JUECES 11
11
1Galaad llactapica Jeftemi macanacungapacca alli sinchi runa carca. Paica cullquimanta huainayac huarmipac huahuami carca. Taitaca Galaadmi carca. 2Galaadpac huarmipish huahuacunata charishcami carca. Chai huahuacuna huiñashpami Jeftetaca:
«Canca shuctac huarmipi tiyashca cashcamantaca mana ñucanchic taita charishcacunata japinguichu» nishpami llucchishpa cacharca. 3Chaimantami Jefteca huauquicunamanta miticushpa Tob llactapi causagrirca. Chaipica imatapish mana ruhuashpa causac quilla gentecunami paihuan tandarishpa llucshic carca.
4Maijan huatacuna quipaca amonitacunami israelcunahuan macanacui callarirca. 5Amonitacunahuan, israelcunahuan macanacui callaricpimi, Galaad llactapi causac pushac yuyaccunaca Tob llactamanta Jefteta pushamungapac rirca. 6Paicuna chayashpaca:
—Jacu, amonitacunahuan macanacungapac ñucanchicta pushac tucungui— nircacuna.
7Shina nicpimi, Jefteca Galaad llactata pushaccunataca:
—¿Manachu cancunaca ñucataca piñashpa ñuca taitapac huasimanta llucchishpa cacharcanguichic? ¿Ima nishpatac cunan llaquihuan cashpa, ñucataca pushac shamunguichic?— nirca.
8Shina nicpimi, Galaad llactata pushac yuyaccunaca:
—Ari, chaillamantacmi pushac shamunchic. Chai shina rishpa amonitacunahuan macanacucpica, ñucanchicta, shinallatac tucui Galaadpi causaccunata mandachunmi churashun— nirca.
9Shina nicpimi, Jefteca Galaad llactata pushac yuyaccunataca:
—Cancunami amonitacunahuan macanacuchun pushac shamushcanguichic. Shinaca Mandac Dios amonitacunata ñuca maquipi churacpi, atishpaca ñucami mandac casha— nirca.
10Shina nicpimi, Galaad llactata pushac yuyaccunaca:
—Ari, can nishca shinatac ñucanchic mana ruhuacpica Mandac Diosllatac ricuchun— nirca.
11Shina nicpimi, Jefteca Galaad llactata pushac yuyaccunahuan rirca. Shina ricpimi, chaipi causaccunaca Jeftetaca pushac tucushpa paicunata mandac cachun churarcacuna. Jefteca Mizpa pueblopimi Mandac Diospac ñaupapi chai shinallatac nirca.
Amonpacman huillaccunata Jefté cachashcamanta
12Chai quipami Jefteca huillaccunata amonitacunata mandacpacman cachashpaca:
—¿Ñuca llactapi, cancuna macanacuc shamuchunca ñucaca imatatac ruhuashcaniyari?— nishpa tapuchun cacharca.
13Shina tapucpimi Jeftepac huillaccunata amonitacunata mandacca:
—Israelcuna Egiptomanta llucshishpaca ñuca llactatami Arnón yacumanta Jaboc yacucaman, shinallatac Jordán yacucaman japirca. Cunanca chai allpacunata mana imata nishpa cutichichic— nirca.
14Jefteca cutinllatacmi amonitacunata jatun mandacpacman huillaccunata cacharca. 15Paicunataca:
—Jefteca: “Israelcunaca moabitacunapac shinallatac amonitacunapac llactataca mana japishcachu. 16Chaica israelcuna Egipto llactamanta llucshishpaca shitashca pambatami Puca Cuchata pasashpa, Cades puebloman chayarca. 17Chaipi israelcuna cashpami edomitacunata jatun mandacpacman huillaccunata cachashpaca: ‘Cambac llactata ñucanchicta pasachun saquiyari’ nichun cacharca. Shina cachacpipish mana pasachisha nircachu. Shinallatac moabitacunata jatun mandacpacmanpish cacharcami. Paipish mana uyarcachu. Chaimantami israelcunaca Cades pueblopi saquirirca. 18Quipaca shitashca pambata rishpami Edompac llactata, Moabpac llactata muyushpa inti llucshina ladota rishpa Arnón yacu cuchullapi carpata shayachishpa tiyarirca. Arnón yacu moabitacunapac llactapi cacpimi chai llactaman mana yaicushpa chaillapi tiyarirca. 19Chaimantami israelcunaca Hesbón pueblopi causac amorreocunata jatun mandac Sehonpacman huillaccunataca: ‘Ñucanchic llactaman chayangapac cambac llactata pasachun saquiyari’ nichun cacharca. 20Shina mañacpipish Sehonca israelcunata mana crishpami, pasachinapac randica Jahaza pambapi soldadocunata tandachishpa israelcunahuan macanacurca. 