MALAQUÍAS 3
3
1Tucuita Mandac Diosca:
«Ñuca huillactami
ñaupachishpa cachasha.
Paimi purina ñantaca
ñaupashpa allichinga.
Chai quipaca cancuna
mashcacushca Mandacmi
cungailla paipaclla
huasiman shamunga.
Cancuna shuyacushca
ari nishcata pactachic
angelpish shamungami.
¡Riquichic,
ñami shamucun!» ninmi.
Chaitaca Mandac Diosmi nin.
2Pai shamucpica,
¿pitac ricuri pudingayari?
Pai ricuricpica,
¿pitac paipac ñaupapi
shayari pudingayari?
Paica chuyayachic nina shina,
tacshana lejía shinami.
3Paimi Levipac huahuacunataca
chuyayachinga.
Chaimantami curita,
cullquita chuyayachic shina,
juchacunata anchuchishpa
chuyayachingapac tiyaringa.
Cullquita ninapi rupachishpa,
chuyayachic shinami
mapata anchuchinga.
Shina ruhuacpimi,
cashcata ruhuashpa,
Mandac Diosman ofrendata cunga.
4Chashna cucpimi,
Mandac Diosca ñaupa huatacunapi,
ñaupa punzhacunapi
cushilla chasquishca shina,
Judá llactapi,
Jerusalenpi causaccuna
cushca ofrendataca
cushicushpa chasquinga.
5Tucuita Mandac Diosca:
«Chaipimi brujocunatapish,
huainayaccunatapish,
llullashpa ari niccunatapish
taripashpa llaquichisha.
Cullquimanta trabajaccunata,
viuda huarmita,
taita mama illac huahuacunata,
caru llacta runacunata
llaquichishpa, ñucata mana
manchashpa causaccunatapish
llaquichisha» ninmi.
Chungamanta shucta cuna cashcamanta
6Mandac Diosca:
«¡Ñucaca mana shuctacyanichu.
Chaimantami Jacobopac
huahuacunataca
mana tucuchircani!
7Cancunapac ñaupa taitacuna
causacui punzhamanta
pachami ñuca mandashcacunata
saquishpa, mana cazurcanguichic.
¡Ñucapacman cutirichic!
Chashna cutiricpica,
ñucapish cancunapacman
cutirishami
nicpipish, cancunaca:
“¿Imapactac cambacman
cutirishun?” nircanguichic.
8¿Runaca, Diospacta shuhuanchu?
¡Cancunaca ñucapac cashcata
shuhuashcanguichicmari!
Shina shuhuashpapish:
“¿Imatatac shuhuarcanchic?”
ninguichicmi.
¡Cancunaca chungamanta
shucta cunata mana cushpami
shuhuanguichic!
9Cai llactapi causaccunalla,
cancunaca ñucapactami
shuhuarcanguichic.
Chaimantami tucui llactapi
causaccuna mana alli nishca
canguichic.
10Ñuca huasipica
micuna ama illachun,
chungamanta shucta apamushpa,
maipi huacaichinapi
churashpa ricuichic.
Cancuna shina ruhuacpica,
ñucapish jahua pacha
ventanacunata pascashpami,
yallita bendiciasha.
11Cancunapac allpapi
pucushca granocunatapish,
uvas chagracunatapish
langosta ama tucuchichunca,
rimashpa jarcashami.
12Chashna ruhuacpi,
sumac llacta cacpimi,
tucui llactapi causaccunaca:
“Cushillami paicunaca
causacun ningacuna” ninmi.
Chaitaca tucuita Mandac Dios
ñucami nini.
Mandac Dios paita cazuccunata llaquichishcamanta
13Cancunaca yallita
mana alli nishpami,
ñucataca rimarcanguichic.
Shina rimashpapish:
“¿Ima mana allitatac
cantaca rimarcanchic?”
ninguichicmi.
14Shinallatac:
“Yangami Diostaca
servishpa causanchic.
Pai mandashcacunata
pactachishpa,
pai tucuita Mandac Diospac
ñaupapi llaquilla purishpaca,
¿ima allitatac japinchic?
15Cunanca, jatun tucushpa
puriccunaracmi
cushilla causacun.
Mana allita ruhuashpa
causaccunaracmi sumacta causan.
Shinallatac Mandac Diosta
mana cazuccunapish
sumactami causan”
nircanguichicmi» ninmi.
16Chaimantami Mandac Diosta
manchaccunaca cada quiquin
ricsishcacunaman parlarca.
Chai parlashcataca
Mandac Diosca tucuita uyashpami,
paipac yuyarina libropi
quillcarca.
Mandac Diosta manchashpa
causaccunapac,
paipac shutita alli nishpa
causaccunapac allipacmi
chashna quillcarca.
17Tucuita Mandac Dios ñucaca:
«Ñuca shamui punzhapica
paicunaca ñucamanca
sumac valishca shinami canga.
Shuc taita paita servic churita
llaquic shinami,
ñucapish paicuna
mana allita ruhuashcata
cungarishpa llaquisha.
Chaitaca tucuita Mandac Dios
ñucami nini.
18Chashna ruhuacpimi,
cashcata ruhuac-huan,
juchayuc-huan chican cashcata,
shinallatac Mandac Dios
ñucata servic-huan,
mana servic-huan chican
cashcata yachanguichic» ninmi.
Currently Selected:
MALAQUÍAS 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.