Ẹyano 14
14
Ẹsamuo rẹ Abadi Ọvwavware na
1Etiyin Ọrovwohwo da ta kẹ Mosis, 2Ta kẹ ihwo rẹ Izrẹl rere ayen rhẹriẹ oma re ayen won phihọ obaro ri Pihahirọt, vwẹ uvwre ri Migdọl vẹ abadi na vwẹ obaro ri Balzefọn; we mi mu erhọn phihọ obaro rọye, vwẹ oma rẹ abadi na. 3Kidie Fero cha ta kpahe emọ rẹ Izrẹl na, Ayen gba phihọ vwẹ otọ na; aton na bru ayen dje. 4Ki mi ru udu ri Fero gan, kọ cha vwọ tua ayen ki mi che vwo urinrin vwẹ enu ri Fero vẹ urogho rọye; ihwo rẹ Ijipt na ke cha riẹn nẹ Mẹvwẹ Ọrovwohwo na. Ayen de ru ọtiọye.
5Ọke ra vwọ ta kẹ ovie rẹ Ijipt nẹ ihwo na djẹre, udu ri Fero vẹ idibo rọye de kurhẹriẹ kpahe ihwo na, ayen da ta, ọnana kidie avwanre ruru na, rẹ avwanre vwo siobọ nẹ Izrẹl kpo nẹ ọ gbe ga avwanre-e? 6Ọtiọye na ọ da rhuẹrẹ akpẹrẹ rẹ ofovwi rọye phihọ otọ ọ da rọye unuofovwi rọye kẹrẹ oma, 7ọ da sanọ akpẹrẹ rẹ ofovwi ujorin esan, kugbe akpẹrẹ rẹ ofovwi efa rẹ Ijipt vẹ ilori ro vwo mu vwẹ enu rẹ ayen. 8Ọrovwohwo de ru udu ri Fero ovie rẹ Ijipt gan ọ da vwọ tua ihwo rẹ Izrẹl na rẹ ayen vwọ yanran vẹ udu gbae. 9Ihwo rẹ Ijipt na da vwọ tua ayen, iyesi ri Fero ejobi vẹ akpẹrẹ rọye vẹ ihwo re gua iyesi rọye vẹ otuofovwi rọye, ayen da rhe yan mu ayen rẹ ayen vwo mu erhọn vwẹ oma rẹ abadi na, vwi Pihahirọt, vwẹ obaro ri Balzefọn. 10Ọke ri Fero vwo si kẹrẹ ayen re, ihwo rẹ Izrẹl da kpare ẹro rayen, nighe, ihwo rẹ Ijipt na ra vwọ tua ayen; oshọ rode de rhi mu ayen. Ihwo rẹ Izrẹl de kperi se Ọrovwohwo; 11ayen da ta kẹ Mosis, E jẹn ishi ẹmrẹ vwẹ Ijipt ọye wọ vwọ rọye avwanre rhi hwe vwẹ evun rẹ aton na? Die wo ru avwanre na, wọ vwọ rọye avwanre nẹ otọ rẹ Ijipt rhe? 12Ọnana dia obo rẹ avwanre ta kẹ wẹ vwẹ Ijipt na, Yan jẹ avwanrẹ vwo rere avwanre ga ihwo rẹ Ijipt na? Kidie ofori re avwanre ga ihwo rẹ Ijipt nọ ọ rẹ avwanre de ghwu phihọ aton na. 13Mosis da ta kẹ ihwo na, Wa djoshọ-ọ, we mudia gan, re wa mrẹ esivwo rẹ Ọrovwohwo na, ro che ru kẹ ovwan nonẹ na, kidie ihwo rẹ Ijipt re wa mrẹ nonẹ na, wa gbe cha mrẹ ayen ọfa-a. 14Ọrovwohwo na cha họnre kẹ wẹ, oma ọvo we hwemu. 15Ọrovwohwo da ta kẹ Mosis, Die wo vwo kpere se vwẹ? Ta kẹ ihwo rẹ Izrẹl rere ayen yan obaro. 16Kpare ọkpọ wẹn na kpenu, wọ riẹn obọ wẹn phihọ abadi na rere wọ gharọ, rere ihwo rẹ Izrẹl vwọ yan wan otọ ọyaya rẹ abadi na. 17Ki mi che ru udu rẹ ihwo rẹ Ijipt na gan, rere ayen ruọ nene ayen ki mi vwo urinrin vwẹ enu ri Fero vẹ urogho rọye, vwẹ enu rẹ akpẹrẹ rọye, vẹ ihwo re gua iyesi rọye. 18Ihwo rẹ Ijipt na ke cha riẹn nẹ Mẹvwẹ Ọrovwohwo, ọke mi de vwo urinrin vwẹ enu ri Fero, akpẹrẹ rọye, vẹ ihwo re gua iyesi rọye. 19Etiyin amakashe rẹ Ọghẹnẹ rọ ka obaro kẹ ihwo rẹ Izrẹl na de kpo obuko rayen; osunsun rẹ egho de nẹ obaro rayen rhi mudia obuko rayen, 20ọ da rhe uvwre rẹ ihwo rẹ Ijipt vẹ ọ rẹ Izrẹl. Kẹ etiyin osunsun na vẹ egho na epha, ason na da rhe wan vrẹn je ohwohwo si kẹrẹ ohwo vwẹ ason na-a.
