Matiu 20

Iruiruo vwẹ evun rẹ Ogba ri Vain

1Uvie rẹ odjuvwu ọ họhọ ọghwẹrẹ ro durhie ihwo iruo vwẹ irhiọke ride, re ayen re ru iruo vwẹ udju rọye. 2Ọke rẹ ọ vẹ ayen vwo ve phihọ ikọba ẹdọke nu, ọ da ghwẹ ayen kpo obo udju. 3Rẹ uvo vwọ bẹrẹ cha, ọ da mrẹ efa ri ruẹ emuọvo-o vwẹ afieki; 4Ọ da ta kẹ ayen nẹ, Yanran kpo obo udju mẹ, obo ri fori ejobi kọye me hwa kẹ ovwan. Ayen da ghene yanran. 5Ọke rẹ ọnre vwo vi, ọ da rha mrẹ ihwo efa, ọ da je ta unu ọvo na kẹ ayen. 6Rẹ ọnre vwo vi gẹre, ọ da ro otafe, ọ da je mrẹ ihwo efa ri mudia; ọ da ta kẹ ayen nẹ, Die ovwan vwo jẹ emuọvo e ruo vwẹ ẹdẹ na ejobi? 7Ayen da ta kẹ nẹ, avwanre mrẹ ohwo rọ reyọ avwanre-e. Ọ da je ta kẹ ayen nẹ, Wa yanran kpo obo udju mẹ. 8Ọke rẹ ovwọnvwọn vwo te, ọghwẹrẹ na de ji idibo rọye nẹ, yanran re se ihwo na rhe, rere wa hwa osa kẹ ayen, nẹ ọke rẹsosuọ re te oba. 9Ihwo re durhieri rẹ onre vwo vi na, a da hwa ikọba kẹ ayen. 10Ihwo re durhieri vwẹ irhiọke ride na, ki roro nẹ osa rayen bunọ ọtiọye; ukuko rọye a da je hwa ikọba kẹ ayen. 11Rẹ ayen vwọ reyọ nu, ayen ki guẹ ọghwẹrẹ ro vwo udju na, 12ta nẹ, ihwo rẹ ukuko na, ru iruo kri-i, yẹ a hwa osa abavo kẹ avwanre rẹ wian owian rhiri, rẹ uvo ọgangan na muru. 13Ẹkẹvuọvo ọ da kpahe ọ da ta kẹ ọvo vwẹ usun rẹ ayen na nẹ, oko mi ru we chọ-ọ; wọ rhọvwe ikọba kẹ vwẹ nanaye-e? 14Biko reyọ osa wẹn, re wọ yanran; ẹguọnọ mẹ rere me vwọ hwa osa kẹ wẹ kirobo re me hwa kẹ ọrivẹ na. 15Wo gbi roro nẹ o fori rere me vwẹ igho mẹ ru obo ri je vwe-e? Gbenẹ ivun miovwo ovwan fiki rẹ obo me vwọ riẹn emu ru? 16Eriyin na ọ rọ ka uko kọ karo, ọ rọ karo kọ ka uko.

Obọ Rerha ri Jesu ta Ota rẹ Ughwu vẹ Evrẹnushi Rọye

(Mak 10.32-34; Luk 18.31-34)

17Ri Jesu vwo kpo Jerusalẹm, o de se ihwivẹ na phihọ akakọ, ọ da ta kẹ ayen vwẹ idjerhe nẹ, 18Nighe, avwanre kpo Jerusalẹm re; a cha reyọ Omọ rẹ ohwo vwọ hẹ obọ rẹ ilori rẹ irherẹn kugbe isiẹbe, ayen che brorhiẹ hwe rere o ghwu, 19Ihwo ri Keferi ke cha vwọ jehwẹ, ke ruo oja, ka karọ mu agbagba: ẹdẹ erha da wan nu ko vrẹn nẹ ughwu.

Oyare rẹ Oni ri Jems kugbe Jọn

(Mak 10.35-45)

20Etiyin oni rẹ emọ ri Zẹbidi kugbe emọ rọye ivẹ de bro rhe, rẹ ayen vwo yere nu, ọ da nọ ekpẹn rẹ emu ọvo. 21Ọ da ta kẹ nẹ, Die wọ guọnọre? Ọ da ta kẹ nẹ, Rhọvwe rere emọ mẹ ivẹ na vwo tidia, ọvo obọrhe wẹn ọrivẹ obọhwẹre wẹn vwẹ evun rẹ uvie wẹn. 22Ẹkẹvuọvo Jesu da kpahe ọ da ta kẹ nẹ, Wọ riẹn obo wọ nọre na-a. Ovwan sa da uko re me cha da na? Ayen da rhọvwe nẹ, ayen sa da. 23Ọ da ta kẹ ayen nẹ, Uyota ovwan sa da uko na, ẹkẹvuọvo re vwo tidia vwẹ obọrhe mẹ eyẹ obohwẹre mẹ, Ọ dia omẹvwẹ ri se ruo-o, ẹkẹvuọvo ọ herọ kẹ ihwo rẹ ọsẹ mẹ rhuẹrẹ phihọ otọ kẹ. 24Ọke rẹ ihwivẹ ri chekọ vwo nyo, ivun de miovwo ayen kpahe iniọvo ivẹ na. 25Ẹkẹvuọvo Jesu de se ayen rhe, ọ da ta kẹ ayen nẹ, ivie ri Keferi vwẹ ọrho nyẹ ayen, inotu rayen je ghwa vwẹ ogangan sun ayen. 26Ọ sa dia ọtiọye vwẹ ohri rẹ ovwa-an. Ẹkẹvuọvo ohwo kohwo rọ guọnọ ọrho vwẹ ohri rẹ ovwan, e gbe jo gbe odibo; 27ọ rọ guọnọ nẹ ọye karo e gbe jọ vwẹ oma kpotọ. 28Ọ dianẹ Ọmọ rẹ ohwo rhere re e vwo gbe odibo kẹ-ẹ, ẹkẹvuọvo re o vwo gbe odibo, rere ọ vwẹ arhọ rọye tan ihwo buebu.

Jesu Sivwi Irhuẹrẹ Ivẹ

(Mak 10.46-52; Luk 18.35-43)

29Ọke rẹ ayen vwo nẹ Jeriko phia, ihwo buebu de bru nene. 30Nighe, irhuẹro ivẹ de tidia vwẹ orhoma rẹ idjerhe, rẹ ayen vwọ riẹn nẹ Jesu cha wan vrẹn, ayen de kperi ta nẹ, Ọrovwohwo ni aruẹdọn rẹ avwanre, wẹ ọmọ ri Devid. 31Otu buebu na da van ku ayen nẹ we rhurhu unu; ẹkẹvuọvo ayen de kperi gangan nẹ, Ọrovwohwo ni aruẹdọn rẹ avwanre, We Ọmọ ri Devid. 32Jesu de mudia, o de se ayen, ọ da ta nẹ, Die wa guọnọre ni mi ru kẹ ovwan? 33Ayen da ta kẹ nẹ, Ọrovwohwo, rhiẹ ẹro rẹ avwanre. 34Ẹro da dọn gangan, ọ da vwẹ obọ te ẹro rayen, siẹvuọvo na ayen da mrẹ orẹ, ayen de nene.

Currently Selected:

Matiu 20: UBV77

Highlight

Copy