MATEO 23
23
Mandashcacunata yachachiccunatapish, fariseocunatapishrimashcamanta
(Mr 12.38-40; Lc 11.37-54; 20.45-47)
1Jesús gentecunatapish, paipac yachacuccunatapish rimashpaca:
2«Mandashcacunata yachachiccunapish, fariseocunapish Moisés mandashcata yachachiccuna tiyarinapimi tiyarin. 3Chaimanta tucui paicuna mandashcata cazunguichic. Ashtahuanpish ama paicuna ruhuashcata catinguichicchu. Paicunaca yachachishpapish, mana chai yachachishca shina causancunachu. 4Paicunaca maita mana aparipac llashacta apachic shinami, imatapish ruhuachunlla nincuna. Ashtahuanpish paicunaca dedollahuanpish mana tuparinchu. 5Gentecunapac ricuillapimi imatapish ruhuac tucuncuna. Dios quillcachishcata huacaichina jatun cajacunatami frentepipish, rigrapipish apancuna. Jatun flecosyuc churanatami churashca purincuna. 6Paicunaca micungapac mizapi tiyarishpapish, tandanacuna huasicunapipish punta alli tiyarinapimi tiyarinata munancuna. 7Ñancunapipish gentecunapac alli nishca canata, gentecuna: “Yachachicmi” nichunmi munancuna.
8Cancunaca ama “yachachicmi” nichun munanguichicchu. Shuclla Yachachicmi tiyan. Shinallatac huauquipurami canguichic. 9Cancunapac taitaca, jahua pacha Diosmi. Chaimanta cai pachapica, ama pita “taitami” ninguichicchu. 10Ama “mandacmi” nichun munanguichicchu. Mandacca Quishpichic Cristollami. 11Cancunapuramanta maijan alli casha nishpaca, caishuccunata servichun. 12Maijanpish jatun tucushcaca, yangalla nishcami canga. Cutin yangalla caccunaca, alli nishcami canga.
13¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunami jahua pacha Dios mandacucman yaicusha niccunata jarcanguichic. Chashnami cancunapish mana yaicunguichic, yaicuchunpish mana saquinguichic. 14¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunaca viuda huarmicunapac huasicunata quichuccunami canguichic. Chashna ruhuashpaca, unaicamanmi Diosta mañac tucunguichic. Chaimantami cancunaca yallita llaquichishca canguichic.
15¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunata caticcunata mashcashpami, mama cuchata, allpata puringuichic. Tarishpaca, cancunata yalli ucu pachaman rinallatami ruhuanguichic.
16¡Ñahui mana ricuc pushaccunalla, imachari tucunguichic! Cancunaca: “Diosta mañana huasimanta ari nishpapish mana imachu, ashtahuanpish Diosta mañana huasipi tiyac curimanta ari nishpaca, pactachinatacmi” nishpami yachachinguichic. 17¡Ñahui mana ricuc, yuyai illaccunalla! ¿Maijantac ashtahuan alli? ¿Curi, mana cashpaca curita Diospacllata ruhuac paipac huasi? 18Shinallatac cancunaca: “Diosta mañana huasipi tiyac altarmanta ari nishpaca, mana imachu, ashtahuanpish altarpi tiyacuc ofrendamanta ari nishpaca pactachinatacmi” nishpami yachachinguichic. 19¡Ñahui mana ricuc, yuyai illaccunalla! ¿Maijantac ashtahuan alli? ¿Ofrenda, mana cashpaca ofrendata Diospacllata ruhuac altar?
20Maijanpish altarmanta ari nishpaca, altarmantapish, chaipi tiyac ofrendamantapishmi ari nin. 21Maijanpish Diosta mañana huasimanta ari nishpaca, chai huasipi causac Diosmantapishmi ari nin. 22Maijanpish jahua pachamanta ari nishpaca, Dios mandashpa tiyarinamantapish, Diosmantapishmi ari nin.
23¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunaca mentatapish, anistapish, cominotapish patsacmanta chungatami cunguichic. Chashna cashpapish Dios mandashcacunatapish, cashcata ruhuanatapish, llaquic canatapish, Diosta crinatapish cungaringuichicmi. Caicunatami ashtahuan ruhuana canguichic. Ofrendata cunatapish mana saquinachu canguichic. 24¡Ñahui mana ricuc pushaccunalla! Cancunaca micunamanta chuspita anchuchishpa micushpapish, camellotaca mana anchuchishpami micunguichic.
25¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunaca vasotapish, platotapish jahuallatami jahuanguichic. Ucupica shuhuana yuyai, chayucyana yuyai jundami canguichic. 26¡Ñahui mana ricuc fariseocunalla! Vasotapish, platotapish ucutarac jahuaichic. Shina ruhuacpimi, jahuapish chuyanlla canga.
27¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunaca huañushcata enterrashca jutcu shinami, jahuataca sumaimana allichishca, ucutaca huañushca tullucuna, mapacuna junda canguichic. 28Gentecunapac ricuipica cashcata ruhuaccuna shinami canguichic, ashtahuanpish ucu shungupica llullana yuyai, mapa yuyaicuna jundami canguichic.
29¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunaca Dios ima nishcata huillaccunata enterrashca bovedata allichiccunami canguichic. Cashcata ruhuaccuna huañushcata yuyaringapacmi sumacta pircacunata ruhuanguichic. 30Shina ruhuashpaca: “Ñaupa taitacuna causai punzhapi ñucanchic causanchicman carca, Dios ima nishcata huillaccunataca mana huañuchinchicmanchu carca” ninguichicmi. 31Chashna nishpaca, cancunallatacmi Dios ima nishcata huillaccunata huañuchiccunapac huahuacuna cashcataca ricuchicunguichic. 32¡Cancunapac ñaupa taitacuna ruhuai callarishcataca tucuchichicyari! 33¡Culebracuna, culebrapac huahuacunalla! ¡Maitatac ucu pacha ninamantaca quishpiringuichicyari!
34Chaimantami Dios ima nishcata huillaccunatapish, alli yachaccunatapish, yachachiccunatapish cachagrini. Paicunamanta maijantaca chacatashpa huañuchinguichicmi. Maijancunataca tandanacuna huasicunapimi macanguichic, shinallatac pueblo pueblotami llaquichishpa puringuichic. 35Cashcata ruhuaccunata huañuchishcamantaca, cancunatami Diosca llaquichinga. Abelpac yahuarmanta callarishpa, Berequiaspac churi Zacariaspac yahuarcamanmi cancunataca taripashpa llaquichinga. Zacariastaca Diosta mañana huasipi tiyac altar ladopimi huañuchirca. 36Diosca tucui chaicunamantami cunan punzha gentecunataca llaquichinga. Chaica chashnatacmi canga.
Jesús Jerusalenpi causaccunamantahuacashcamanta
(Lc 13.34-35)
37¡Jerusalén, Jerusalén! ¡Canmi Dios ima nishcata huillaccunata huañuchingui! Dios huillachun cachashcacunatapish rumihuanmi shitangui. Tauca cutinmi mama huallpa chuchicunata ucllac shina, tandachisha nircani. Chashna tandachisha nicucpipish, mana uyarcanguichu. 38Chaimantami cambac huasica shitashca saquiringa. 39Ñucaca: Cunanmanta pacha Dios cachashca ñuca cutimucpi “¡allimari cangui!” ningacaman, ñucataca manatac ricunguichu ninimi» nirca.
Currently Selected:
MATEO 23: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.