Ẹyano 33

Urhi re vwo mu oyan

1Ọrovwohwo da ta kẹ Mosis, Vrẹn nẹ etinẹ kpo obenu wẹ vẹ ihwo re wọ reyọ nẹ otọ rẹ Ijipt rhe na, vwo kpotọ ri mi ve kẹ Ebraham, Aizik, vi Jekọp, tanẹ, wẹ vẹ uvwiẹ wẹn ọye me vwe rọ kẹ. 2Ki mi ji amakashe ka obaro kẹ wẹ, ke Me djẹ ihwo ri Kenan, ihwo rẹ Amor, ihwo ri Het, ihwo ri Pẹriz, vẹ ihwo ri Hiv, kugbe ihwo ri Jebus. 3Yanran kpo otọ rẹ ọ djẹ ọkẹre rẹ ame rẹ ivie vẹ ọnyọn; ẹkẹvuọvo mi che nene ovwan ra-a, mi de rhe hwe ovwan vwẹ idjerhe, kidie ovwan ihwo vẹ udu ọgangan. 4Ọke rẹ ihwo na vwo nyo iyẹnrẹn ọbrabra nana, ayen de muoma phihọ, ohwo ọvuọvo gbe ghwẹ ekuakua rẹ osẹvwe rọye phihọ-ọ. 5Kidie Ọrovwohwo ta kẹ Mosis nẹ, Ta kẹ ihwo rẹ Izrẹl na, Ovwan ihwo vẹ udu ọgangan; Me da ro usun rẹ ovwan vwẹ ọmọke, Mi hwe ovwan. Fikirẹ ọtiọye na wa gba ghwẹ ekuakua rẹ osẹvwe rẹ ovwan nu, rere me vwo riẹn obo re me vẹ ovwan ru. 6Ọtiọye na ihwo rẹ Izrẹl da ghwiẹ ekuakua rẹ osẹvwe rayen nu, nẹ ugbenu rẹ Horẹb yanran.

Utughẹ ra da Vwa Oma

7Asakiephana Mosis da reyọ utughẹ na ọ me bọn phihọ otafe rẹ erhọn na, osheri kẹ erhọn na; o de se nẹ utughẹ ra da vwa oma. Kohwo kohwo rọ guọnọ Ọrovwohwo ejobi ko kpo obo utughẹ ra da vwa oma na, rọ hẹ obo otafe rẹ erhọn na. 8Ọke ri Mosis de kpo obo utughẹ na, kohwo kohwo ejobi mi vrẹn mudia, ohwo ọvuọvo mi mudia anurhoro rẹ utughẹ rọye, o mi ni Mosis, bẹsiẹ rọ vwọ ro evun rẹ utughẹ na. 9Ọke ri Mosis da ro evun rẹ utughẹ na, osunsun rẹ egho na mi won rhe ri mudia anurhoro rẹ utughẹ na, Ọrovwohwo mi nene Mosis ta ota. 10Ọke rẹ ihwo na ejobi da mrẹ osunsun rẹ egho na ro mudia anurhoro rẹ utughẹ na, ihwo na ejobi mi vrẹn mudia ayen me ga, ohwo ọvuọvo vwẹ anurhoro rẹ utughẹ rọye. 11Enẹ kọye Ọrovwohwo nene Mosis ta ota hirhe aro ku aro, kerẹsiẹ rẹ ohwo a da ta ota kẹ ugbeyan rọye. Ọke ri Mosis de kuoma rhẹriẹ rhe evun rẹ erhọn na, odibo rọye Joshua rẹ ọmọ rẹ Nun, emeghele rẹ ọshare na rha jẹn owọ nẹ utughẹ na-a.

Ọrovwohwo veri nẹ Opharo Rọye nene Ayen

12Mosis da ta kẹ Ọrovwohwo, Nighe wọ ta kẹ vwẹ nẹ, Reyọ ihwo nana rhe obenu, ẹkẹvuọvo wo ji rhi ju vwe riẹn ohwo ru wo ji nene uvwe-e. Yẹ wọ tare nẹ, Me riẹn odẹ wẹn, nẹ wọ je mrẹ aroesiri mẹ nure. 13Asakiephana, me rẹ wẹ, ọ da dianẹ me mrẹ aroesiri wẹn, gbe dje idjerhe wẹn kẹ vwẹ rere me vwọ riẹn wẹ re me vwọ mrẹ aroesiri wẹn. Roro mrẹ tanẹ, ẹgborho nana ihwo wẹn. 14Etiyin ọ da ta, Ekpuyovwi mẹ nene uwe ra, ke me kẹ wẹ urovwoma. 15Ọ da ta kẹ, O da dianẹ ekpuyovwi wẹn nene uvwe-e, wọ rha rọye avwanre nẹ etinẹ yanra-an. 16Kemavo e ru riẹn nẹ Me mrẹ ẹruesiri wẹn, Mẹvwẹ vẹ ihwo wẹn na? Ọ dianẹ enene ri wo nene avwanre ra, rere avwanre vwọ fẹnẹ, Mẹvwẹ vẹ ihwo wẹn, nẹ ihwo ejobi re akpọ na?

17Etiyin Ọrovwohwo da ta kẹ Mosis, Emu nana re wọ tare na Mi ruo; kidie wọ mrẹ ẹruesiri vwẹ obọ mẹ, Me riẹn odẹ wẹn. 18Mosis da ta, Me rẹ wẹ, dje urinrin wẹn kẹ vwẹ. 19Ọ da ta, Mi ru rere erhuvwu mẹ ejobi ka obaro kẹ wẹ, ki mi ghwoghwo odẹ mẹ, Ọrovwohwo na, vwẹ obaro wẹ, ki mi nẹ aruẹdọ kẹ ihwo ri mi nẹ aruẹdọ rọye, ke me re ehrọre kẹ ihwo re me re ehrọre rọye. 20Ẹkẹvuọvo ọ da ta, Wọ sa mrẹ opharo mẹ-ẹ; kidie ohwo sa mrẹ vwẹ rọ da rho-ọ. 21Ọrovwohwo da ta, Nighe, asan ọvo bi kẹrẹ ovwẹ ri wo se mudia vwẹ enu rẹ oragha na; 22ọke rẹ urinrin mẹ da wan vrẹn ki mi phi we phihọ unu rẹ oragha na, ke me vwẹ obọ mẹ rhurhu uwe bẹsiẹ re me vwọ wanvrẹn; 23ki mi si obọ mẹ nu, ọke yena ke wọ mrẹ uko mẹ, ẹkẹvuọvo opharo mẹ wọ sa mrẹ-ẹ.

Currently Selected:

Ẹyano 33: UBV77

Highlight

Copy

Compare