HAGEO 1
1
Diospac huasita ruhuachun mandashcamanta
1Jatun mandac Darío ishcai huata, sucta quilla, shuc punzhata mandacucpimi, Mandac Diosca pai ima nishcata huillac Hageota Salatielpac churi Judá llactata mandac Zorobabelman, Josadacpac churi curacunata mandac Josueman huillachirca. Chashna huillachishpaca: 2«Tucuita Mandac Diosca: Cai gentecunaca: “Mandac Diospac huasita cutin ruhuana punzhacunaca manarac chayamunchu” nincunami» nirca.
3Chaimanta Mandac Dios pai ima nishcata huillac Hageota huillachishpaca: 4«¿Ñuca huasi llaquinayaita siricucpipish, cancuna sumac huasicunapi causana punzhachu shamushca? 5Cancuna ima shina causacushcata alli yuyarichic. Tucuita Mandac Dios ñucami nini: 6Cancunaca achcata tarpushpapish, ashallatami japinguichic. Micushpapish mana sacsanguichicchu. Yacuta ubiashpapish, yacunayaita mana pasachinguichicchu. Churarishpapish, mana cunuringuichicchu. Cullquimanta trabajac runaca lliqui mochilapimi cullquita huacaichin.
7Cancuna ima shina causacushcata alli yuyarichic. 8Urcumanta caspicunata apamushpa, ñuca huasita cutin shayachichic. Chashna ruhuacpimi, yallita cushicushpa, alli nishcapish casha. Chaitaca tucuita Mandac Dios ñucami nini. 9Cancunaca achcata cosechanata munashpapish, ashallatami japinguichic. Cancunapac huasicunapi huacaichishcataca pucushpami tucui chingachisha. ¿Imamantatac chashna ruhuasha? Chaica, ñuca huasi llaquinayaita siricucpipish, cancunapac huasicunatarac sumacta allichishcamantami chashna ruhuasha. 10Cancuna chashna ruhuashcamantami jahua pachapish tamyata mana ashtahuan cacharca. Allpapipish mana ashtahuan pucurcachu. 11Ñucami cai llactapica mana tamyachircani. Ñucami urcunamanpish, chagramanpish usyai punzhacunata cacharcani. Chaimantami trigopish, vinopish, aceitepish, tarpuna allpapish, gentecunapish, animalcunapish, gentecuna trabajashcacunapish tucui chingachirca» ninmi.
12Shina nicpimi, Salatielpac churi Zorobabelpish, Josadacpac churi curacunata mandac Josuepish, saquirishca gentecunapish Mandac Dios rimashcata uyarca. Chashnami Dios ima nishcata huillac Hageo huillashcata uyashpa, Mandac Diospac ñaupapi yallita mancharirca. 13Chaimantami Dios ima nishcata huillac Hageo gentecunaman huillashpaca: Mandac Diosca: «Cancunahuanmi cani» ninmi nirca. 14Mandac Diosmi Salatielpac churi Judá llactata mandac Zorobabelpac yuyaitapish, Josadacpac churi curacunata mandac Josuepac yuyaitapish, caishuc saquirishca gentecunapac yuyaitapish pascarca. Chaimantami tucuita Mandac Diospac huasitaca allichi callarirca. 15Chaitaca jatun mandac Darío ishcai huata, sucta quilla, ishcai chunga chuscu punzhata mandacucpimi, allichic callarirca.
Currently Selected:
HAGEO 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.