MATEO 24
24
Jesús Diosta mañana huasita urmachishcacanamanta huillashcamanta
(Mr 13.1-2; Lc 21.5-6)
1Jesusca Diosta mañana huasimantami llucshishpa ricurca. Chaipimi paipac yachacuccuna cuchuyashpa, Diosta mañana huasita ricuchirca. 2Chashna ricuchicpimi Jesusca:
—¿Tucui caicunallata ricushpachu mancharicunguichic? Caipica, shuc rumillapish mana saquiringachu, tucui urmachishcami canga. Chaica chashnatacmi tucunga— nirca.
Llaquicuna tiyanamanta
(Mr 13.13-23; Lc 21.7-24; 17.22-24)
3Olivos urcupi Jesús tiyaricpi, yachacuccuna cuchuyashpaca:
—¿Ima punzhatac can huillashcaca pactangayari? Can shamunatapish, cai pacha tucurinatapish, ¿imata ricushpatac yachashunyari?— nishpa, tapurcacuna.
4Chashna nicpimi Jesusca:
—Pacta pi cancunata pandachinman, cuidaringuichic. 5Taucacunami ñuca shutipi shamushpa: “Ñucami Quishpichic Cristoca cani” nishpa, achcacunata pandachinga. 6Cancunaca quiquin llactapipish, caru llactapipish jatun macanacuitami uyanguichicmi. Chaita uyashpapish, ama mancharinguichicchu. Chashna llaquicunaca tiyangallatacmi. Ashtahuanpish cai pachaca manarac tucuringachu. 7Llactacunapurapish, jatun mandaccunapurapishmi macanacunga. Maijan llactapica allpa chucchuipish, yarcaipish tiyangami. 8Chai llaquicunaca callari llaquicunallami canga.
9Chai punzhapica cancunata prezushpa mandaccunapacman apangami. Chashnami huañuchinga. Ñucata caticushcamantaca, tucui llactacunapimi piñanga.
10Chai punzhacunapica, taucacunami crinata saquishpa, caishuc chaishuc piñanacushpa prezuchinga. 11Tauca llullac huillaccuna shamushpami, achca gentecunata pandachinga. 12Chashna yallita millai miraricpimi, taucacuna cuyanatapish saquinga. 13Chaica, pipish tucuricaman llaquicunata apactaca quishpiringami. 14Dios mandacucmanta alli huillaica tucui llactacunapimi huillashca canga. Chai quipami cai pachaca tucuringa.
15Dios ima nishcata huillac Daniel quillcashca shina, Diosta mañana huasipi millana tiyacuctami ricunguichic. (Caita rezacca alli entendichun). 16Judea llactapi causaccunaca urcucunapi miticugrichun. 17Maijanpish huasi jahuapi cashpaca, ama huasi ucumanta imata apangapac uricuchun. 18Chagrapi cashpaca, ama huasimanta churanata apangapac cutichun.
19¡Chai punzhacunapi huicsayuc huarmicunalla, chuchucuc huahuayuc huarmicunalla, imachari tucunguichic! 20Cancuna miticuna punzha ama tamya cachun, ama samana punzha cachun, Diosta mañaichic.
21Chai punzhacunaca achca llaquimi canga. Cai pacha callari punzhamanta, cunancamanmi, chashna llaquica mana tiyashca. Quipapish mana tiyangachu. 22Chai llaqui punzhacunata Dios mana chaupicpica, pipish mana quishpirinmanchu. Diosca pai acllashcacunata cuyashcamantami, chai llaqui punzhacunataca chaupinga.
23Maijanpish: “¡Riquichic, Quishpichic Cristoca caipimi, chaipimi!” nicpipish, ama cringuichicchu. 24Llullac cristocunapish, llullac huillaccunapish ricuringami. Paicunaca milagrocunatapish, mancharinacunatapish ruhuashpa ricuchingami. Chashnami Dios acllashcacunatapish pandachinga. 25Chaicunataca utcamanmi cancunaman huillarcani. 26Maijan: “Riquichic, Cristoca shitashca pambapimi” nicpipish, ama cringuichicchu. Mana cashpaca: “Cristoca caipimi miticushca tiyacun” nicpipish, ama cringuichicchu. 27Chaica, Runa Tucungapac shamushca ñuca cutimuna punzhaca, inti llucshic ladomanta, inti tigrana ladocaman relampa achicyachic shinami canga. 28Maipimi huañushca tiyan, chaipimi ullachucunaca tandanacun.
