Hosia 9
9
Ehwe re Hwe Izrẹl Fiki ri Jesegbuyota ro Churu Obọ mu
1Wọ ghọghọ-ọ, E Izrẹl!
wo jẹn oma vwerha owẹ kerẹ ihwo na-a;
kidie wo gbe igberadja, wọ da sen Ọghẹnẹ wẹn.
Osa ra hwa kẹ igberadja ọye ri je we
vwẹ utuwevwi re de wuye.
2Utuwevwi re de wuye vẹ okọ ri vain gbe sa ghẹrẹ aye-en,
udi ọkpokpọ ayen gbe cha mrẹ da-a.
3Ayen gbe cha dia otọ rẹ Ọrovwohwo na-a;
ẹkẹvuọvo Ifrem che rhivwi kpo Ijipt,
ayen ke re emu rijẹfuọn vwẹ otọ rẹ Asiria.
4Ayen gbe jẹ udi ku Ọrovwohwo ọfa-a;
ayen gbe sa vwẹ izobo rayen na phoro aro-o.
Emuọre rayen kọ họhọ emu rẹ uvweri;
ihwo re rerọ ejobi yi gbe ẹgua;
emu ayen kẹ owẹvwe rayen ọvo ofue;
a cha vwọ vwẹriẹ uwevwi rẹ Ọrovwohwo kakaka-a.
5Kidie wo che ru vwẹ ẹdẹ rẹ orẹ re bruru na,
kugbe ẹdore rẹ Ọrovwohwo na?
6Kidie gbe nighe, ayen ra yanran kpo Asiria;
Ijipt cha ghwẹ ayen koko,
Mẹmfis kọye che shi ayen.
Ekuakua esiri vẹ idọnọ rayen ejobi odi ko di rhurhu ayen
inwe ke djẹ phihọ itughẹ rayen.
7Ẹdẹ rẹ ojẹriọ na rhire,
ẹdẹ rẹ osa ẹ hwa tere Izrẹl cha riẹn.
Ọmraro na vwonẹ ẹkpa,
ohwo rẹ erhi rheri yọ mwa orhuẹ,
fiki rẹ orukuruku rode wẹn
kugbe omaetuo rode.
8Ọmraro na ọye ọrhẹrotọ rẹ Ifreni,
ihwo rẹ Ọghẹnẹ mẹ,
yẹ a kpahe ufi hẹrhẹ vwẹ idjerhe rọye ejobi,
omaetuo vwẹ uwevwi rẹ Ọghẹnẹ rọye.
9Ayen gbe oma rayen ku putu putu
kerẹ ọke ri Gibeah;
kọ karohọ orukuruku rayen,
kọ guọghọ imwemwu rayen.
10Kerẹ otiẹ vwẹ evun rẹ aghwa,
ọtiọye me mrẹ Izrẹl.
Kerẹ otumọ rẹ emamọ rẹ owe,
re mọre vwẹ ọke ororo rọye,
ọtiọye me mrẹ esẹ wẹn.
Ẹkẹvuọvo ayen de bru Baal-peor rhe,
ayen de rhi phorho oma ki Baal,
Obo rẹ ayen guọnọre na de phi ayen phihọ ekuakua rẹ omaetuo.
11Urinrin rẹ Ifrem kọ cha rhan jovwo kerẹ ọmọphran
o vwo uvwiẹ-ẹ o vwo evun ẹmrẹ-ẹ, o vwo emeranvwe ẹchọra-a.
12Ọ tobọ dianẹ ayen vwiẹ emọ dede
mi hwe ayen, ọvuọvo gbi chekọ-ọ.
Ekan kẹ ayen
vwẹ ọke mi de tephe kẹ ayen
13Emọ rẹ Ifrem, kirobo re me mrẹ na,
a vwẹ ayen ze kẹ ughwu;
Ifrem ọvo che sun emọ rọye ra teye hwe.
14Kẹ ayen, E Ọrovwohwo–
kidiẹ wọ kẹ ayen
gba ke ayen evwiẹchora kugbe ivie eyaya.
15Umwemwu kumwemwu rẹ ayen vwẹ oma phia vwi Gilgal;
etiyin oma rẹ ayen wan tu vwe cha na.
Fiki rẹ obrabra rẹ uruemu rayen
ke me djẹ ayen nẹ uwevwi mẹ.
Me gbe guọnọ ayen ọfa-a;
isun rayen na ihwo rẹ okpetu.
16A ghwiẹ Ifrem, owọ rayen yamu,
ayen gbe cha mọ emamọ-ọ.
Ayen da tobọ vwiẹ emọ dede
ki mi hwe emọ ri je ayen na.
17Ọghẹnẹ mẹ cha kpare ayen kufia,
kidie ayen davwerhọn rọye-e;
ayen ki che suosuo vwẹ ohri rẹ ẹgborho na.
Currently Selected:
Hosia 9: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
