ÉXODO 19
19
Israelcuna Sinaiman chayashcamanta
1Israelcunaca Egiptomanta llucshishpaca, quimsa quillapimi shitashca pamba Sinaiman chayarca. 2Refidim pambamanta rishpaca, Sinaí shitashca pambaman chayashpami, Sinaí urcu chimbapurapi carpa huasita shayachishpa tiyarirca. 3Dios-huan Moisés parlangapac huichai ricpimi, chai urcu jahuamanta Mandac Dios cayashpaca:
—Jacobopac huasi ucupura israelcunataca: 4“Cunanmi Egipto runacunata ñuca imata ruhuashcatapish, chaimanta cancunata jatun angapac alaspi churac shina, pushamushcatapish ricunguichic. 5Cancuna ñuca nishcata cazushpa, ñucahuan ari nishcata pactachishpaca, tucuimanta yalli valishca ñucapaclla gentecunami canguichic. 6Cancunaca mandac curacuna, shinallatac jucha illac gentecunami canguichic. Tucui cai llactaca ñucapacmi” ninmi ningui— nirca.
7Shina nicpimi, Moisés shamushpaca, israelcunata pushac yuyaccunata cayashpa, Mandac Dios mandashcacunata paicunapac ñaupapi huillarca. 8Shina huillacpimi, tucui israelcunaca:
—¡Mandac Dios tucui nishcataca pactachishunllami!— nirca.
Israelcunapac nishcacunataca Moisesca Mandac Diosmanmi huillarca. 9Shina huillacpimi, Mandac Diosca Moisestaca:
—Ñucami amsa puyupi cambacman shamusha. Chashna shamushpa, canhuan parlacta israelcuna uyashpami, cantaca tucui causaipi cringa— nirca.
Cutin israelcuna ima nishcataca Moisesca Mandac Diosmanmi huillarca.
10Chaimantami Mandac Dios Moisestaca:
—Israelcunapacman rishpa cunanpish, cayapish ñucapaclla cachun, shinallatac paicunapac churanatapish tacshachun mandai. 11Quimsa punzhacamanca allichirishca cachun mandangui. Chai punzhami Sinaí urcu jahuaman tucui israelcuna ricucucpi shamusha. 12Canca israelcuna maicaman chayarina cashcataca urcu muyundita unanchishpa: “Cai señalashcamantaca ama huichaiman ringuichicchu. Cai señalashcallapipish ama tuparinguichicchu. Maijanpish chai urcuman chayarishpaca huañungatacmi. 13Pipish chaipica mana tupari pudinchu. Maijanpish tuparicca rumihuan shitashpa, mana cashpaca arcohuan shitashpa huañuchishcami canga. Shinami gente cashpa, animal cashpa huañunga. Corneta unaicaman tocashca uyaricllapimi urcumanca huichicunga” ningui— nirca.
14Moisés urcumanta urai shamushpaca, tucui israelcunatami Diospacllata ruhuarca. Paicunaca churanacunatapish tacsharcami. 15Moisesca israelcunataca:
—Cancunaca quimsa punzhapacca allichirishca caichic. Shinallatac huarmicunapipish mana chayarinachu canguichic— nirca.
16Ña quimsa punzha pacarimucucpica, tulun nishpa, relampa jaguin nishpa, shinallatac amsa puyupish urcuta taparcami. Cutin corneta sinchita tocashcapish uyarircami. Shina uyaricpimi, carpa ucupi tiyac israelcunaca mancharishpa chucchurca. 17Chaimantami Moisesca carpa huasicunamanta tucui israelcunata llucchishpa, Dios-huan tupangapac urcu chaquipi shuyarca. 18Mandac Dios nina chaupita urcuman urai shamushcamantami chai urcuca hornota cushni tapashca shina carca. Tucui chai urcumi yallita chucchucurca. 19Cornetapi tocashcaca ashtahuan sinchitami uyarishpa catirca. Moisés Dios-huan parlacpica, relampa tulun nicuc shinami, rimashpa cutichirca.
20Mandac Diosca Sinaí urcu jahuaman shamushpami, Moisesta cayarca. Chashna cayacpimi, Moisesca chai urcu jahuaman huichai rirca. 21Mandac Diosca Moisestaca:
—Gentecuna Mandac Dios ñucata ricungapac maicaman chayana cashcata pasashpa, pacta huañunman. Chaiman ama pasachun cutishpa rimagri. 22Mandac Dios ñucapacman cuchuyaccunata ñucapaclla tucuchun nigri. Mana cashna tucucpica, paicunataca llaquichishami— nirca.
23Moisesca Mandac Diostaca:
—Israelcunaca Sinaí urcumanca mana huichai ri pudingachu. Canllatacmi: “Maicaman chayarinata urcu muyundita señalangui, shinallatac ñucapacllata ruhuangui” nishpa mandarcangui— nirca.
24Mandac Diosca:
—Uraiman shamushpa, Aaronta huichai pushamugri. Shina cacpipish curacunapish, israelcunapish Mandac Dios ñucahuan tupangapac maicaman rinata señalashcata mana pasanachu can. Mana cazushpa pasacpica, Mandac Dios ñucaca llaquichishami— nirca.
25Chaimantami Moisesca uraiman shamushpa, tucui chai nishcacunata israelcunaman huillarca.
Currently Selected:
ÉXODO 19: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.