MATEO 3
3
Shitashca pambapi Bautizac Juan huillashcamanta
(Mr 1.1-8; Lc 3.1-9,15-17; Jn 1.19-28)
1Chai punzhacunami Bautizac Juan Judea llacta shitashca pambapi, 2huillashpaca: «Diosca ñami mandagrin. Chaimanta juchata ruhuanata saquishpa, Diosman cutirichic» nirca. 3Juanmanta Dios ima nishcata huillac Isaías huillashpaca:
«Shitashca pambapi
shuc runa caparishpaca:
“Quishpichic shamuna ñanta allichichic,
quingu ñancunatapish derechaichic”
nicunmi» nirca.
4Juanca camello millmamanta ruhuashca churanatami churashca, cara chumbihuanmi chumbillishcami carca. Paica langostacunata, shinallatac abeja mishquitami micuc carca. 5Paipacmanca Jerusalén pueblomantapish, Judea llactacunamantapish, Jordán yacu cuchulla llactacunamantapishmi shamuc carca. 6Paicunataca llaquirishpa juchacunata huillacpimi, Juanca bautizac carca.
7Achca fariseocunapish, saduceocunapish bautizaringapac shamucpimi Juanca: «¡Culebra shina gentecuna! Dios cachashca llaquimanta quishpirinataca, ¿pitac huillarcayari? 8Llaquirishpa Diosman cutirishca cashcata ricuchingapacca, alli pucuc grano shina, allita ruhuashpa ricuchichicyari. 9Ama cancunapac shungupi: “Ñucanchicca Abrahampac huahua huahuacuna cashcamantaca quishpirishunllami” nishpa, ama yuyacuichicchu. Ashtahuanpish ñucaca: Diosca cai rumicunatapish Abrahampac huahua huahuacunata ruhuanmanllami. 10Hachaca ñami yura chaquipi churashca. Diosca tucui mana pucuc yurataca, sapipi pitishpami ninapi rupachinga.
11Ñucaca llaquirishpa, Diosman cutirichunmi, yacuhuan bautizacuni, ashtahuanpish ñucapac quipa shamucmi, Diospac Espirituhuan, ninahuan bautizanga. Paica ñucata atishpa, ashtahuan poderyucmi. Ñucaca paipac ushutallatapish mana apaipacchu cani. 12Paica huairachinahuanmi trigota tamomanta chicanyachic shina ñalla chicanyachinga. Granotaca huacaichinapimi huacaichinga. Cutin tamotaca jaicapi mana huañuc ninapimi rupachinga» nirca.
Jesús bautizarishcamanta
(Mr 1.9-11; Lc 3.21-22)
13Jesusca Juan bautizachunmi, Galilea llactamanta Jordán yacuman rirca. 14Juanca Jesusta mana bautizangaraicumi:
—¿Imapactac shamungui? Ashtahuanpish canmi ñucata bautizana cangui— nirca.
15Shina nicpimi Jesusca:
—Cunanca bautizailla. Ñucanchicca Dios mandashcatami pactachina canchic— nicpimi, Juanca bautizarca.
16Jesús bautizarishpa, yacumanta llucshishpaca, jahua pacha pascarictapish, Diospac Espíritu paloma shina shamushpa paipac jahuapi tiyarictami ricurca. 17Jahua pachamanta rimashpaca: «Caimi ñuca cuyashca Churica. Paillami ñucataca cushichin» nishcami uyarirca.
Currently Selected:
MATEO 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.