Runa Tucungapac shamushca cutimunamanta
(Mr 13.24-37; Lc 21.25-36; 17.25-36)
29Chai llaqui punzhacuna tiyashca quipaca, intipish amsayangami, quillapish mana achicyachingachu. Lucerocunapish urmangami. Jahua pachapi tiyac jatuncunapish chucchungami. 30Chashna tucucpimi, Runa Tucungapac shamushca ñuca cutimucuc señalca jahua cielopi ricuringa. Chaita ricushpami, tucui cai pachapi causaccunaca mancharishpa huacanga. Runa Tucungapac shamushca ñucataca poderhuan, sumaimanata achicyachishpa puyupi shamucucta ricunga. 31Ñuca angelcunata cachashpami. Paicunami trompetapi sinchita tocashpa, ñuca acllashcacunataca tucui cai pachamanta tandachinga.
32Higo yura ima tucucta ricushpa, yuyaita japichic. Yurapi ramacuna cutin huiñashpa, pangacuna ricuricpica, usyai chayamucucta yachanguichic. 33Tucui caicunata cancuna ricushpaca, Runa Tucungapac shamushca ñuca cutimuna ña pungullapi cashcatami yachanguichic. 34Cai ñuca huillashcaca pactangacaman, cai punzha causaccunaca manarac huañungachu. Chaica chashnatacmi canga. 35Jahua pachapish, cai pachapish tucuringami. Ashtahuanpish ñuca huillashcaca pactacungallami.
36Ima horas, ima punzha, ñuca cutimunataca pi mana yachanchu. Jahua pachapi cac angelcunapish mana yachanchu. Ñucapish mana yachanichu, ashtahuanpish ñuca Taitallami yachan. 37Ima shinami Noé causai punzhacunapi tucurca, chashnallatacmi Runa Tucungapac shamushca ñuca cutimuna punzhapish canga. 38Chai punzhapi manarac yacu juizhu callaricpica, gentecunaca micushpa, ubiashpa, cazarashpa causacurca. Chashnami Noé huambuc huasiman yaicungacamanca carca. 39Chashnami mana entendishpa, yacu juizhu tucui paicunata tapangacaman causarca. Chashnallatacmi Runa Tucungapac shamushca ñuca cutimuna punzhapipish canga. 40Ishcai runami chagrapi canga. Paicunamantaca shucca pushashca, shucca saquishcami canga. 41Ishcai huarmipish cutacungami. Paicunamantaca shucca pushashca, shucca saquishcami canga.
42Mandac ima horas chayamunata mana yachashcamanta, alli yuyaihuan chaparacuichic. 43Caita yuyarichic: Ima horas shuhuac shamunata huasiyuc yachashpaca, mana sueñushpami chapanman. Chashnami huasimanta imatapish mana shuhuachinman. 44Runa Tucungapac shamushca ñucaca, cancuna mana yuyashca horasmi chayamusha. Chaimanta allichirishpa shuyacuichic.
Alli servicmantapish, mana alli servicmantapish
(Lc 12.41-48)
45¿Maijantac alli cazuc, alli yuyaiyuc servic runaca canga? Paipac amo mandashcata cazushpami, serviccunaman micuna horas caranga. 46Mandashcata pactachishpa causacucpi amo cuticpica, ¡chai servicca cushicungami! 47Chashna alli cazucmanca amoca tucui charishcacunatami minganga. Chaica chashnatacmi canga.
48Ashtahuanpish mana cazuc servicca: “Ñuca amoca mana utca shamungachu” yuyashpami, 49caishuc serviccunata macashpa, machaccunahuan tandarishpa micushpa, ubiashpa puri callaringa. 50Chai servicpac amoca mana yuyashca punzha, mana yuyashca horasmi chayamunga. 51Chashna shamushpami llaquichishpa, mishqui shimi jayac shungu gentecunahuan churanga. Chaipica huacaihuanmi quiru caniringa.
Currently Selected:
MATEO 24: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.