Luk 1
1
Ọbe ro siri rhe Tiofilọs
1Kirobo rẹ ihwo buebu vwo si eta na phihọ otọ rẹ obo re phiare kugbe emu ri ruru vwẹ uherevie rẹ avwanre, 2kirobo ra vwẹ ayen yono avwanre notọrhe, vwẹ unu rẹ ihwo re dia iseri rẹ ota na, 3o de fo kẹ vwẹ rere kirobo re me riẹn ayen gbagba na, kọye mi si ayen ọvuọvo rhe, 4Tiofilọs ro kpenu; rere wọ vwọ sa riẹn uyota rẹ obo re vwo yono uwe na.
Evwiẹ ri Jọn ra ta ota kpahe
5Ọke ri Herọd vwọ hẹ ovie ri Judia, ọwanran ọvo re se Zakaraya, ọ rẹ otu rẹ Abija. o de vwo aye ọvo ọ rẹ ekru rẹ Erọn, odẹ rọye kẹ Ẹlizabẹt. 6Ayen ivẹ na da dia evwata vwẹ obaro rẹ Ọghẹnẹ, ayen yọnrọn irhi na gangan. 7Ayen gbi vwo ọmọ-ọ, ẹga kọye ese ayen, ayen ivẹ na je kpako re.
8Ute rọye vwo te, ro vwo ze izobo kẹ Ọghẹnẹ vwẹ enu rẹ ẹshẹ, 9kirobo rẹ ẹwanran na ruẹ jovwo, vwẹ uwevwi rẹ ẹga rẹ Ọrovwohwo rọ vwọ torhẹ insẹns. 10Yẹ ihwo na ejobi diguẹ re nẹ ẹrhovwo vwẹ ọke ra vwo torhẹ insẹns na. 11Amakashe rẹ Ọrovwohwo ro mudia vwẹ obọrhe rẹ ẹshẹ rẹ insẹns na da vwẹ oma phia kẹ. 12Udu de bro rọ vwọ mrẹ, oshọ de muo. 13Ẹkẹvuọvo amakashe na da ta kẹ, Zakaraya wọ djẹ oshọ-ọ, kidie enyo ẹrhovwo wẹn, aye wẹn Flizabẹt che vwiẹ ọmọshare, ku wo se odẹ rọye Jọn.
14Ku wo vwo aghọghọ vẹ omavwerhe,
ihwo buebu ke ghọghọ vwẹ evwiẹ rọye;
15Kidie ọ cha rho vwẹ obaro rẹ Ọrovwohwo,
ọ cha da wain yẹrẹ udi ọganga-an,
kọ cha vọn vẹ Erhi Ọfuanfon,
mrẹmrẹ nẹ evun rẹ oni rọye rhe.
16Ko ku emọ rẹ Izrẹl buebu rhẹriẹ
bru Ọrovwohwo Ọghẹnẹ rayen,
17kọ ka obaro kẹ vwẹ erhi vẹ ogangan rẹ Ilaija,
rọ rhẹriẹ udu rẹ esẹ na bru emọ na,
ijọghọ evwo kpo aghwanre rẹ ọsoso,
rere ọ rhuẹrẹ ihwo phihọ otọ kẹ Ọrovwohwo.
18Zakaraya da ta kẹ amakashe na, Didi oka mi vwo vugbe ọna? Kidie mẹvwẹ ọmare, aye mẹ je kpako re. 19Amakashe na da kpahe kẹ, Mẹvwẹ Gabrẹl ro muẹdia vwẹ obaro rẹ Ọghẹnẹ; ke ji vwe rhe ta ota kẹ wẹ, re me ghwa ikun esiri na rhe we. 20Nighe, kẹ etinẹ yanran ku wo diunu, wọ gbe sa ta ota-a, bẹsiẹ rẹ imu nana che vwo ru, fikiridie wo se ota mẹ gbuyota-a, ri che ru gba vwẹ ọke rayen. 21Ihwo na da rhe hẹrhẹ Zakaraya bẹn, o de gbe ayen unu kidie o krinọ vwẹ obo ẹshẹ na. 22Ọke ro vwo yoro phia, ọ gbe sa ta ota kẹ aye-en, ayen da vwẹ evun riẹn nẹ ọ mrẹ emramrẹ uwevwi rẹ ẹga na; obọ kọye o kpogho kẹ ayen, o de ghwe diunu. 23Ọke rẹ ute rẹ ẹga rọye vwọ gba nu, o de kpo uwevwi rọye.
24Vwẹ ẹdẹ nana rhe vwọ wan nu aye rọye Ẹlizabẹt da mrevun, o de sioma nu emeranvwe iyori soso, tanẹ, 25Ọrovwohwo ruruọ o de ghine si ehwẹjẹ nana nẹ uvwe oma.