21Mosis da riẹn obọ rọye phihọ abadi na; Ọrovwohwo da djẹ abadi na kpo uko vwẹ odju ọgangan ro dju nẹ obaro ọnre rhe vwẹ ason na ejobi, o de ru abadi na kpọ yamu, ame na da ghare. 22Ihwo rẹ Izrẹl da yan otọ ọyaya ruẹ evun rẹ abadi na, ame na de mu igbẹhẹ vwẹ obọrhe vẹ obọhwẹre rayen. 23Ihwo rẹ Ijipt na da vwọ tua ayen, ayen de nene ayen ro evun rẹ abadi na, iyesi ri Fero ejobi, akpẹre rọye, vẹ ihwo re gua iyesi rọye. 24Vwẹ ọke rẹ ohẹrhẹ rẹ irhiọke Ọrovwohwo da wan osunsun rẹ egho vẹ erhanre na ni ihwo rẹ Ijipt, o de phi ozighi phihọ urogho rẹ Ijipt na, 25adjugẹ rẹ akpẹrẹ rayen de bruro ibehre ọtiọye na kẹ ayen djẹ tẹgbẹ tẹgbẹ; ihwo rẹ Ijipt na da ta, E jẹn a djẹ nẹ oma rẹ ihwo rẹ Izrẹl na, kidie Ọrovwohwo yen họnra ihwo rẹ Ijipt kẹ ayen na.
26Etiyin Ọrovwohwo da ta kẹ Mosis, Riẹn obọ wẹn phihọ abadi na, rere ame na rhi rhurhu ihwo rẹ Ijipt na, te akpẹrẹ rayen, vẹ ihwo re gua iyesi rayen. 27Etiyin Mosis da riẹn obọ rọye phihọ abadi na, abadi na da djẹ kugbe vwẹ irhiọke, ihwo rẹ Ijipt na da djẹ ruọ, Ọrovwohwo da hra ihwo rẹ Ijipt na vwẹ evun rẹ abadi na. 28Ame na de hirhe o de rhurhu akpẹrẹ na vẹ ihwo re gua iyesi na vẹ urogho ri Fero ejobi ri nene ayen ro evun rẹ abadi na, ọvuọvo rọye chekọ-ọ. 29Ẹkẹvuọvo ihwo rẹ Izrẹl da wan otọ ọyaya vrẹn vwẹ abadi na, ame na da dia igbẹhẹ kẹ ayen vwẹ ẹbẹre nana te ẹbẹre yena.
30Enẹ Ọrovwohwo sivwi Izrẹl nẹ abọ rẹ ihwo rẹ Ijipt; Izrẹl da mrẹ ihwo rẹ Ijipt ri ghwuru vwẹ oma rẹ abadi na. 31Izrẹl da mrẹ iruo ride rẹ Ọrovwohwo ru kpahe ihwo rẹ Ijipt, ihwo na da djẹ oshọ rẹ Ọrovwohwo, ayen de se Ọrovwohwo vi Mosis rẹ odibo rọye gbuyota.
Currently Selected:
Ẹyano 14: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
