Daniẹl 10

Emramrẹ ri Daniẹl Kpahe Urhie ri Tigris

1Vwẹ ukpe rerha ri Sairọs ovie ri Pẹsha a da rhe vwẹ ota ọvo phia kẹ Daniẹl re se nẹ, Bẹlteshaza. Ota na da dia uyota, dede na ọ vẹ ọsẹghẹ rode. Ota na da ruọ o de jivwo ọhọ rẹ emramrẹ na.

2Vwẹ ẹdẹ yena Mẹvwẹ, ri Daniẹl de muomaphihọ kerẹ emu rẹ ẹdidjana erha. 3Me re obo rẹ miẹmiẹ-ẹ, eranvwe eyẹ udi te vwẹ unu-u, me vwẹ ori vwo ghworo oma mẹ kakaka-a, vwẹ ọsoso rẹ ẹdidjana erha. 4Vwẹ ẹdẹ uje gbẹ ẹne rẹ emeranvwe rẹsosuọ, ri mi vwo mudia vwẹ egbẹn rẹ urhie rode na, kọye Tigris, 5me da kpare ẹro, mi de ni, nighe, ohwo ọvo rọ vwẹ esada rhuo, ra vwẹ oro rẹ Ufaz vwọ mu ehu rọye. 6Oma rọye da họhọ oragha re se bẹri, ọpharọ rọye da họhọ enu rọ nyavwarọ, ibiẹro rọye epha ke rẹ elo rẹ utuerhanre. Abọ rọye vẹ awọ rọye họhọ ẹrovwo ra fare, edo rẹ ota rọye da họhọ edo rẹ urogho. 7Mẹvwẹ, ri Daniẹl, ọvo re mrẹ emramrẹ na, kidie ihwo re vẹ ovwẹ gba herọ sa mrẹ emramrẹ na-a, ẹkẹvuọvo kẹ ayen di muẹ phariẹ kpakpakpa, ayen da djẹ re si oma nu. 8Ọtiọye na kẹ mẹvwẹ ọvọ ro chekọ na re mrẹ emramrẹ rode na, ogangan ọvuọvo gbi rhe vwe-e, oma mẹ ro ruaro jovwo da rhẹriẹ miomiovwi, mi gbi vwo ogangan ọvuọvo-o. 9Etiyin mi de nyo umri rẹ ota rọye, ri mi vwọ nyo umri rẹ ota rọye re, mi de she bọvwo opharo rhuotọ mi de sheruo ovwerhẹ kokodo.

10Nighe, obọ ọvo de te vwẹ kọ nẹrhẹ ovwẹ phariẹ kpakpakpa vwẹ abọ mẹ vẹ igbo mẹ. 11Ọ da ta kẹ vwẹ, E Daniẹl, ohwo re vwo ẹguọnọ kẹ gangan, kerhọn rẹ ota re me ta kẹ wẹ na, mudia kpoma vi, kidie asakiephana e ji vwẹ bru we rhe. Rọ vwọ ta ota nana kẹ vwẹ re, mi de vrẹn mudia ke me phariẹ. 12Etiyin ọ da ta kẹ vwẹ wọ djẹ ọshọ-ọ, Daniẹl, kidie rhanvwẹ ẹdẹ rẹsosuọ ru wọ vwọ vwẹ udu kpahe otọ vwọ kẹ ẹruọ rẹ ọta na wọ ke rha vwẹ oma kpotọ vwẹ obaro rẹ Ọghẹnẹ wẹn na, eta wẹn enyo ayen, ke me rhere fiki rẹ eta wẹn na. 13Osun rẹ uvie ri Pẹsha de mukpahe ovwẹ ẹdẹ uje gbẹ ọvo, ẹkẹvuọvo Maikẹl, ọvo vwẹ usun rẹ isun na, da rhe cha vwẹ uko, ọtiọye re me da yan jovwo vẹ osun ri Pẹsha na. 14Me da rhe rere wo vwo vwo ọhọ rẹ obo rẹ cha phia kẹ ihwo wẹn vwẹ ẹdẹ rọ ka oba na. Kidie emramrẹ na vwonẹ ọ herọ vwọ kẹ ẹdẹ rọ cha vwẹ obaro. 15Ọke rọ vwọ vuẹ vwẹ kpahe eta nana nu, mi de hirhe opharo mẹ kuotọ unu mẹ de di. 16Nighe, ohwo ọvo rọ họhọ emọ rẹ ihwo da vwẹ obọ te ẹbẹrumu mẹ, etiyin unu mẹ de rhie, mẹ da vwọ ta ọta. Me da ta ota kẹ ohwo ro mudia vwẹ obaro mẹ, E Ọrovwohwo, fiki rẹ emramrẹ na oma kọ miavwẹ ovwẹ, ogangan gbi rhe vwe-e. 17Komavọ mẹvwẹ rẹ odibo rẹ Ọrovwovwe ru ta ota kẹ Orovwovwe? Kidie asakiephana ogangan gbi rhe vwe-e, ẹnwẹn gbi ji chekọ vwẹ evun mẹ-ẹ.

18Ofa, ọvo ro vwo urhoma kere ohwo da vwẹ obọ te vwe ọ da kẹ vwẹ ogangan. 19Etiyin ọ da ta, E ohwo ra nabọ guọnọ wo jẹ oshọ mu we-e, ufuoma vẹ owẹ dia; goma re wo yivwaro. Ọke rọ vwọ ta ota kẹ vwẹ re, mi de rhi vwo ogangan me da ta, Jẹn Ọrovwovwe ta ota, kidie wọ nẹrhẹ ovwẹ vwo ogangan nure. 20Etiyin ọ da ta wọ riẹn obo ri mi vwo bru we rhe? Ẹkẹvuọvo asakiephana mi che rhivwi ra họnre osun ri Pẹsha, Me vọye de ru nu, nighe, osun ri Grik cha rhe. 21Ẹkẹvuọvo me cha vuẹ wẹ obo re si phihọ ẹbe rẹ uyota o vwo ohwo ọvuọvo ro che none uvwe họnre jokpa ri Maikẹl osun wẹn.

Currently Selected:

Daniẹl 10: UBV77

Highlight

Copy