MATEO 25
25
Jesús chunga solteracunamanta parlashcamanta
1Jahua pacha Dios mandacucca, chunga solteracuna lamparata japichishpa, noviohuan tupangapac llucshic shinami. 2Paicunamanta pichcacunaca allichirishca, alli yuyaiyucmi carca. Cutin caishuc pichcacunaca mana allichirishca, mana alli yuyaiyucchu carca. 3Chai mana alli yuyaiyuccunaca lamparata apashpapish, aceitetaca mana aparcachu. 4Ashtahuanpish caishuc pichcacunaca alli yuyaiyuc cashpami, lamparatapish, tucuricpi churana aceitetapish aparca.
5Novio mana utca shamucpica, tucui paicunami sueñurca. 6Chashna sueñucucpimi, chaupi tutataca: “¡Ñami novio shamun, tupangapac llucshichic!” nishca uyarirca. 7Chaita uyashpami, chunga solteracunaca jatarishpa, lamparata allichi callarirca. 8Shinami chai mana alli yuyaiyuc solteracunaca chai alli yuyaiyuc solteracunataca: “Ñucanchic lamparacunaca ñami huañugrin. Asha aceiteta convidaichic” nirca. 9Shina nicpimi, chai alli yuyaiyuc solteracunaca: “Ñucanchicmanpish, cancunamanpish faltangami. Catuccunapacman rishpa, cancunallatac randigrichic” nirca.
10Chai pichca solteracuna randingapac ricpica, ñami novioca chayamurca. Chashna chayamucpimi, pichca allichirishca solteracunaca noviohuan boda huasiman yaicushpa, punguta huichcarca. 11Chai quipa, caishuc pichca solteracuna chayamushpaca: “Amito, punguta pascai” nirca. 12Chashna cayacpi, novioca: “Mana ricsinichu” nircami. 13Chai shinallatac Runa Tucungapac shamushca ñuca ima punzha, ima horas cutimunata mana yachashcamanta allichirishpa shuyacuichic.
Chunga cullquimanta Jesús chimbapurashpa parlashcamanta
(Lc 19.11-27)
14Jahua pacha Dios mandacucca, shuc amo caru llactaman ringapac paipac serviccunata cayashpa, cullquita saquic shinami. 15Serviccuna imata ruhuaipacta ricushpami, shucmanca pichca talento cullquita, shucmanca ishcai talento cullquita, shucmanca shuc talento cullquita cushpa rirca. 16Chai pichca talento cullquita japicca chai cullquihuanca randishpa catushpami, pichca talento cullquihuan mirachirca. 17Ishcai talento cullquita japicpish, chai shinallatacmi mirachirca. 18Ashtahuanpish shuc talento cullquita japicca amo saquishca cullquitaca allpata jutcushpami pacarca.
19Chai amo tauca huatacuna quipa cutimushpaca, paipac serviccuna mashna cullquita mirachishcatami tapurca. 20Pichca talento cullquita japic runa chayashpaca: “Amito, canca pichca talento cullquitami saquircangui, pichca talento cullquihuanmi mirachircani” nirca. 21Chashna nicpimi amoca: “Allitami ruhuashcangui. Ashallapipish allita ruhuashcamantaca, achcatami canmanca mingasha. Cunanca ñucahuan cushicungapac ucuman yaicui” nirca.
22Ishcai talento cullquita japic runa chayashpaca: “Amito, canca ishcai talento cullquitami saquircangui, ishcai talento cullquihuanmi mirachircani” nirca. 23Chashna nicpimi amoca: “Allimi, canca allita ruhuac, cazuc servicmi cangui. Ashallapipish allita ruhuashcamantaca, achcatami canmanca cusha. Cunanca ñucahuan cushicungapac ucuman yaicui” nirca.
