1 CORINTIOS 16
16
Criccunaman cullquita tandachishcamanta
1Criccunata ayudangapac ofrendata tandachishpaca, Galacia llacta criccunata yachachishca shina tandanguichic. 2Ñuca chayac rato mana tandacungapacca, cada semana callari punzhapimi, tucui mashna asha ofrendata tandachishpa charicuna canguichic. 3Ñuca chayashpami, cancuna tandachishca cullquitapish, cartatapish cancuna acllashca criccunata Jerusalén pueblopi saquigrichun cachasha. 4Ñucapish rina tucucpica, paicunahuan rishallami.
Maijan llactacunaman Pablo rinata yuyarishcamanta
5Ñuca rishpaca Macedonia llactatami pasasha. Macedonia llactamantaca Corinto pueblomanmi chayasha. 6Cancunapacman chayashpaca, asha punzhacunata, mana cashpaca tucui tamya quillacunata saquirishapishchari. Shina saquiricpica, ñuca maiman rina cashcaman richun ayudanguichic. 7Cunanca mana ashata ricushpalla pasasha ninichu. Apunchic Jesús munacpica, unaicamanmi cancunahuan saquirisha nini. 8Chaica, Pentecostés fiesta punzhacuna chayangacamanmi, cai Efeso pueblopi cagrini. 9Taucacuna piñacucpipish, Jesucristomanta ñuca huillachunca, pungu pascashca shinami can.
10Timoteo chayacpica, cushilla cancunahuan cachun sumacta chasquinguichic. Paica ñuca shinami Apunchic Jesucristopacta ruhuac can. 11Chaimanta cancunapuramanta maijan ama paita yangapi churachun. Chaipac randica, pai ñucata cushilla ricungapac shamuchun ayudanguichic. Ñucaca caishuc criccunahuanmi shuyacuni.
12Huauqui Apolostaca criccunahuan cancunata ricugrichunmi yallita mañarcani. Shina mañacpipish, cai punzhacunaca mana risha nircachu. Shina cashpapish, pai rina tucucpimi ringa.
Tucuchingapac saludashcamanta
13Tucui shunguhuan crishpa, mana manchashpa, alli sinchiyashpa chaparacuichic. 14Shinallatac tucuita ruhuashpapish, cuyaihuan ruhuaichic.
15Cuyashca criccuna, Acaya llactapica Estéfanas paipac familiandi punta cric tucushcataca cancunallatac yachanguichicmi. Paicunami criccunata tucui shunguhuan ayudacuncuna. 16Chaimantami paicuna shina ayudaccunatapish, shuctac ayudaccunatapish, tucui serviccunatapish cazuchun mañani.
17Estefanaspish, Fortunatopish, Acaicopish shamushcamantami ñucaca yallita cushicuni. Chaica, paicunami cancunapac randi ñucata ayudarca. 18Paicunami cancunata cushichic shina, ñucatapish cushichirca. Chashna gentecunataca pagui nicunallami canchic.
19Asia llacta criccunapish saludancuna. Aquilapish, Priscilapish, paicunapac huasipi tandanacuc criccunapish Apunchic Jesuspac shutipi saludancunami. 20Tucui criccunami saludancuna. Chuya shunguhuan muchashpa, caishuc chaishuc saludanacuichic.
21Ñuca Pablomi, quiquin maquihuan quillcashpa, saludashpa cachani.
22Maijanpish Apunchic Jesusta mana cuyactaca, llaquichishca cachun. ¡Ñucanchic Apunchic Jesús, shamuilla!
23Apunchic Jesucristopac cuyai tucui cancunahuan cachun. 24Apunchic Jesucristomantami tucui cancunata cuyacuni.
Currently Selected:
1 CORINTIOS 16: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.