21Shina shamucpipish israelcunata Mandac Diosmi Sehontapish, paipac runacunatapish israelcunapac maquipi churarca. Chaimantami paicunata tucui huañuchishpa chai llactapi cac amorreocunapac allpata japirca. 22Chashnami amorreocunapac llactataca, Arnón yacumanta Jaboc yacucaman, cutin quingraimanca inti llucshina lado shitashca pambamanta Jordán yacucaman tucui japirca. 23¿Israelcunata Mandac Diosllatac, pai acllashca israelcunapac ñaupapi amorreocunapac llactata quichushpa cushcatachu cunanca quichusha? ningui. 24¿Canca manachu cambac Quemos dios cushcataca, cambac cashcata yuyangui? Shinallatac ñucanchicpish ñucanchicta Mandac Dios ñucanchic ñaupapi quichushpa cushcataca ñucanchicpac cashcatami yuyanchic. 25Canca, ¿moabitacunata jatun mandac Ziporpac churi Balacta ashallapish yalli cashcatachu yuyangui? ¿Paica israelcunata rimarircachu? ¿Mana cashpaca paicunahuan macanacungapac shayarircachu? 26Israelcunaca quimsa patsac huatatami cai Hesbón pueblopi, Aroer pueblopi tucui chai muyundi uchilla llactacunapi, shinallatac Arnón jatun yacu ladopi tiyac tucui pueblocunapi causashca. ¿Cai tucui huatacunapica ima nishpatac mana cutin japircangui? 27Ñucaca ima millaita mana ruhuashcanichu. Ashtahuanpish canmi ñucanchic-huan macanacungapac shayarishpa mana allita ruhuacungui. Shina cacpipish, ñucanchic israelcunata Mandac Dios amonitacunahuan israelcunahuan macanacuipi ricushpa imata ruhuana cacpipish ruhuachun” ninmi ninguichic— nirca.
28Jefté chashna huillachun cachacpipish amonitacunata jatun mandacca mana uyasha nircachu.
29Mandac Diospac Espíritu japicpimi, Jefteca Galaad llactata, Manasés llactata rishpa, Galaad llactapi cac Mizpa pueblopi chayashpa, chaimantaca amonitacunahuan macanacugrirca.
30Chaipimi Mandac Diosman cungapac Jefté ari nishpaca: «Can ciertotac cai amonitacunata ñuca maquipi churacpica, 31ñuca macanacuita atishpa ñuca huasiman cuticpi, ñucata tupangapac llucshicca can Mandac Diospacmi canga. Paitaca canman cushpami tucui rupachisha» nirca.
32Jefté amonitacunahuan macanacungapac ricpica, Mandac Diosmi tucui amonitacunata paipac maquipi churarca. 33Jefteca achcacunatami atishpa, huañuchishpa, Aroer pueblomantaca Minit puebloman yaicunacaman rishpa, ishcai chunga pueblocunata japirca. Shinallatac Abel-queramimcamanmi japirca. Chashnami tucui amonitacunata israelcunaca atishpa causarca.
34Jefté Mizpa pueblopi cac paipac huasiman chayacucpica, paipac ushimi panderopi huactashpa, danzashpa tupangapac llucshirca. Ashtahuan shuctac ushitapish, churitapish mana charircachu. Paillami carca. 35Chaita ricushpami Jefteca llaquirishpa paipac churanata lliquirishpaca:
—¡Aij, ñuca huahualla! ¡Canmantami ñucamanca llaqui shamushca! Ñuca shimihuanmi Mandac Diosman cushami nircani. Chaitaca pactachinatacmi cani— nirca.
36Shina nicpimi ushica:
—Ñuca taitito, cambac shimihuan Mandac Diosman ñucata cushami nishca cashpaca chashnallatac ruhuailla. Mandac Diosmi amonitacunataca canta llaquichishca shinallatac cambac maquipi churashpa llaquichishca— nirca.
37Shinallatac:
—Cai ishcai quillacunata ñucapac ricsishcacunahuan urcucunata purishpa manarac cazarashca huañugricushcamanta huacagringapac richun saqui— nirca.
38Shina nicpimi Jefteca:
—Rilla— nirca.
Shinami ishcai quillacunata richun saquirca. Shina saquicpimi, paica paipac ricsishca solteracunahuan urcucunata purishpa mana cazarashca huañuna cashcamanta huacarca. 39Ishcai quilla quipa paipac taitapacman cuticpimi Diosman cusha nishcata pactachirca. Paica manarac pi carihuan chayarinacushcami huañurca. 40Chaimantami israelcunaca, Galaad pueblomanta Jeftepac ushita yuyarishpa tucui solteracuna cada huata chuscu punzhata huacangapac llucshincuna.
Currently Selected:
JUECES 11: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.