Izikiẹl 27
27
Uvwerhe Kpahe Taya
1Ota rẹ Ọrovwohwo de bru vwe rhe: 2Asakiephana wẹ, ọmọ re ohwo, kuenu rẹ ovie kẹ Taya, 3re wọ ta kẹ Taya, rọ dia kerẹ unu rẹ abadi, ọneki rẹ ihwo buebu vwẹ obo erhuru na, nẹ e nẹ Ọrovwohwo Ọghẹnẹ tare:
E Taya, wẹ re tare nẹ,
Me gbare vwẹ erhuvwu.
4Ughwru wẹ hẹ uherevie rẹ abadi;
ihwo re bọn wẹn nabọ bọn wẹn vẹ erhuvwu gba.
5Ayen vwẹ uloho ro nẹ Sinae rhe
vwọ bẹrẹ ephapha wẹn;
ayen da reyọ igedu nẹ Lebanọn rhe
vwo ru ọkpọ kẹ wẹ.
6Vwẹ ehahe ri Bashan
ọye ayen vwọ kare uvi wẹn,
ayen da vwẹ afọn so erheri
ọ ro nẹ erhuru ri Saiprọs rhe,
ra vwẹ akeni vwọ phare.
7Vwẹ emwa rẹ e rhuori ri nẹ Ijipt rhe
ọye e vwo ru aphiana,
rọ dia oka wẹn,
ọgiọgiọ kugbe orhurhu ro nẹ erhuru rẹ Elishah rhe
kọye ebọn wẹn.
8Ihwo re dia Sidọn kugbe Arvadi
eye eguokọ wẹn;
ewena ri Zema hẹ evun wẹn,
ayen imueghuvwu wẹn.
9Ekpako ri Gẹbal vẹ ewena rọye
hẹ evun wẹ,
re vwẹ okarọ vwo diẹ uphrophro okọ wẹn;
ekpo rẹ abadi ejobi vẹ otu ri bio hẹ evun wẹn,
re ayen wene ekuakua wẹn mie we.
10Pesha kugbe Lud kugbe Put je hẹ usun rẹ ihwo rẹ ofovwi wẹn; ayen da vwẹ ekpọfia vẹ erhu vwọ ya wẹ; ayen da vwẹ erhuvwu vwọ kẹ wẹ. 11Ihwo rẹ Arvadi kugbe Hẹlẹk gba riariẹ igbẹhẹ wẹn phihọ, ihwo ri Gamad hẹ obo ohẹrhẹ wẹn; ayen da vwẹ ekpọfia wẹn vwọ ya igbẹhẹ wẹn riariẹ; ayen de ni erhuvwu wẹn gbagba.
12Tarshish vẹ owẹ chueki fiki rẹ efe buebu ro rhe re: idọnọ efuafon, utehru, oze, kugbe odje rẹ ayen vwo wene ekuakua wẹn. 13Javan, Tubal, kugbe Mẹshẹk vẹ owẹ re gba chueki; ayen vwẹ ekpuyovwi rẹ ihwo vẹ ekuakua rẹ ẹrovwo vwo wene ekuakua rẹ eki wẹn. 14Bet-togarmah vwẹ iyesi wene ekuakua wẹn, iyesi rẹ vwo phi ofovwi kugbe irhuẹn. 15Ihwo ri Rhode vẹ owẹ chueki; erhuru buebu na eye oghoghẹre rẹ eki wẹn, ayen Me vwẹ akeni vẹ ikoro vwọ hwa osa kẹ wẹ. 16Idọm vẹ owẹ chueki kidie wo vwo oghwa rẹ eki buebu; ayen me vwẹ ibieragha iyoyovwi, vẹ isene, emwa rẹ ifi, omamọ rẹ esada, evwarha, kugbe ikprukpru vwo wene oghwa rẹ eki wẹn. 17Juda kugbe otọ rẹ Izrẹl vẹ owẹ chueki; ayen me vwẹ ọka, oliv, kugbe owe re ka mọ, ọnyọn evwri kugbe udẹ vwo wene ekuakua rẹ eki wẹn. 18Damaskọs vẹ owẹ chueki fiki rẹ ekuakua obuebu wẹn, fiki rẹ efe dohwo doka rẹ ayen vwori; udi ri Hẹlbọn, kugbe ẹton rẹ ogegede ọfuanfon, 19udi ro nẹ Uzal rhe ọye e vwo wene oghwa rẹ eki wẹn; utehru ra nabọ duvwu, owangha, kugbe ugiri eye e vwo wene ekuakua rẹ eki wẹn. 20Dedan vẹ owẹ chueki rẹ emwa ra vwọ hwa enu rẹ iyesi gua. 21Arebia kugbe isun ri Kedar eye ineki eghaghare wẹn vwẹ imigegede, egbo, kugbe ẹvwe; enana ayen vẹ owẹ vwọ chueki. 