpuuho. Ado ke itie nte mme prọfesi eba, ammọ eyaetre; itie nte nsio-nsio usem ebañña, eyaedobo; itie nte ifiọk aba, ayaaboiyo afep. 9Sia ñnyịn idiọọñọ ñkpọ ubaak-ubaak, inyʌñ itañ prọfesi ubaak-ubaak, 10ado ayọhọ ifiọk amaadi, se ido ubaak ifiọk ayaasop. 11Idaha a-ami ñkedooho etəkayịn, ñketañ ikọ nte etəkayịn, ñkekere ñkpọ nte etəkayịn, ñkpọ akeñnwaña miin nte etəkayịn. Ke ini ami mmaakekpon ñwuọ ayọhọ awodeen, ami mmaayaak mme ñkpọ ntəkayịn nnịm. 12Sia idahami ñnyịn ikịt ñkpọ ndukpọñ-ndukpọñ nte ikịt ke ukịdiso; ini amaakem iyaikịt iso ye iso. Idahami ami ndiọọñọ ñkpọ ubaak-ubaak; idahado ñyaadiọọñọ ayọhọ-ayọhọ, kpa naña endiọọñọ miin ayọhọ-ayọhọ.
13Ndin idahami, ñkpọ ita esʌhọ: Mbuọdidem, idodanyen ye ima. Ado andikpon ñkan ke atu mme ñkpọ ami ado ima.
Currently Selected:
Akpa Ñwed Kọrint 13: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
