DEUTERONOMIO 2
2
Shitashca pambata purishcamanta
1Quipataca Mandac Dios mandashca shinami, cutishpa shitashca pambata Puca Cuchaman rircanchic. Shinami Seir urcuta muyushpa, yallita unayarcanchic. 2Shina cacpimi, Mandac Diosca: 3“Unaitami cai urcuta muyushpa purishcanguichic. Cunanca, jahua ladoman richic. 4Israelcunataca: ‘Cancunapac familia Esaupac huahua huahuacunapac Seir llactata cancuna pasacucpica, yallita manchangacunami. Shina cacpipish, cuidaringuichic. 5Paicunahuanca ama macanacunguichicchu. Paicunapac llactataca chaqui sarunallatapish cancunamanca mana cushachu. Seir urcutaca Esaumanmi curcani. 6Micunatapish randishpa micunguichic. Yacutapish randishpa ubianguichic’ ningui” nirca. 7Mandac Diosca cancuna imata ruhuacpipish bendiciashcami. Cai shitashca pambata ricucpica, paimi tucuipi cuidarca. Mandac Diosca chuscu chunga huatatami cancunahuan cashca. Cancunamanca imapish mana illashcachu.
8Chaimantaca ñucanchic huauqui Esaupac huahua huahuacunapac Seir urcumantaca caruyarcanchicmi. Chashnami Elat, Ezión-geber llactacunamantaca shamuna ñanta shamurcanchic. Chai quipaca shitashca pamba Moabmanmi cutircanchic. 9Chaipimi Mandac Diosca: “Moabpi causaccunataca ama piñachinguichicchu, ama macanacunguichicchu. Chai llactataca ashallatapish mana cushachu. Ashtahuanpish Ar allpataca Lotpac churicunamanmi cusha” nirca. 10(Chai llactapica emitacunami utcapica causac carca. Chai gentecunaca Anacpac churicuna shinami yalli jatun carca. 11Chaimantami paicunataca Anacpac churicuna shina manchana jatun gentecuna niccuna carca. Ashtahuanpish moabitacunaca emitacuna nishpami cayac carca. 12Seir urcupica horeocunami ñaupaca causac carca. Paicunataca Esaupac huahua huahuacunami llucchishpa cachashpa, chai llactapi causai callarirca. Mandac Dios cushca llactapi israelcuna ruhuashca shinallatacmi paicunapish ruhuarca.) 13Chaipimi Mandac Diosca: “Cunanca utcashpa Zered jatun yacuta pasaichic” nirca. Chashna nicpimi, Zered jatun yacuta pasarcanchic.
14Cades-barneamanta rishpa, Zered yacuta pasangacamanca quimsa chunga pusac huatami tucurca. Chai huatacunapica Mandac Dios nishca shinallatacmi israelcunapac macanacuc runacunaca tucui huañurca. 15Mandac Dios yallita llaquichicpica, carpapi caccunaca tucuimi huañurca. 16Israelcunapuramanta macanacuc runacuna tucui huañucpimi, 17Mandac Diosca: 18“Cunanllatacmi Ar allpaman Moab llactata pasangui. 19Amonpac churicunapac llactaman chayashpaca, ama paicunata piñachinguichicchu, ama macanacunguichicchu. Amonpac churicunapac llactataca cancunaman mana cushachu. Chai llactataca Lotpac churicunamanmi” nirca. 20(Chai llactapi causaccunatapish manchana jatun gentecuna nishcami carca. Chaipimi ñaupaca manchana jatun gentecuna causac carca. Amonitacunataca zomzomeocuna nishpami cayac carca. 21Chai gentecunaca yalli achcami carca. Shinallatac Anacpac churicuna shina, yalli jatun gentecunami carca. Paicunataca Mandac Diosmi amonitacunapac maquipi churashpa tucuchichirca. Chashna tucui tucuchishpami chaipi causai callarirca. 22Paicunaca Esaupac huahua huahuacuna ruhuashca shinami ruhuarca. Seir urcupica cunancamanmi causacun. 23Shinallatac Gazapi tiyac uchilla llactacunapi causac aveocunataca Caftor llactamanta caftoreocuna shamushpami tucui tucuchishpa, chaipi causai callarircacuna). 24Mandac Diosca: “Cunanca jatarishpa, jatun yacu Arnonta pasaichic. Riqui, amorreocuna causana Hesbón llactata jatun mandac Sehontaca pai mandana llactacunandimi cancunapac maquipi churani. Paicunapac llactaman yaicushpa, chai allpata quichui callarichic. 25Cunanmi cai pachapica manchaita, chucchuita churagrini. Cancunamanta parlashcata uyashpallami munai manchaihuan chucchunga” nirca.
Israelcuna jatun mandac Hesbonta mishashcamanta
(Num 21.21-30)
26Cademot shitashca pambamanta maijan huillaccunata Hesbón llactata jatun mandac Sehonpacman cushi causaimanta rimachun cachashpaca: 27“Cambac llacta ñanta ñucanchic pasachun saqui. Allimanpish, lluquimanpish mana ladoyashpami, jatun ñanllata rishun. 28Micunatapish, ubianatapish cullquihuanmi randishun, ashtahuanpish chaquillahuan ñanta pasachun saqui. 29Seirpi causac Esaupac churicuna, Arpi causac moabitacuna ñanta mañachishca shinallatac pasachun saqui. Ñucanchicca Jordán jatun yacuta pasashpa, ñucanchicta Mandac Dios cushca llactamanmi chayanata munanchic” nirca.
30Ashtahuanpish Hesbón llactata jatun mandac Sehonca Mandac Dios paipac shunguta sinchiyachicpimi, mana paipac llactata pasachisha nirca. Ashtahuanpish chai llactata cancunaman cungapacmi chai mandacpac yuyaitapish, shungutapish sinchiyachirca. Chashnami cunancaman chai llactapi causacunguichic.
31Mandac Diosca: “Riquichic, cunanmi mandac Sehontapish, paipac llactatapish cancunapac maquipi churani. Chai llactata japi callarichiclla” nirca.
32Sehonca tucui paipac gentecunandimi ñucanchic-huan macanacungapac Jahazaman llucshirca. 33Shina cacpipish, ñucanchicta Mandac Diosmi paicunataca ñucanchic maquipi churarca. Chaimantami chai jatun mandactapish, paipac churicunatapish, tucui gentecunatapish tucui huañuchircanchic. 34Tucui llactacunata quichushpami, tucui tucuchircanchic. Shucllatapish mana saquishpami caritapish, huarmitapish, huahuacunatapish tucui huañuchircanchic. 35Shina atishpaca, paicunapac animalcunata, llactapi imalla tiyashcacunallatami japircanchic. 36Arnón jatun yacu patapi tiyac Aroermanta callarishpa, pambacunapi tiyac pueblocunata, Galaadpi tiyac llactacunacamanmi Mandac Diosca ñucanchic maquipi churarca. 37Ashtahuanpish Amonpac churicunapac llactaman, Jaboc yacu patapi tiyac llactacunaman, urcupi tiyac llactacunamanmi mana chayarcanchic. Shinallatac Mandac Dios ama llaquichinguichicchu nishpa mandashca llactacunamanpish mana chayarcanchicchu.
Currently Selected:
DEUTERONOMIO 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.