22Ineki ri Sheba kugbe Raamah vẹ owẹ chueki; ayen da vwẹ omamọ rẹ egẹ ri gbo ọnrhe ororo vwo wene oghwa rẹ eki wẹn, kugbe ibieragha re ma ghanre, kugbe oro. 23Haran, Kannẹh, Idẹn, Asshọr, kugbe Shilmad vẹ owẹ chueki. 24Enana vẹ owẹ chueki rẹ omamọ re iwun, emwa ọgiọgiọ kugbe emwa rẹ ifi, kugbe iruẹ ra sanọre ra vwẹ ifi gba kokoroko, vwẹ enana keye ayen vẹ owẹ vwọ chueki. 25Ekọ ri Tarshish eye a vwọ ghwa oghwa rẹ ekuakua rẹ eki wẹn. Etiyin wọ da vọn tunu a da nabọ fan wẹ gbe vwẹ evun
rẹ uherevie rẹ abadi.
26Eguokọ wẹn de bi we phia
ra ro uherevie rẹ abadi.
Odju rẹ obaro ọnre shu we
vwẹ uherevie rẹ abadi.
27Efe wẹn, ekuakua wẹn, oghwaeki wẹn,
eguokọ wẹn imueghuvwu wẹn,
idiudio wẹn, ineki re ekuakua wẹn,
kugbe ihwo rẹ ofovwi wẹn re hẹ evun wẹn ejobi,
kugbe otu wẹn ejobi
re hẹ uherevie wẹn,
de divwi vwẹ uherevie rẹ abadi
vwẹ ẹdẹ rẹ oghwọrọ wẹn na.
28Vwẹ umri rẹ unuebo rẹ ihwo ri mueghuvwu wẹn
orhoma rẹ orho yena ejobi de mu kpogho,
29ayen ejobi re yọnrọn uvi
de wo nẹ evun rẹ ekpo rayen rhe.
Eguokọ kugbe imueghuvwu ejobi re hẹ abadi na de re mudia erhuru
30ayen da teye ugoroviẹ kẹ wẹ,
ayen da viẹ oviẹ ro muenu.
Ayen da ghwẹ iwurhie ku iyovwi rayen
ayen de bruoma phihọ iwurhie.
31Ayen de gbe oma rayen akpan fiki wẹ,
ayen de rhuo emwa rẹ uvweri,
ayen da viẹ kẹ wẹ oviẹ rọ yara korokoro,
vẹ oma emuophihọ rode.
32Vwẹ oma ebere rayen ayen da teye ugoroviẹ kẹ wẹ,
ayen da viẹ wẹ:
Ono a guọghọre kerẹ Taya dẹvure
vwẹ uherevie rẹ abadi?
33Ọke rẹ ekuakua wẹn de ne obo abadi rhe,
ku wọ vọn ihwo buebu evun;
vẹ efe wẹn buebu kugbe oghwaeki wẹn
keye wo che vwo fe ivie rẹ akpọ na.
34Asakiephana e shu we phihọ oma rẹ abadi re,
vwẹ evun rẹ ame okokodo;
oghwaeki wẹn vẹ eguokọ wẹn vẹ owẹ divwi kugbe.
35Ofu wẹ dje ihwo ejobi re dia obo erhuru na;
uguegue ro ivie rayen ejobi oma,
opharo rayen ki kpighwọ
36Ineki re hẹ ohri rayen ra fiunu kẹ wẹ;
wo rhi te oba ro muoshọ
wọ gbe cha dia rhiri bẹdẹ ọfa-a.
Currently Selected:
Izikiẹl 27: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
