JONÁS 1
1
Jonás miticushpa rishcamanta
1Mandac Dios Amitaipac churi Jonasta rimashpaca: 2«Jatari, jatun Nínive llactapi causaccunata llaquichina cashcata huillagri. Paicuna alli mana allita ruhuashcatami yachani» nirca.
3Shina nicpimi, Jonasca Mandac Diospac ñaupamanta miticushpa, Tarsisman ringapac jatarirca. Shinami Jope llactaman urai rishpa, Tarsis puebloman ric barcota japishpa, pasajeta randishpa, chai barcopi riccunahuan ringapac yaicurca. Paica Mandac Diospacmanta miticushpa ringapacmi barcopi tiyarirca. 4Ashtahuanpish Mandac Dios mama cuchaman sinchi huairata cachashpami, barcota yallita cuyuchirca. Chaimantami barcoca paquirinalla tucurca. 5Chaimantami barcota purichiccunaca yallita mancharishpa, paicunapac diosta caparishpa, mañarca. Shinallatac barco pangalla tucuchunmi, cargacunataca yacupi shitarca. Ashtahuanpish Jonasca chai barco ucuman yaicushpami, yallita sueñucurca. 6Shina sueñucucpimi, chai barcota purichiccunata mandacca: «¿Ima nishpatac canca sueñucunguilla? ¡Jatarishpa, cambac diosta mañai! Pai ñucanchicta llaquishpa quishpichingapishchari» nirca.
7Chaimanca paicunapura caishuc chaishuc tapunacushpaca: «¡Pimantac cai llaquicuna shamushcata yachangapac, suerteta ruhuashunchic!» ninacurca.
Chashna suerteta ruhuacpica, Jonasmanmi urmarca. 8Shina urmacpimi paicunaca:
—Imamantac cai llaqui shamushcata huillai. ¿Imatatac ruhuashpa causangui? ¿Maimantatac shamungui? ¿Maimantac cangui? ¿Ima shutitac cambac llactaca?— nirca.
9Shina nicpimi Jonasca:
—Ñucaca hebreopurami cani. Mama cuchatapish, cai pachatapish ruhuac, jahua pacha Mandac Diosta cazucmi causani— nirca. 10Chai runacunaca Mandac Diospac ñaupamanta miticushpa ricushcata yachashpami, yallita mancharishpa:
—¿Ima nishpatac chashna ruhuarcangui?— nirca.
11Mama cucha ashtahuan sinchita cuyuricpimi, paicunaca:
—Cai yacu casilla tucuchunca, ¿cantaca imatatac ruhuashun?— nirca. 12Shina nicpimi Jonasca:
—Ñucata japishpa, mama cuchapi shitaichic. Chashna shitacpica, mama cuchaca casilla tucungami. Chaica, ñucamantami cai mama cucha yacuca cancunata cashna llaquichicun— nirca.
13Mama cucha ashtahuan sinchita cuyucucpimi, chai runacunaca barcota allpaman cuchuyachinata munarca. Shina cashpapish mana cuchuyachi pudircachu. 14Chaimanta Mandac Diosta caparishpa mañashpaca: «¡Mandac Dioslla, cai runamantaca ama ñucanchicta huañuchichu! Cai runa mana faltayuc cacpipish, ama pai huañushcamanta ñucanchicta juchanchinguichu. Can imata ruhuanata munashcatami ruhuashcangui» nirca.
15Chai quipami Jonasta japishpa, mama cuchapi shitarca. Shina shitacpica, mama cuchaca casilla tucushpa, mana ashtahuan cuyurircachu. 16Chaita ricushpami, chai runacunaca yallita mancharishpa, animalta huañuchishpa, Mandac Diosman curca. Shinallatac ashtahuan servishunmi nircacuna.
17Ashtahuanpish Mandac Diosca Jonasta micuchunca, shuc jatun challuatami cacharca. Jonasca chai challuapac huicsa ucupimi quimsa punzha, quimsa tuta carca.
Currently Selected:
JONÁS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.