2 TESALONICENSES 3
3
Diosta mañaichic nishcamanta
1Caitapish nishpaca, cancuna chasquishca shinallatac, Apunchic Jesucristomanta huillashcata tucui llactacunapi utca chasquichunca, ñucanchicmanta Diosta mañaichic. 2Mana tucuichu criccuna can. Chashna cashcamanta mana allita ruhuac, millai gentecuna ñucanchicta ama llaquichichunpish, Diosta mañaichic. 3Paicuna chashna cacpipish, Apunchic Jesusca tucui imatapish pactachic cashcamantaca sinchita ruhuashpami millaimantapish huacaichinga. 4Ñucanchic ima nishcacunata cancuna ña pactachicuc shinallatac, pactachishpa catina cashcatatacmi Apunchic Jesucristomantaca yachanchic. 5Dios cuyac shina cancunapish cuyac cachun, shinallatac Cristo shina cuyac shunguhuan llaquita apac cachunmi, Apunchic Jesusmanca mañanchic.
Trabajashpa causanamanta
6Cuyashca criccuna, Apunchic Jesuspac shutipimi ñucanchic yachachishcata mana cazushpa, mana trabajasha nishpa puric criccunahuanca ama tandarichichu ninchic. 7Ñucanchic cancunahuan cashpaca, mana trabajashpa yangaca mana carcanchicchu. Chaitaca cancunaca allimi yachanguichic. Chaimantami cancunapish chai shinallatac causana canguichic. 8Pipac micunatapish mana yanga micurcanchicchu. Chaipac randica, imata mañashpa cancunata mana piñachingapacmi tutapish, punzhapish mana samarishpa, trabajashpa causarcanchic. 9Cancunaman imata mañashpapish, mañanallami carcanchic. Shina cacpipish ñucanchic ruhuashca shinallatac cancunapish ruhuachun nishpami, micungapacca trabajana carcanchic. 10Ñucanchic cancunahuan cashpaca: “Maijanpish mana trabajasha nicca ama micuchun” nishpami mandarcanchic. 11Ashtahuanpish cancunapuramanta maijancunataca mana trabajasha nishpa, shucpac causaipi satirishpa puric nictami uyarcanchic. 12Chai shina puriccunataca, Apunchic Jesuspac shutipimi causaipac micunata charingapacca cushicushpa trabajachun nishpa mandanchic.
13Shina cacpipish cuyashca criccuna, cancunaca allita ruhuanataca ama shaicuichicchu. 14Maijanpish cai quillcapi nishcata mana cazucta ricushpaca, pai pingaita charichunca ama tandaringuichicchu. 15Shina cacpipish ama piñaichicchu, ashtahuanpish shuc huauquita shina cunashpa rimangui.
Tucuchingapac allilla cashca cachun nishcamanta
16Sumac causaita cuc Apunchic Jesusllatac cancunapac tucui causaipipish, imapipish sumac causaita cuchun shinallatac tucui cancunahuan cashca cachun nishpami ninchic.
17Ñucaca Pablomi cani. Ñuca quiquin maquihuanmi: “Allilla cashca cachun” nishpa quillcani. Cashna cachac shinallatacmi, tucui quillcacunapi quillcashpa cachani. 18Ñucanchic Apunchic Jesucristoca tucui cancunaman paipac sumaimana cuyaita cushca cachun. Chashna cachun.
Currently Selected:
2 TESALONICENSES 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.