24Shuc talento cullquita japic runa chayashpaca: “Amito, canca piñami cangui. Manapish cushpa chasquiclla, manapish tarpushpa cosechaclla cashcata yachanimi. 25Chaimantami can saquishca cullquitaca allpapi huacaichircani. Caipimi, cambac cullquica” nirca. 26Shina nicpimi amoca: “¡Canca, mana valic, quilla servicmi cangui! Ñuca manapish tarpushpa cosechac, manapish cushpa chasquic cashcataca yacharcanguimi. 27Chaimanta cullquitaca bancopi churashpa mirachinami carcangui. Ñuca cutishpaca, saquishca cullquitapish, interestapish japimanmi carcani” nirca. 28Shina nishpami caishuc serviccunataca: “Chai cullquita quichushpa, chunga cullquita charic runaman cuichic. 29Achcata charicmanmi, ashtahuan cushca canga. Chaimantami ashtahuan charinga. Cutin mana charicmantaca, ashalla charishcatapish quichushcami canga. 30Cai mana valic servictaca canzhaman llucchishpa purapi shitaichic. Chaipica huacaihuanmi quiru caniringa” nirca.
Llactacunata taripanamanta
31Runa Tucungapac shamushca ñuca sumaimana achic nicuc-huan achicyachishpa, tucui angelcunahuan shamushpaca, jatun mandac tiyarinapimi tiyarisha. 32Chaipimi tucui llacta gentecuna ñucapac ñaupaman shamushpa tandaringa. Chashna tandaricpimi, paicunataca shuc michic ovejacunata chivocunamanta chicanyachic shina chicanyachisha. 33Ovejacunataca ñuca alli maquimanmi churasha. Cutin chivocunataca lluqui maquimanmi churasha. 34Ñuca alli maquiman caccunataca: “Ñuca Taita alli nishcacuna, ñucahuan mandangapac shamuichic. Cai mandanataca Diosmi cai pacha callari punzhamanta, cancunaman cungapac allichishpa charicushca. 35Ñuca yarcaihuan cacpica, cararcanguichicmi. Yacunayaihuan cacpipish, ubiachircanguichicmi. Samarinata mana charicpipish, pozachircanguichicmi. 36Churana illac cacpipish, churachircanguichicmi. Ungushca cacpipish, carcelpi cacpipish, ricuc shamurcanguichicmi” nishami. 37Shina nicpica, cashcata ruhuaccunaca: “Apunchic Jesús, ¿maipitac yarcaihuan cacpi cararcanchic, yacunayaihuan cacpi ubiachircanchic? 38¿Maipitac mana samarinata charicpi pozachircanchic, churana illaclla cacpi churachircanchic? 39¿Maipitac ungushca cacpi, carcelpi cacpi ricuc shamurcanchic?” ningacunami. 40Shina nicpimi ñucaca: “Cai uchilla ñuca huauquicunaman ruhuashpaca, ñucamanmi ruhuarcanguichic. Chaica chashnatacmi” nishami.
41Lluqui maquiman caccunataca: “Millaicuna, caimanta anchurichic. Diabloman, paita servic angelcunaman allichishca, mana huañuc ninapimi shitashca canguichic. 42Cancunaca ñuca yarcaihuan cacpipish, mana cararcanguichicchu. Yacunayaihuan cacpipish, mana ubiachircanguichicchu. 43Samarinata mana charicpipish, mana pozachircanguichicchu. Churana illac cacpipish, mana churachircanguichicchu. Ungushca cacpipish, carcelpi cacpipish, mana ricugrircanguichicchu” nishami. 44Chashna nicpimi paicunaca: “Apunchic Jesús, ¿ima horatac can yarcaihuan cacta, yacunayaihuan cacta, samarinata mana charicta, churana illacta, ungushca cacta, carcelpi cacta, imalla illacta ricushcanchic?” ningacunami. 45Shina nicpimi ñucaca: “Cai uchillacunaman mana ruhuashpaca, ñucamanmi mana ruhuarcanguichic. Chaica chashnatacmi” nishami. 46Paicunaca jaicapi mana tucuric, jatun llaquimanmi ringa. Ashtahuanpish cashcata ruhuaccunaca, huiñai causaimanmi ringa— nirca.
Currently Selected:
MATEO 25: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.