MATEO 15
15
Mana alli yuyaicuna pandachic cashcamanta
(Mr 7.1-23)
1Jerusalenmanta shamuc maijan fariseocunapish, mandashcacunata yachachiccunapish Jesuspacman cuchuyashpaca:
2—¿Ima nishpatac cambac yachacuccunaca, ñaupa taitacuna yachachishcata mana cazushpa, maquita mana jahuashpa micuncuna?— nirca.
3Chaimantami Jesusca:
—¿Cancunapish ima nishpatac Dios mandashcata mana cazushpa, ñaupa taitacuna yachachishcallata catinguichic? 4Dios mandashpaca: “Cambac taita mamata cuyangui” shinallatac “Maijanpish taita mamata mana alli nicca, huañuchishcami canga” ninmi. 5Chashna nicucpipish, cancunaca: “Taita mama imata huahuacunaman mañacpica: ‘Caica Diosman cuna ofrendami. Chaimantami mana cui pudini’ ninallami” ninguichicmi. 6Chashnami taita mamata mana ayudashpa, Dios mandashcata mana cazushpa, yanga yachachishcallata catinguichic.
7¡Cancunaca mishqui shimi, jayac shungucuna! Dios ima nishcata huillac Isaías cancunamanta huillashpaca, allitami nirca. Paica:
8“Cai gentecunaca shimillahuanmi
ñucataca alli nincuna.
Ashtahuanpish shunguca,
ñucamanta carupimi.
9Yangallami ñucata alli nincuna.
Paicuna yachachishpapish,
runacuna mandashcallatami
yachachincuna” nishcami— nirca.
10Chai quipami Jesusca gentecunata cayashpaca:
—Allita uyashpa entendichic: 11Imapish shimita yaicucca mana juchayucta ruhuanchu, ashtahuanpish shungumanta llucshishca, mana alli rimaicunami, runataca juchayucta ruhuan— nirca.
12Chaimantami yachacuccuna Jesuspacman cuchuyashpaca:
—Can chashna nicpi, ¿fariseocuna piñarishcataca yachanguichu?— nirca.
13Chashna nicpimi Jesusca:
—Jahua pacha ñuca Taita mana tarpushca yuraca, ima yura cashpapish sapindi pitishcami canga. 14Ñahui mana ricuc shina pushaccunataca saquichiclla. Ñahui mana ricucpura pushanacushpaca, ishcaitacmi jutcupi urmanga— nirca.
15Chaimantami Pedroca Jesustaca:
—Chimbapurashpa parlashcata entendichi— nirca.
16Shina nicpimi, Jesusca:
—¿Cancunapish manaracchu entendi pudinguichic? 17Tucui ima micushcapish, huicsamanmi rin. Cutin chaimantaca llucshinmi. ¿Chaitaca manachu entendinguichic? 18Ashtahuanpish millai rimashcacunaca shungumanta llucshishpami, runataca juchayucta ruhuan. 19Shungumantami millai yuyaicuna llucshin. Chaimantami huañuchincuna, huainayancuna, ima millaita ruhuancuna, shuhuancuna, llullancuna, millaita rimancuna. 20Cai mana alli yuyaicunami juchayucta ruhuan. Ashtahuanpish maquita mana jahuashpa micunallaca, mana juchayucta ruhuanchu— nirca.
Canaán llacta huarmi Jesusta crishcamanta
(Mr 7.24-30)
21Jesús chaimanta rishpaca, Tiro, Sidón llactacunamanmi rirca. 22Jesús chaipi cacpimi, Canaán llacta huarmi caparishpaca:
—Mandac Davidpac aillupuramanta Apunchic Jesús, ¡ñucata llaquiyari! Ñuca huahuatami supai japishpa, llaquichicun— nirca.
23Ashtahuanpish Jesusca imata mana nircachu. Chaimantami yachacuccuna Jesuspacman shamushpaca:
—Huashata caparishpa catic huarmita caimanta richun niyari— nishpa mañarca.
24Chashna nicpimi Jesusca:
—Diosca ñucataca, oveja chingarishca shina, israelcunapacmanllami cacharca— nirca.
25Chaimanta chai huarmi, paipac ñaupapi cungurishpaca:
—Apunchic Jesús, ñucata ayudaiyari— nirca.
26Shina nicpimi Jesusca:
—Huahuacunamanta tandata quichushpa, allcucunaman cunaca, mana allichu— nirca.
27Shina nicpimi, chai huarmica:
—Ari, Apunchic Jesús. Amocuna mizamanta urmachishca micunataca allcucuna micunllami— nirca.
28Shina nicpimi Jesusca:
—¡Huarmi, canca tucui shunguhuanmi crishcangui! Chaimanta can munashca shina ruhuarichun— nirca.
Shina nincami, chai huarmipac huahuaca alli tucurca.
Tauca ungushcacunata Jesús alliyachishcamanta
29Jesús chaimanta rishpaca, Galilea cucha patamanmi chayarca. Chaimantaca urcuman rishpami, chaipi tiyarirca. 30Chaipi tiyacucpimi, achca gentecuna suchucunatapish, ñahui mana ricuccunatapish, maqui illaccunatapish, mana rimaccunatapish, shuctac ungushcacunatapish apamushpa, Jesuspac ñaupapi churarca. Chashna apamucpica, tucuitami alliyachirca. 31Chaimantami mana rimariccunapish rimarirca, maqui illaccunapish alliyarca, suchucunapish purirca, ñahui mana ricuccunapish ricurca. Chaita ricushpami, gentecunaca cushicushpa, israelcunapac Diostaca “allimari cangui” ni callarirca.
Chuscu huaranga yalli gentecunaman Jesús carashcamanta
(Mr 8.1-10)
32Jesús paipac yachacuccunata cayashpaca:
—Cai tucui gentecunami quimsa punzhata caipi ñucahuan cancuna. Paicunaca ima micunata mana charinchu. Paicunataca llaquinayanmi. Mana carashpa, huasiman cachacpica, yalli yarcaihuan, ñanpi tigrangami— nirca.
33Shina nicpimi yachacuccunaca:
—Cai tucuiman carangapacca, ¿maipitac micunataca tarishun? Caipica pipish mana causanchu— nirca.
34Shina nicpimi Jesusca:
—¿Cancunaca mashna tandatatac charinguichic?— nirca. Shina nicpimi paicunaca:
—Canchis tanda, asha challuallatami charinchic— nirca.
35Shina nicpimi, Jesusca gentecunata chai pambapi tiyachichun mandarca. 36Chaimantami canchis tandata, asha challuata japishpa, Diosta pagui nirca. Chai quipaca chaupishpa chaupishpami, paipac yachacuccunaman curca. Paicunaca gentecunamanmi cararca. 37Chashna caracpica, mana nictami micurcacuna. Chai puchuchishcataca canchis taza jundatami yachacuccunaca tandarca. 38Chaipi micuccunaca huarmicunata, huahuacunata mana yupashpami, chuscu huaranga carca.
39Chai quipami Jesusca gentecunata cachashpami, canoapi tiyarishpa, Magdala llactaman rirca.
Currently Selected:
MATEO 15: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.