EZEQUIEL 3
3
1Chaipi rimashpaca: «Huañunalla runa, cai pillushca quillcata micui. Chai quipaca israelcunaman huillangapac ri» nirca. 2Ñuca shimita pascacpica, chai quillcata micuchun curcami. 3Chaimantaca: «Huañunalla runa, canman cushca cai pillushca quillcata micushpa, cambac huicsapi jundachi» nirca. Chaita micucpica, ñuca shimipica abeja mishqui shinami, mishqui carca.
4Chai quipaca: «Huañunalla runa, israelcunapacman rishpa, ñuca rimashcata huillai. 5Cantaca mana, can mana ricsishca rimaita rimaccunapacmanchu cachani, ashtahuanpish israelcunapacmanmi cachani. 6Shinallatac mana can ricsishca rimaita rimac tauca llactacunamanchu cachani. Ashtahuanpish paicunapacman cachacpica, can rimashcataca uyanmanmi. 7Ashtahuanpish israelcunaca can rimashcataca mana uyasha ningacunachu. Paicunaca ñuca rimashcataca mana munancunachu. Tucui israelcunami sinchi umacuna, rumi shungucuna can. 8Ñucami cantaca paicunahuan ñahui ñahui rimachun churani. Paicunahuan chimbapurashpa, rimachunmi sinchiyachini. 9Cambac umataca sinchi rumita shina, diamanteta shinami ruhuani. Paicunaca mana cazuccunami. Shina cacpipish, paicunapac ñaupapica ama manchanguichu» nirca.
10Quipata cutin rimashpaca: «Huañunalla runa, ñuca imata huillashcataca cambac ringrihuan alli uyashpa, cambac shungupi chasquingui. 11Prezu tiyacuc cambac llacta gentecunaman uyachun, mana uyachun huillashpaca: “Mandac Diosca cashnami nin” ningui» nirca.
12Diospac Espíritu ñucata sinchiyachishpa, ñuca huashapi rimashpaca: «Mandac Dios tiyana sumaimana achic nicuc pushtupi alli nichic» nirca. 13Shinallatac causaita chariccunapac alascunapura huactarinacushcatapish uyarcanimi. Paicunapac ñaupapi cac ruedacunapish culun nishcami uyarirca. 14Quipaca Diospac Espiritumi ñucata sinchiyachishpa pusharca. Ñucaca shungupi yallita llaquirishpami rircani. Ashtahuanpish Mandac Diospac maquica sinchita charirashpami ñucataca pusharca. 15Chai quipaca Quebar jatun yacu cuchupi cac Tel-abib llactapi causacuc prezucunapacman chayashpami, paicuna causacushca pushtullapitac ñucapish tiyarircani. Chaipica canchis punzhatami, imatapish mana rimai pudishpa, manchaihuan tiyacurcani.
Ezequiel israelcunata chapacushcamanta
(2 R 25.27-30)
16Canchis punzhapi Mandac Dios ñucata rimashpaca: 17«Huañunalla runa, cantaca israelcunata chapachunmi churani. Cunanca ñuca rimashcata alli uyashpa, ñucapac randi sinchita rimangui. 18Ñuca, ñucata mana manchac runata: “Huañunguitacmi” nicpipish, can chai runa millai ruhuanata saquishpa, causaita charichun mana rimacpica, chai runaca paipac juchamantami huañunga. Ashtahuanpish pai huañushcamantaca cantami juchanchisha. 19Ashtahuanpish, ñucata mana manchac runa can rimashca jahua millaita ruhuanata mana saquishpa, mana alli causaitapish mana saquishpa, ñucaman mana tigrarishpaca, paipac juchamantami huañunga. Ashtahuanpish canca mana juchanchishcachu cangui. 20Shinallatac cashcata ruhuac runa cashcata ruhuanata saquishpa, millaita ruhuangapac cuticpica, mitcarishpa urmanatami churasha. Pai alli tucuchun, can mana rimacpica, paipac juchamantami huañunga. Pai cashcata ruhuashcataca mana yuyarishachu. Ashtahuanpish pai huañushcamantaca cantami juchanchisha. 21Cashcata ruhuac runa juchata ama ruhuachun, can rimacpi, pai juchata mana ruhuashpaca causangami. Ashtahuanpish canca mana juchanchishcachu cangui» nirca.
Ezequiel upayashcamanta
22Mandac Dios paipac ñucata rimashpaca: «Jatarishpa, pugru pambaman llucshi. Chaipimi canhuan parlasha» nirca. 23Shina nicpimi, jatarishpa pugru pambaman rircani. Chaipimi Quebar jatun yacu cuchupi Mandac Diospac sumaimana achic nicucta ricushca shinallatac cutin ricurcani. Chashna ricushpami, ñucaca pambacaman cumurircani. 24Chai quipaca Diospac Espíritu ñucapacman shamushpa sinchiyachicpimi ñucataca: «Cambac huasiman yaicushpa, huichcari. 25Huañunalla runa, cantaca huascacunahuanmi huatanga. Paicunapac chaupimantaca mana llucshi pudinguichu. 26Cambac callutaca palancarapimi llutasha. Shina ruhuacpica, canca mana rimai pudishpami saquiringui. Chashnami paicuna mana cazucpipish, imata mana rimai pudingui. Paicunaca mana cazuccunami can. 27Ashtahuanpish cambac shimica ñuca rimacpimi rimanga. Chaipimi canca: “Mandac Diosca: Maijanpish uyasha niccunaca uyachun, mana uyasha niccuna ama uyachun. Paicunaca mana cazuccunami” ninmi ningui.
Currently Selected:
EZEQUIEL 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.