Akpa Ñwed Kọrint 11

1Ikeene uwọdñkpọ mmi kpa naña ami ñkeene uwọdñkpọ Krais.

Ke Abaña Ufʌk Iwuod ke Ufọkabasi

2Ami mmitooro ndufo ke adintoiyo miin ke afịd ñkpọ ye adimʌm mme ndutʌm ñkpọ Abasi ñkama kpa naña ñkekpọñ ammọ inọọ ndufo. 3Idahami, ñyem ndufo ediọọñọ ke Krais ado iwuod anọ awodeen, ñko awodeen ado iwuod anọ awonwaan, ndin Abasi ado iwuod anọ Krais. 4Awodeen akeedodo a-abọññọ akam me a-atañ prọfesi ke ini anye afʌkkọ iwuod amọ, a-amiom iwuod amọ. 5Ñko awonwaan akeedodo a-abọññọ akam me a-atañ prọfesi ke ini anye imiifʌkkọ iwuod amọ, a-amiom iwuod amọ, atie ukem nte anye adifat ided amọ. 6Sia adieke awonwaan imiifʌkkọ iwuod amọ akpena anye afat ided amọ; ado akpedo ado ñkpọ abuud anye adifat ided, yak anye afʌk iwuod.

7Awodeen ikpinaaha afʌk iwuod amọ sia anye ado mbid ye ubọọñ Abasi; ado awonwaan ado ubọọñ awodeen. 8Sia awodeen ikitooho awonwaan idi, ado awonwaan aketo awodeen adi; 9awo ikinyʌññọ ibot awodeen inọ awonwaan, ado ekebot awonwaan enọ awodeen. 10Ke ntak ami, ye ke ntak mme enyere, ke ana awonwaan anie unen ke iwuod amọ. 11Ado ke Abọọñ, awonwaan inieghe unen idem amọ ikpọñ awodeen; awodeen ñko inieghe unen idem amọ ikpọñ awonwaan. 12Sia kpa naña awonwaan aketo awodeen, ntoro ñko, ke awodeen amana ato awonwaan. Ado afịd ñkpọ ato Abasi.

13Ibiide inọ idem ndufo ise: Nte a-adot awonwaan adibọñ akam nnọọ Abasi ke ini iwuod amọ anaaha inwañ? 14Nte edu ubonoñkpọ ikpeebe ñnyịn ke awodeen akpenie anyan ided, ado ñkpọ abuud anọ anye, 15ado ke awonwaan akpenie anyan ided, ado uku amọ? Sia enọ anye anyan ided nte ufʌhọñkpọ. 16Awo akpenie mfaaña abaña ñkpọ ami, ñnyịn inieghe ido mfen ikan ami, mme ufọkabasi ñko inyʌññọ inie.

Ndʌtutọñ ke Baña Edu Unam Ñkpọ ke Ini Ndidia Abọọñ

17Ke mme ewʌhọ ami, ami nnieghe itooro ndomokeed inọ ndufo, sia mme mbono ndufo a-anam idiọọk akan eti. 18Ke akpa ifed, mmekop ke ndufo imaiboho ke ufọkabasi, ubakka a-aba ke atu ndufo, ndin mmeyem adinịm ke akpanikọ. 19Kpayeado, ana ubakka aba ke atu ndufo nọ ediọọñọ mbon e-edooho ataa nditọ Abasi. 20Ndufo imaiboho keed, idooho ndidia Abọọñ ke ndufo edia, 21sia ndufo imaidia ñkpọ, usʌk ndufo idaaha ibet mbon mfen nọ edikeene edia. Ado anam ke ini awo keed adiaha ayʌkkọ, awo mfen adakka abiọọñ, ndin ukọd ananaam awo mfen. 22Ado nte ndufo inieñeke ufọk se ndufo edia enyʌñ enwọñ ñkpọ? Me ado nte ndufo emiom ufọkabasi ke edisuenne mbon i-imiinieghe ñkpọ? Nsoo ke ami ndiitañ ye ndufo? Ado se ami itotooro ndufo? Ñkemekekeme itoro ndufo ke ñkpọ anyem!

23Sia se ami ñkebọọ ke ubọk Abọọñ ke ñkenyʌñ ñkpọñ inọọ ndufo. Abọọñ Yisọs ke akonayio e-eketappa anye enọ ñkpa, amaaben uyo, 24ndin ke amaakenọ ekọọm, anye amaabuuñ uyo ado ate, “Ikpọkidem mmi ado ami, i-inieghe ndufo; inam ami adidat intoiyo miin.” 25Kpa ke ukem usʌñ ado, ke emaekedia ndidia ndubi ema, anye amaaben kọọb ate, “kọọb ami ado ufa edioomo ke iyiib mmi; inam ami, ini akeedodo a-ndufo enwọññọ ami, adidat intoiyo miin.” 26Sia ini akeedodo a-ndufo etaaha uyo ami enyʌñ enwọñ kọọb ami, ndufo emesian ñkpa Abọọñ tutu anye atịmme adi.

27Ke ntoro, awo akeedodo a-ataaha uyo ami, me a-anyʌññọ anwọñ kọọb Abọọñ ke usʌñ i-imiidotto, a-anam idiọọkñkpọ abaña ikpọkidem ye iyiib Abọọñ. 28Akpena afịd awo eduuñọ idem ammọ ese mbemiso ammọ eta uyo enyʌñ enwọñ kọọb ado. 29Sia mbon se idia inyʌñ inwọñ ke ini ammọ imiikiduuñọke ikpọkidem Krais, e-edia enyʌñ enwọñ ubiomikpe enọ idem ammọ. 30Anye ado ntak u-uwak ke atu ndufo ekoppo mmemidem enyʌñ edọñọ, usʌk ndufo enyʌñ edaiya. 31Ado adieke ñnyịn ikpiduuñọke idem ñnyịn ise ñnyịn ikpibaaha ke utọ ubiomikpe ado. 32Kpayeado, ke ini Abọọñ akpeeghe ikpe inọọ ñnyịn ke utọ usʌñ ami, ñnyịn ibọ ntʌnọ mbaak ke akpatre edidian ñnyịn ye mbon ederimbod esobo.

33Ke ntoro, nditọeka mmi ke Krais, imaidiboho itie keed adidia ndidia, ana eda ebet emọ-emọ. 34Adieke abiọọñ adọññọ awo ndomokeed, yak anye adia ñkpọ ke ufọk amọ, mbaak adisoobo ndufo adido ke ubiomikpe.

Ndin ami mmaatịmme ndi, ñyaamaana nnọ mme item mfen.

Currently Selected:

Akpa Ñwed Kọrint 11: ICB

Highlight

Copy

Compare