Jọn 14
14
Jesu hẹ Idjerhe ro kpo Obo rẹ Ọsẹ na
1We jẹn udu bru ovwa-an; se Ọghẹnẹ gbuyota, we ji se vwẹ gbuyota rhe. 2Vwẹ uwevwi rẹ Ọsẹ mẹ ivun buebu herọ; ọ dia ọtiọye-e, me a rha ta kẹ ovwan nẹ me ra rhuẹrẹ asan kẹ ovwan? 3Me da yanran ra rhnẹrẹ asan kẹ ovwan, mi ji rhivwi cha cha reyọ ovwan kẹ oma mẹ, rere asan re me epha ovwan je dia etiyin rhe. 4Yẹ ovwan riẹn idjerhe rẹ asan re me ra na. 5Tọmọs da ta kẹ, Ọrovwohwo, avwanre riẹn asan re wọ ra na-a; komavọ avwanre sa vwọ riẹn idjerhe na? 6Jesu da ta kẹ, Mẹvwẹ hẹ idjerhe na, kugbe uyota na, kugbe arhọ na; ohwo ọvuọvo se bru Ọsẹ na rhe-e, ẹkẹvuọvo yẹ oma mẹ. 7Ọ diane kẹ ovwan riẹn vwẹ jovwo, mane yẹ ovwan riẹn Ọsẹ mẹ rhe; kẹ etinẹ yanran ovwan riẹnrẹ yẹ ovwan je mrẹ re.
8Filip da ta kẹ, Ọrovwohwo, dje Ọsẹ na kẹ avwanre, rere ọ vwọ vọn avwanre evun. 9Jesu da ta kẹ, Ede obo re me vẹ owẹ diarọ krite na, da je wọ riẹn vwẹ Filip? Ọ rọ mrẹ vwẹ nu jọ mrẹ Ọsẹ na re; Komavọ wọ vwọ tanẹ, Djẹ Ọsẹ na kẹ avwanre? 10Wo rhe segbuyota nẹ me hẹ evun rẹ Ọsẹ na nẹ Ọsẹ na hẹ evun mẹ? Eta na re me ta kẹ wẹ na ọ diẹ ogangan rẹ obọ mẹ me vwọ ta-a; ẹkẹvuọvo Ọsẹ na rọ dia evun mẹ na ọye ru iruo na. 11Se vwe gbuyota nẹ me hẹ evun rẹ Ọsẹ na nẹ Ọsẹ na je hẹ evun mẹ; eyẹ gbe se vwe gbuyota fiki rẹ iruo na.
12Uyota, uyota, me ta kẹ owẹ, ọ ro se vwe gbuyota o ji che ru iruo nana ri mi ruẹ na rhe; iruo re rhonọ enana eye o che ru, fikiridie mi bru Ọsẹ mẹ ra. 13Emu kemu rẹ ovwan nọre vwẹ odẹ mẹ, mi se ruo, rere a vwọ vwẹ urinrin kẹ Ọsẹ na vwẹ oma rẹ Ọmọ na. 14Ovwan da nọ kemu kemu vwẹ odẹ mẹ, mi se ruo.
Ive rẹ Erhi Ọfuanfọn na
15Ovwan da guọnọ ovwẹ, ovwan gba sẹro rẹ irhi mẹ. 16Ke me rẹ Ọsẹ na, kọ vwẹ Obruche ọfa kẹ ovwan, rọ vẹ ovwan gbe dia bẹdẹ, 17mrẹmrẹ kọye hẹ Erhi rẹ uyota na, rẹ akpọ na sa reyọ na-a, fikiridie ọ mrẹ rẹ-ẹ eyẹ ọ je riẹ-ẹn; ovwan riẹnrẹ kidie ọ vẹ ovwan gba dia, kọ je dia evun rẹ ovwan.
18Mi se jẹ ovwan ọvo vwo sogono-o; mi che bru ovwan rhe. 19Chekọ ọmọke emerha, akpọ na gbe cha mrẹ vwẹ ọfa-a, ẹkẹvuọvo yẹ ovwan cha mrẹ vwẹ; fikiridie me herọ na, ovwan ke je dia rhe. 20Vwẹ ẹdẹ yena kẹ ovwan riẹn nẹ me hẹ evun rẹ Ọsẹ na, yẹ ovwan hẹ evun mẹ, ye me hẹ evun rẹ ovwan. 21Ohwo rọ yọnrọn irhi mẹ rọ da sẹro rẹ ayen, oyẹ hẹ ohwo rọ guọnọ ovwẹ; ohwo rọ guọnọ ovwẹ Ọsẹ mẹ kọ guọnọ, ke me guọnọ ke me vwẹ oma mẹ phia kẹ. 22Judas, ọ dia ọ re se Iskariọt na-a! da ta kẹ, Ọrovwohwo, komavọ ọ epha ru wọ vwọ vwẹ oma wẹn phia kẹ avwanre, rọ gbe rha dia akpọ na-a? 23Jesu da kpahe kẹ, Ọ da dianẹ ohwo guọnọ ovwẹ, ko sẹro rẹ ota mẹ, Ọsẹ mẹ kọ guọnọ avwanre ki bro rhe avwanre vẹ ọye ke gba dia uwevwi. 24Ọ rọ guọnọ ovwẹ-ẹ yo sẹro rẹ eta mẹ-ẹ; ota na re ovwan nyo na ọ dia ọmẹ-ẹ ẹkẹvuọvo ọ rẹ Ọsẹ na ro ji vwe rhe na.
25Imu nana me ta ke ovwan, re me vẹ ovwan vwọ je herọ na. 26Ẹkẹvuọvo Obruche na, Erhi Ọfuanfon na, rẹ Ọsẹ na che ji rhe vwẹ odẹ mẹ na, ko chẹ yono ovwan emu ejobi, kọ cha karohọ ovwan emu ejobi re me ta kẹ ovwan. 27Ufuoma mi jovwo kẹ ovwan; ufuoma mẹ me vwọ kẹ ovwan; ọ dia obo rẹ akpọ kẹ me kẹ ovwan na-a. We jẹn udu bru ovwa-an, eyẹ we jẹn oshọ mu ovwa-an. 28Wẹ nyo obo re me ta kẹ ovwan, me yanran, mi ji che bru ovwan rhe. Wọ da guọnọ ovwẹ, mane kẹ ovwan a ghọghọ, fikiridie mi bru Ọsẹ na ra; kidiẹ Ọsẹ na rhonọ ovwẹ. 29Asakiephana me ta kẹ ovwan tavwe rọ ke rhe phia, rere ọke rọ da phia, ovwan vwo se gbuyota. 30Mi gbi che nene ovwan ta ota buebu ọfa-a, kidie osun rẹ akpọ nana cha re. O vwo ogangan vwẹ enu mẹ-ẹ. 31Mi ruẹ kirobo rẹ Ọsẹ na ji urhi kẹ vwẹ, rere akpọ na vwọ sa riẹn nẹ me guọnọ Ọsẹ na. Evrẹn, e jẹn a yanran.
Currently Selected:
Jọn 14: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.