MATEO 14
14
Bautizac Juanta huañuchishcamanta
(Mr 6.14-29; Lc 9.7-9)
1Chai punzhacunapi Galilea llactata mandac Herodes Jesusmanta parlanacucta uyashpa, 2serviccunata cayashpaca: «Chai Bautizac Juanmi, huañushcacunapuramanta causarishca canga. Chaimantami milagrocunata ruhuacunga» nirca.
3Herodesca paipac huauqui Felipepac huarmi Herodías nishcata uyashpami, Juantaca cadenahuan huatashpa, carcelpi churachishca carca. 4Herodesca Herodias-huanmi apanacushpa causacurca. Chaimantami Bautizac Juanca Herodestaca: «Shucpac huarmihuan causanaca mana allichu» nishca carca. 5Herodesca Juanta huañuchisha nicushpapish, gentecunata manchashpami, mana huañuchirca. Chaica, Juantata Dios ima nishcata huillacmi nicmi carca.
6Herodesca pai huacharishca punzhata yuyarishpami cayashcacunahuan cushicucurca. Chaipimi Herodiaspac huahuaca, tucuipac ñaupapi bailarca. Chaica ricushpami, Herodesca cushicurca. 7Chaimantami Herodesca pai imata mañashca cungapac ari nirca. 8Paipac mama yachachishca cashcamantami, chai huambraca: «Cunanllatac shuc platopi Bautizac Juanpac umata cui» nirca.
9Chaimantami mandac Herodesca mai llaquiricushpapish chaipi caccunapac ñaupapi ari nishcamantaca, 10Juanpac umata pitimuchun carcelman cacharca. 11Umataca shuc platopi apamushpami, chai solteraman curca. Paica mamamanmi curca. 12Chai quipami Juanpac yachacuccuna shamushpa, paipac cuerpotaca apashpa enterrarca. Chaimantami Jesusman huillangapac rirca.
Jesús pichca huaranga yalli gentecunaman carashcamanta
(Mr 6.30-44; Lc 9.10-17; Jn 6.1-14)
13Jesús, Bautizac Juan huañushcata yachashpaca, paillami canoapi tiyarishpa, shitashca pambaman rirca. Shina ricpipish, achca gentecunami paicunapac pueblocunamanta llucshishpa, chaquillahuan catirca. 14Jesús canoamanta uricushpa, achca gentecunata ricushpaca, llaquirishpami maijan ungushcacunata alliyachirca.
15Ña amsayamucucpi, yachacuccuna Jesuspacman cuchuyashpaca:
—Ña amsayacunmi. Caipica ima huasillapish mana tiyanchu. Gentecuna pueblocunaman rishpa, ima micunatapish randichun cachai— nirca.
16Shina nicpimi Jesusca:
—¿Imapactac maiman ricunga? Cancunallatac caraichic— nirca.
17Shina nicpimi paicunaca:
—Pichca tanda, ishcai challuallatami charinchic— nircacuna.
18Shina nicpimi Jesusca:
—Caiman apamuichic— nirca.
19Chaimantami gentecunata quihua pambapi tiyarichun mandashpa, chai pichca tandata, ishcai challuata japishpa, huichailla ricushpa, Diosta pagui nishpaca, chaupishpa, paipac yachacuccunaman curca. Paicunaca gentecunamanmi cararca. 20Shina caracpica, tucui gentecunami mana nicta micurca. Cutin puchushcataca paipac yachacuccunami chunga ishcai taza jundata tandarca. 21Chai micuccunaca huarmicunata, huahuacunata mana yupashpami, pichca huaranga shina carca.
Yacu jahuata Jesús purishcamanta
(Mr 6.45-52; Jn 6.16-21)
22Chaimantaca Jesusca paipac yachacuccunata canoapi huichicushpa, cucha chimba ladoman ñaupachishpa cacharca. Shinallatac gentecunatapish huasicunaman cacharcami. 23Shina cachashca quipaca, pailla urcuman rishpami, Diosta mañagrirca. Chaipica tutayangacamanmi pailla carca.
24Canoaca ña chaupi cuchapimi carca. Huaira ñaupamanta jarcacpimi, canoaca yacupi caiman chaiman cuyuricurca. 25Jesusca ña punzhayamucucpimi, yacu jahuata purishpa yachacuccunapacmanca cuchuyacurca. 26Cucha jahuata puricta ricushpami mancharishpa:
—¡Almatami ricunchic!— nircacuna.
27Shina mancharicucpimi Jesusca:
—Ama mancharichicchu, sinchicuichic, ñucami cani— nirca.
28Shina nicpimi Pedroca:
—Apunchic Jesús can cashpaca, ñucatapish yacu jahuata cambacman shamuchun ni— nirca.
Shina nicpimi Jesusca:
29—Shamui— nirca.
Chaimantami Pedroca canoamanta uricushpa, yacu jahuata paipacman ri callarirca. 30Shina ricushpapish, yalli huairata ricushpami, mancharishpa yacupi ucuyagrirca. Chaimantami:
—¡Apunchic Jesús, quishpichiyari!— nishpa caparirca.
31Shina caparincami Jesusca, Pedrota maquimanta japishpaca:
—¿Ima nishpatac ñucata mana tucui shunguhuan crishpa, mancharcangui?— nirca.
32Paicuna canoaman huichicucpica, huairaca pararircami. 33Chaimantami canoapi caccunaca Jesuspac ñaupapi cungurishpa:
—Canca Diospac Churitacmi cangui— nishpa, alli nircacuna.
Jesús Genesaret llactapi ungushcacunata alliyachishcamanta
(Mr 6.53-56)
34Cucha chimba ladoman pasashpaca, Genesaret llactamanmi chayarcacuna. 35Chaipi causac gentecunaca Jesús cashcata ricsishpami, tucui chai llactacunapi huillarcacuna. Chaimantami ungushcacunata paipacman apamurca. 36Chai ungushcacunaca Jesuspac churana puntallapipish tuparichun saquichunmi mañarcacuna.
Jesuspac churanapi tupariccunaca, tucuimi alliyarca.
Currently Selected:
MATEO 14: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.