Evwiẹ ri Jesu ra ta ota kpahe
26Vwẹ emeranvwe resan Ọghẹnẹ de ji amakashe Gabrẹl kpo orere ri Galili ọvo re se Nazarẹt, 27bru ọmọtobẹ ri Josẹf saotọ, ohwo rẹ uwevwi ri Devid; odẹ rẹ ọmọtobẹ na ki Meri. 28Ọ de bro rhe ọ da ta, Do wẹ rọ vọnre vẹ ẹserọphẹ, Ọrovwohwo vẹ owẹ herọ. 29Udu de bro gangan vwẹ ota na, kọ vwẹ evun roro nẹ, ọna ki didi oghẹre rẹ uyere. 30Amakashe na da ta kẹ, Meri, wọ djẹ oshọ-ọ, kidie ivun wẹ vwerhe Ọghẹnẹ gangan. 31Nighe, wọ cha mrevun ku wo che vwiẹ ọmọshare, ku wo se odẹ rọye Jesu. 32Ọ cha rho, ke se Ọmọ rẹ Ọro Mekpenu;
Ọrovwohwo Ọghẹnẹ kọ vwẹ ekete ri Devid
ọsẹ rọye vwọ kẹ,
33Kọ re vwẹ enu rẹ uwevwi ri Jekọp bẹdẹ;
uvie rọye gbi se vwo oba-a.
34Meri da ta kẹ amakashe na, Komavọ ọnana sa vwọ dia ọtiọye, ye me vẹ ọshare je mroma-a?
35Amakashe na da ta kẹ,
Erhi Ọfuanfon na che bru we rhe,
ogangan rẹ Ọro Mekpenu na ko che rhurhu uwe;
ọtiọye ọmọ ru wo che vwiẹ na ke se ọfuanfon,
ọmọ rẹ Ọghẹnẹ.
36Nighe, Ẹlizabẹt omoni wẹn ọ rhi mrevun rẹ ọmọshare vwẹ uyovwiesha na; etiyin emeranvwe esan re, ọ re se ẹga jovwo na. 37Kidie o vwo emu ọvuọvo rọ bẹn kẹ Ọghẹnẹ-ẹ. 38Meri da ta, Nighe, mẹvwẹ ọmọtẹ rẹ Ọrovwohwo; gbe jẹ ọ sẹ kẹ vwẹ kirobo rẹ ota wẹn epha. Amakashe na da yan jovwo.
Meri rọ ra mrẹ Ẹlizabẹt
39Vwẹ ọke yena Meri de ghwe vrẹn okpokpakpa vwo kpo obo orho rẹ ugbenu, vwo kpo orere ri Juda, 40ọ da ro uwevwi ri Zakaraya o de yere Ẹlizabẹt. 41Rẹ Ẹlizabẹt vwo nyo uyere ri Meri, akpẹn rẹ evun na de mu pho vwẹ evun rọye; Ẹlizabẹt da rhe vọn vẹ Erhi Ọfuanfon 42o de mu kperi gangan, Ebruphihọ kẹ wẹ vwẹ ohri rẹ eya, ebruphihọ kẹ akpẹn rẹ evun wẹn! 43Mavọ o ru wan, rẹ oni rẹ Ọrovwovwe rhi vwo wo vwe? 44Kidie, nighe, ọke mi ghwe vwo nyo umri rẹ uyere wẹn na, akpẹn rẹ evun mẹ na de mu pho vẹ aghọghọ.
45Ebruphihọ kẹ ohwo ro segbuyota nẹ obo rẹ Ọrovwohwo ta kpahọ ejobi cha sẹ.
Une rẹ ejiro ri Meri Soro
46Meri da ta,
Erhi mẹ jiri Ọrovwohwo,
47Ẹnwẹ mẹ ghọghọre vwẹ oma rẹ Ọghẹnẹ Osivwi mẹ.
48fiki rẹ ọghọ ro mu kẹ ọmọtẹ rọye.
Kidie, nighe, kẹ etinẹ ra uvwiẹ rẹ akpọ na ejobi che se vwe ebruphihọ.
49Onotu rẹ ogangan ru emu rode kẹ vwẹ,
ọfuanfon kọ dia kẹ odẹ rọye.
50Arodọvwẹ rọye herọ kẹ otu re djẹ oshọ rọye nẹ uvwiẹ re te uvwiẹ.
51Ọ vwẹ ogangan rẹ obọ rọye phia,
ọ hra eheri rẹ udu rẹ ihwo ofefe,
52Ọ vwẹ ihwo ri kpenu kpotọ,
ọ kpare ihwo ri kpotọ kpenu.
