2 CORINTIOS 1
1
Corinto pueblopi causac criccunaman Pablo quillcashcamanta
1Dios munashcamanta Jesucristopac apóstol Pablomi huauqui Timoteohuan Corinto pueblo, shinallatac Acaya llacta Diospaclla tandanacushca criccunaman quillcanchic. 2Ñucanchic Diospish, Apunchic Jesucristopish cancunata mai cuyashpa, sumac causaita cushca cachun ninchicmi.
Pablo llaquihuan cashpapish cushicushcamanta
3Ñucanchic Apunchic Jesucristopac Diosca alli nishca cachun. Paica llaquic tucuita cushichic Diosmi. 4Diosca llaquihuan caccunata cushichichunmi, ñucanchic tucui llaquicunapi cushichin. 5Cristo llaquita apashca shina ñucanchicpish llaquita apashpaca Cristollamantatacmi yallita cushicuita japinchic. 6Cancuna quishpirishpa, cushicuita japichunmi ñucanchicca llaquita apanchic. Ñucanchicta cushichishcaca, cancunapish mana manchashpa, cuyac shunguhuan llaquita apachunmi, cushicuita cun. 7Cancuna ima shinami ñucanchic shina llaquita apacunguichic, chai shinallatacmi cushicuita japinguichic. Cancuna chashna causacuctaca shunguhuanmi crinchic.
8Cuyashca criccuna, Asia llactapi ñucanchic jatun llaquita apashcata yachachunmi munanchic. Mana apaipac llaquita charishpami, ña mana ashtahuan causashunchu nishpa yuyarcanchic. 9Chaipica ña huañuna shinami carcanchic. Shina cacpipish ñucanchic chai llaquita apashpaca mana ñucanchicllapi yuyaita churashpa, ashtahuanpish huañushcacunata causachic Diospi yuyaita churanatami yachacurcanchic. 10Diosmi chai huañuna llaquimanta huacaichirca. Paillatacmi chai llaquimanta huacaichicun, paillatacmi tucui llaquimanta huacaichishpa catinga yuyanchicmi. 11Cancuna Diosta mañashpa ayudacpimi, ñucanchictaca huacaichishpa catinga. Achcacuna ñucanchicmanta mañacpica, achcacunami Dios allicunata ñucanchicman cushcamantaca paita alli ningacuna.
Pablo imamanta mana Corintoman rishcamanta
12Ñucanchic causaipica imatapish cashcata ruhuashpa, chuya shunguhuan causacushcatami yachanchic. Ashtahuancarin cancunahuanmi chashna causarcanchic. Chashnaca mana gentecunapac yachaillamanta ashtahuanpish Diospac cuyaillamantami chashna causacunchic. 13Ñucanchic cancunaman quillcashpaca, mana entendipacta mana quillca catipactaca mana quillcarcanchicchu. Ñucaca cancuna entendichunmi munani. 14Ñucanchic Apunchic Jesucristo cutimucpica, ñucanchicmantami cushicunguichic, ñucanchicpish cancunamantami cushicushun. Chaitaca ñami ashallatapish entendishcanguichic.
15Cai yuyaihuanmi cancunatarac ricungapac rishpa achcata cushichinata yuyarcani. 16Cai shinaca Macedonia llactaman rishpa, chaimanta cutishpapish cutin cancunata ricunatami yuyarcani. Chashna ruhuacpimi cancunaca Judea llactaman rinapipish ayudanguichicman. 17Chaita yuyarishpaca, ¿manachu alli yuyarishpa ruhuarcani? Ñuca imata ruhuasha nishpapish, ¿chai ratollatac «ari» nishpa, «mana» nishpa ishcai yuyaihuan ruhuacchu cani? 18Ñucanchic cancunaman huillashcaca, chai ratollatac «mana», chai ratollatac «ari» ninaca mana canchu. Chaitaca Diosllatami yachan. 19Silvanopish, Timoteopish, ñucapish cancunaman huillacushca, Diospac Churi Jesucristoca mana chai ratollatac «ari», «mana» nicchu carca. Jesucristoca Dios-huan ari nishcata pactachicmi. 20Dios imatapish cushami nishcataca Jesucristomi pactachirca. Diosta jatunyachishpaca, paimantami ñucanchicca «chashna cachun» ninchic. 21Diosmi ñucanchictapish, cancunatapish Cristohuan shuc shinallatac ruhuashpa, acllashpa sinchita charicun. 22Paipaclla cachunmi sellohuan churashca shinata ruhuashca. Ñucanchic shungupi paipac Espirituta churashpami, quipa punzhapi ñucanchic japina cashcata ricuchishca.
23Corintoman ñuca risha nicushpapish, cancunata mana llaquichingaraicumi manarac rini. Chaitaca ñuca almata ricuc Diosllatacmi yachan. 24Cancunaca ña alli criccunami canguichic. Crishpa caita chaita ruhuachun nishpaca, mana mandanchicchu, ashtahuanpish cancuna crishcamanta cushicuihuan catichunmi ayudanata munanchic.
Currently Selected:
2 CORINTIOS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.