Matiu 3
3
Jo̩n ki ache baptism
1Oñ adiko le̩ Jo̩n, kʼi ache baptism, lewa atakoya ef ajetachi ane̩ Judia. 2I kakini, Me̩ ribeda, todu ojane̩ e-efojale me̩rʼo̩wo̩ me̩. 3Todu owñ le̩ chʼe̩ne̩ ku ma kʼo̩la-wñ lef Aizaya akache̩, kakini,
Omuko̩la e̩ne̩ kʼi akwa ef aje̩tachi kakini,
Me̩ fʼo̩na Ondu ñwo̩che,
me̩ chʼo̩kpa o̩na-wñ tʼokpolo.
4Oñ e̩wñ ki Jo̩n le̩ ko bʼo̩la ma, ma nʼedudu inyakulumi hi, i la dʼaño̩ lʼago-wñ de; e̩wñ kʼi aje̩ chʼakubaliba kpʼiño̩ oko. 5E̩gbale̩ abo Je̩rusale̩m kpʼabo Judia kpʼabo kʼi dab ohimini Jo̩rdan jo̩ chaka kwodufu nyʼugbo-wñ. 6Oñ i nache ma baptism ef ohimini Jo̩rdan abu ku ma jʼagbalu adure-ma.
7Ama abu kʼi li ka kʼabo Farisi kpʼabo Sadiusi wewe awʼugbo baptism le̩, i ka ñwu ma kakini, Ame̩, amato̩ olijo! E̩ne̩ juka ñwu me̩ ku me̩ ra bʼuwe̩do̩ kʼi ache kʼi wa te̩? 8Todule̩ ame̩ ki rʼe̩ro kʼi chʼeju ibe erida. 9Me̩ ki we eka ef ume̩ kakini, Ata-wa kʼa ne̩ chʼEbraham; todu eka naka ñwu me̩-i, kakini, O̩jo̩ neke kʼamo̩ma kwane̩ ñwu Ebraham kwef okuta ki jo̩-i. 10O̩kanyi tʼane̩pe̩te̩ ugbo ili oli ki jo̩-i me̩; oñ ma alʼoli du kʼi ma rʼe̩ro o̩me̩me̩le̩ n wane̩ ku ma ko rikpolo tʼef una.
11Omi ache me̩ baptism ef omiofo tef ibe erida, mana. Iñmi E̩ne̩ ki muda dʼubi-mi awa chetʼe-mi le, u bebʼe̩da e̩re̩-wñ jo̩ kʼu nane̩ n. Owñ le̩ ache me̩ baptism ef Afu Kiafo̩ kpʼuna. 12O̩fe̩fe̩ ufo̩ka-wñ dʼef o̩wo̩-wñ me̩, i la ache kʼajita ugwo̩ka-wñ ki fe̩ hiolo. Tak i ayʼo̩ka-wñ nyʼaka; i muda anʼuna ki ma jʼalu n gu igbogbo-wñ jo.
Jo̩n che Jisus baptism
13E̩gbale̩ Jisus kwo Galili lewa eti Jo̩rdan ugbo Jo̩n kʼi chʼo baptism. 14Jo̩n muda che kʼi kpo̩na nyʼu, i kakini, Omi kʼeku aku mi kʼuwe̩ ki che mi baptism, uwe̩ ñʼawʼugbo mi? 15Ama Jisus dohi ñw u kakini, E̩ je̩ abe̩le̩ ta; todu abe̩le̩ i cheju-wñ kʼa fʼe̩wñ o̩kpakpa du chekpa. Tak i je̩. 16Oñ abu kʼi fʼiJisus che baptism, ababale̩ i mute̩gu kwef omi; me̩ la go, efojale muchite̩, oñ i li Afu O̩jo̩ abu kʼi agwo̩ru awa dab ikede, kʼi la awʼoji-wñ. 17Me̩ la go, omuko̩laʼka ka kwʼefojale kakini, Owñ-i chʼO̩ma ufe̩do̩-mi e-kʼu fʼuyo̩-mi li ef uwñ.
Currently Selected:
Matiu 3: IGL70
Highlight
Share
Compare
Copy
Want to have your highlights saved across all your devices? Sign up or sign in
O̩TAKADA O̩LA O̩JO̩ Bible in Igala © United Bible Societies, 1970.