53Ọ vwẹ emu kẹ otu rẹ owẹvwe hwe;
edafe na ọ djẹ ayen kpo vẹ abọ ofefe.
54Ọ cha Izrẹl odibo rọye uko,
vwẹ ẹkarohọ vẹ arodọvwẹ,
55kirobo ro veri kẹ esẹ rẹ avwanre ride,
Ebraham vẹ ikru rọye bẹdẹ.
56Meri da dia uwevwi rẹ Ẹlizabẹt emeranvwe erha tavwe ro ki rhivwi kpo.
Evwiẹ ri Jọn ri Baptist
57Asakiephana ọke rẹ uvwiẹ rẹ Ẹlizabẹt de rhi te, o de vwiẹ ọmọshare. 58Igbeyan rọye kugbe imoni rọye rhe vwọ mrẹ ẹse rẹ Ọrovwohwo ru kẹ, ayen da rhe ghọghọ kẹ. 59Edẹ ẹrenre vwọ gba, ayen da rhe yanvwe ọmọ na; ayen de mu odẹ kẹ nẹ Zakaraya, kirobo re se ọsẹ rọye, 60oni rọye da sen nẹ, ọ dia ọtiọye-e, e se Jọn. 61Ayen da ta kẹ, o vwo ohwo ọvuọvo re se Jọn vwẹ orua na-a. 62Ayen da vwẹ obọ ta ota kẹ ọsẹ rọye rere ọye ọvo mu odẹ kẹ. 63Ọ da nọ ekpẹn rẹ ọbe kugbe imẹjẹ, o de sio nẹ, E se odẹ rọye Jọn. O de gbe ayen ejobi unu, 64Siẹvuọvo na unu rọye de ghwe rhie awọẹrenwe rọye da ghwa rhan, ọ da ta ota, jiri Ọghẹnẹ. 65Oshọ de rhi mu ihwo re dia kẹrẹ ayen ejobi. Usi rẹ ota na de rhi kperi ro orho rẹ ugbenu ri Judia ejobi; 66ihwo ejobi ri nyo ota na de phio phihọ udu rayen, tanẹ, Komavọ ọmọ nana cha dia? Kidie obọ rẹ Ọrovwohwo vẹ ọmọ na herọ.
Arọẹmrẹ ri Zakaraya
67Ọsẹ rọye Zakaraya da rhe vọn vẹ Erhi Ọfuanfon o da mraro, tanẹ,
68Ebruba kẹ Ọrovwohwo Ọghẹnẹ rẹ Izrẹl;
kidie o rhi ni ihwo rọye rọ tan hirhe,
69ọ kpare ighoro rẹ esivwo kẹ avwanre
vwẹ uwevwi ri Devid odibo rọye,
70kirobo rọ tare vwẹ unu rẹ emraro rọye nẹ
otọ rẹ akpọ na rhe,
71nẹ o si avwanre nẹ obọ rẹ ivwighrẹ rẹ avwanre,
kugbe obọ rẹ otu ri tuoma rẹ avwanre;
72iruo rẹ arodọvwẹ ro ruru kẹ esẹ rẹ avwanre ride,
kugbe ẹkarohọ rẹ ọphọ ọfuanfon rọye,
73ive ro veri kẹ ọsẹ rẹ avwanre Ebraham,
74nẹ ọye vwọ kẹ avwanre,
rere, o de si avwanre nẹ obọ rẹ ivwighrẹ rẹ avwanre nu,
avwanre vwọ sa ga vwẹ ufuoma,
75vwẹ ẹfuọn kugbe ọvwara vwẹ obaro rọye
vwẹ ẹdẹ rẹ akpọ rẹ avwanre ejobi.
76Wẹ, ọmọ, e che se we ọmraro rẹ Ọro Mekpenu;
kidie wọ cha ka obaro kẹ Ọrovwohwo ra rhuẹrẹ idjerhe rọye,
77Kọ vwẹ ẹriẹn rẹ esivwo kẹ ihwo rọye,
vẹ evwoghovwo rẹ imwemwu rayen,
78fiki rẹ arodọvwẹ rẹ Ọghẹnẹ rẹ avwanre,
ọye Isio rẹ Urhiọke vwo nẹ enu bru avwanre rhe
79ro lo mu ihwo re hẹ ebri kugbe uhoho rẹ ughwu,
ro sun avwanre vwẹ idjerhe rẹ ufuoma.
80Ọmọ na da rhe rho ọ da rhe vọn vẹ erhi, ọ da dia evun rẹ aghwa bẹsiẹ rọ ke vwẹ oma phia kẹ Izrẹl.
Currently Selected:
Luk 1: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
