ZACARÍAS 1
1
Mandac Diospacman cutirinamanta
1Jatun mandac Darío Persia llactata ishcai huata, pusac quillata mandacucpi, Mandac Dios Berequiaspac churi, Iddopac nieto Zacariasman huillashpaca:
2«Mandac Dios ñucaca cancunapac ñaupa taitacunahuanmi yallita piñarircani. 3Chaimantami:
Tucuita Mandac Diosca:
Ñucapacman cutimuichic.
Ñucapish cancunapacman cutishami.
4Ama cancunapac ñaupa taitacuna shina causaichicchu. Paicunaman ñuca ima nishcata utcapi huillachishpaca: “Mandac Diosca: Mana alli ñanta catinata, mana allita ruhuanacunata saquichic” nishpami huillarcani. Shina huillacpipish, mana cazushpa, ñucamanta huillashcata mana uyasha nircanguichicchu.
5¿Maipitac cancunapac
ñaupa taitacunaca?
Ñuca ima nishcata huillaccunaca,
¿huiñaitachu causanga?
6Ashtahuanpish ñuca
rimashcacunata,
ñuca mandashcacunata,
ñuca ima nishcata huillac
ñucata serviccuna huillachishcaca,
¿manachu cancunapac ñaupa
taita causacui
punzhacunapi pactarca?
Chaimantami paicuna ñucapacman cutimushpaca: “Mandac Diosca mana alli ñancunapi ñucanchic purishca shinallatac, mana allita ruhuashca shinallatacmi llaquichinata yuyarirca. Paica ñucanchictaca chashnallatacmi ruhuarca” nircacuna nishpa huillai» nirca.
Caballocunata muscuipi shina ricushcamanta
7Jatun mandac Darío ishcai huata, chunga shuc quillata mandacucpi, Sebat nishca quilla ishcai chunga chuscu punzhapimi Mandac Dios muscuipi shina rimarca. Ñucaca Berequiaspac churi, Iddopac nieto, Dios ima nishcata huillac Zacariasmi cani. 8Tutami shuc runa puca caballopi montashca pugru pambapi tiyac arrayán yuracuna chaupipi shayacucta ricurcani. Chai montashcapac huashapica puca, bayu, yurac caballocunami shayacurca. 9Chaita ricushpami ñucaca:
—Ñuca amolla, ¿imatac caicunaca?— nircani.
Shina nicpimi, ñucahuan rimac angelca:
—Ñucami caicuna ima cactaca ricuchisha— nirca.
10Shina nicpimi, arrayán yuracuna chaupipi shayacuc runaca:
—Caicunaca Mandac Dios cai pachata muyuchun cachashcacunami— nirca.
11Shina nicpimi, paicunaca arrayán yuracuna chaupipi shayacuc Mandac Diospac angeltaca:
—Ñucanchicca ñami cai pachata muyumunchic. Tucui cai pachami cushilla sumacta causacun— nirca.
12Shina nicpimi, Mandac Diospac angelca:
—Tucuita Mandac Dioslla, Jerusalenpi, Judá llacta pueblocunapi causaccunahuanca canchis chunga huatacunatami piñashca cangui. ¿Ima horascamantac mana llaquishpa piñacunguilla?— nirca.
13Shina nicpimi, Mandac Diosca ñucahuan parlacuc angeltaca cushichic sumac rimaicunata rimarca. 14Chaimantami ñucahuan parlacuc angelca: «Mandac Diosca:
“Jerusalentapish,
Sión urcutapish
ñucapaclla cachunmi munarcani.
15Chaimantami chai imatapish
mana yuyaric llactacunahuanca
piñashca cani.
Paicunaca ñuca ashallata
piñashca cacpica, ashtahuanmi
mana allita ruhuarca.
16Chaimantami Mandac Dios
ñucaca Jerusalentaca
cutinllatac llaquichisha.
Chaipimi ñuca huasitaca
shayachinga.
Jerusalenpimi plomadata churanga.
Chaitaca tucuita Mandac Dios
ñucami nini” ninmi.
17Shinallatac angeltaca:
“Tucuita Mandac Diosca:
Ñuca acllashca llactacunaca
achca allicunatami charinga.
Cutinllatacmi Sión urcutaca
cushichisha.
Cutinmi Jerusalentaca
acllashami” nishpa,
caparishpa huillai» nirca.
Gachucunamantapish, carpinterocunamantapish
18Chai quipaca huichai ricushpaca, chuscu gachucunatami ricurcani. 19Chaita ricushpami, ñucahuan parlac angeltaca:
—¿Imatac chaicunaca?— nircani.
Shina nicpimi, chai angelca:
—Chaicunaca Judá llactapi causaccunatapish, israelcunatapish, Jerusalenpi causaccunatapish caiman, chaiman shic-huashpa cachac gachucunami— nirca.
20Chai quipaca chuscu carpinterocunatami Mandac Diosca ricuchirca. 21Chaita tapushpami ñucaca:
—Cai runacunaca, ¿imatac ruhuangapac shamun?— nircani.
Shina nicpimi, chai angelca:
—Ñaca ricushca gachucunaca Judá llactapi causaccunataca caiman, chaiman shic-huashpa cacharcami. Chashna ruhuacpica, pipish mana umata alzarcachu. Ashtahuanpish cai carpinterocunaca llactacunapi tiyac chai gachucunata chucchuchishpa, urmachingapacmi shamucun. Judá llactapi causaccunata caiman, chaiman shic-huashpa cachangapacmi gachuta alzarca— nirca.
Currently Selected:
ZACARÍAS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.