HECHOS 28
28
Pablo Malta shuti islapipi cashcamanta
1Chashna tucuilla alli llucshishpaca, Malta shuti islapi cashcatami yachac chayarcanchic. 2Chai llactapi causaccunapish ñucanchictaca llaquishpa allimi tuparca. Tamyapi chirihuan cacpimi, ninata japichishpa masharichun tucui ñucanchicta pusharca. 3Pablo chaquishca yantata tandashpa ninapi churacucpimi, huañuchic culebra ninamanta llucshishcahuan maquipi huarcurirca. 4Chaipi paihuan cac gentecuna maquipi huarcuracucta ricushpaca: “Cai runaca huañuchic runami yuyachin. Chaimantami ñucanchic cashcata ruhuac diosca yacumanta quishpirimucpipish, mana causachun saquin” ninacurca.
5Pabloca chai culebrataca maquimanta chaspishpa, ninapimi shitarca. Pabloca mana ima tucurcachu. 6Chaipi caccunaca: “Ñallami punguinga, mana cashpaca ñallami huañunga” nishpami chaparacurca. Ña unaita mana ima tucucpica paicunaca: “¡Cai runaca diosmi yuyachin!” ninacurcami.
7Chai allpaca, chai llactata mandac Publiopacmi cashca carca. Paimi ñucanchicta huasipi sumacta chasquishpa, quimsa punzhata pozachirca. 8Publiopac taitaca calentura ungüihuanpish, purichic ungüihuanpishmi camapi cashca carca. Paita Pablo ricungapac rishpaca, maquita ungushcapac jahuapi churashpa, Diosta mañashpami alliyachirca. 9Chaita ricushpami, chai llactapi causac caishuc ungushcacunapish shamushpa alliyarca. 10Paicunapish ñucanchicta sumacta chasquirca. Ñucanchic rigricpica, imalla illashcata cushpami cacharcacuna.
Pablo Roma puebloman chayashcamanta
11Chai islapi quimsa quillata cashpami, Alejandría pueblomanta shamushpa, tamya quillacunata chaipi cashca barcopi rircanchic. Chai barco ñaupa ladopica Cástor, Pólux shuti dioscuna dibujashcami carca. 12Chashnami Siracusa puebloman chayashpa, chaipi quimsa punzhata carcanchic. 13Chaimantaca chai llacta cuchu cuchuta rishpami, Regio puebloman chayarcanchic. Chai cayandi punzhaca huichai huaira tiyacpimi, ishcai punzhapica Puteoli puebloman chayarcanchic. 14Chai pueblopi tauca criccuna tupashpa, shuc semana paicunahuan saquirichun nicpimi saquirircanchic. Chai quipami Roma puebloman rircanchic. 15Chai pueblo criccuna ñucanchic shamucucta yachashpami, Apio pueblo plazapipish, Quimsa Chuclla pueblopipish tupangapac shamushca carca. Paicunata Pablo ricushpaca, Diosta pagui nishpa, cushicushpami sinchiyarca. 16Ña Romaman chayashpaca, patsac soldadocunata mandacca Pablotaca cuidac soldadohuanmi shuc huasipi chican churarca.
Roma pueblopi Pablo huillashcamanta
17Quimsa punzhata chaipi cashpami, Pabloca israelcunata mandaccunata cayac cacharca. Paicuna ña tandanacumucpica:
—Huauquicuna, ñucaca israelcunapish, ñucanchic ñaupa taitacuna yachachishcatapish ima mana allita mana ruhuashcanichu. Shina cacpipish, Jerusalenpi ñucata prezu japishpami, Roma llactata mandaccunaman curcacuna. 18Chai mandaccuna ñucata alli tapushpa, imamanta juchanchishpa, mana huañuchina cashcata tarishpaca, cacharinatami munarca. 19Shina cacpipish, israelcuna piñaricpimi, ñucaca: “Roma llactata jatun mandac Cesarmi juchanchinga” nircani. Chashna nishpaca, mana paicunata juchanchingaraicuchu nircani. 20Israelcuna shuyacushcallatatac crishpa shuyacushcamantami, ñucaca caipi cadenahuan huatashca cani. Chashna parlangapacllami, cancunataca cayarcani— nirca.
21Chaimantami paicunaca:
—Ñucanchicca Judea llactamantaca ima quillcata mana japishcanchicchu. Pipish canta mana alli nishpa mana huillac shamushcachu. Canta mana alli nishpapish mana rimashcachu. 22Ñucanchicca can imata yuyacushcatallami yachashun ninchic. Chaica, can caticushca yachanata maipipish piñashpa rimacllatami uyanchic.
23Chashna nishpami, shuc punzha Pablo ima nishcata uyangapac yuyarinacurca. Chai punzhapimi pai causacuc huasiman achca gentecuna Pablo yachachishcata uyangapac, tandanacumurca. Pabloca Jesusta crichunmi, Dios mandacucmantapish, Moisés mandashcacunamantapish, Dios ima nishcata huillashcamantapish tutamantamanta chishicaman yachachirca. 24Chashna huillacpica, maijancunaca crircami. Maijancunaca mana crircachu. 25Chaimanta paicunapura mana shuc yuyailla tucushpa, rigricpimi Pabloca:
—Allimi Dios ima nishcata huillac Isaiasca, Diospac Espíritu yuyachicpica huillarca. Paica:
26“Chai gentecunaman
huillangapac ri.
Paicunataca: Cancunaca mashnata uyacushpapish,
mana entendinguichicchu,
mashnata ricushpapish,
mana ricushca shinami canguichic.
27Cai gentecunapac shunguca,
rumi shina sinchimi.
Paicunapac ringrica
tapashca shinami.
Ñahuipish huichcashca shinami.
Uyashpapish, mana uyashca shina,
ricushpapish, mana ricushca shinami.
Paicunapac shunguca
ima alli yuyaita mana japinchu.
Paicuna ñucapacman cutimucpica,
ñucaca alliyachimanmi” nircami.
28Caitaca alli yachaichic: Mana israelcunamanmi Diosca quishpirinamanta huillachun cachashca. Paicunami uyangacuna— nirca.
29Chashna nicta uyashpami, israelcunaca paicunapura rimarinacushpa rircacuna.
30Pabloca ishcai huatatami pai arrendashca huasipi causarca. Tucui shamuccunatami sumacta chasquishpa, 31Dios mandacucmanta huillashpa, Apunchic Jesucristomantapish yachachic carca. Pi mana jarcashcami, pai tucui huillasha nishcata huillac carca.
Currently Selected:
HECHOS 28: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.