2 REYES 3
3
Israel llactata Joram mandashcamanta
1Jatun mandac Josafat chunga pusac huatata mandacucpimi, Acabpac churi Joramca Israel llactata mandai callarirca. Paica chunga ishcai huatatami Samaria llactataca mandarca. 2Mandac Diospac ñaupapica mana allitami ruhuarca. Chashna ruhuashpapish, paipac taita mama shinaca mana ruhuarcachu. Paica, paipac taita ruhuachishca Baal diostaca anchuchircami. 3Shina cashpapish, Nabatpac churi Jeroboam shinallatacmi paica tucui israelcunata juchata ruhuachishpa catirca. Chai juchamantaca mana anchurircachu.
Moabitacunata mishanata Eliseo huillashcamanta
4Moab llactata jatun mandac Mesaca achca animaltami charirca. Paica Israel llactata jatun mandac Acabmanca patsac huaranga maltón cari ovejacunata, patsac huaranga manarac rutushca ovejatami cuc carca. 5Shina cashpapish, Acab huañucpica, Moab llactata jatun mandac Mesaca Israel llactata jatun mandactaca mana cazurcachu. 6Chaimantami jatun mandac Joramca Samaria pueblomanta rishpa, tucui Israel llacta soldadocunata allichirichun nishpa huillamurca. 7Shinallatac Judá llactata jatun mandac Josafatman huillachun cachashpaca: «Moab llactata jatun mandacmi ñucata mana cazun. Canca ¿Moab llactapi causaccunahuan macanacungapac ñucahuan risha ninguichu?» nichunmi cacharca.
Shina nicpimi, Judá llactata jatun mandacca:
«Ari, rishallami. Ñucapish, canpish shuc shinallami canchic. Ñuca gentecunapish, cambac gentecuna shinami can. Ñuca caballocunapish, cambac caballocuna shinami can» nirca.
8Shinallatac: «¿Maitatac rishun?» nircami. Shina nicpimi Joramca: «Edom llacta shitashca pambatami rishun» nirca.
9Israel llactata jatun mandacpish, Judá llactata jatun mandacpish, Edom llactata jatun mandacpish rishpaca, canchis punzhatami shitashca pambata muyushpa rirca. Chaimantami yacuca soldadocunamanpish, caballocunamanpish ña tucurirca. 10Chaimantami Israel llactata jatun mandacca:
—¡Aij, Mandac Diosca cai quimsa jatun mandaccunataca moabitacunapac maquipi churangapacmi apamushca!— nirca.
11Shina nicpimi Josafatca:
—Mandac Diosman tapungapacca ¿Manachu pai ima nishcata huillac caipica tiyan?— nishpa tapurca.
Shina nicpimi, Israel llactata jatun mandacpac servicpuramanta shucca:
—Safatpac churi Eliseomi caipi causan. Paica Eliasta servicmi carca— nirca.
12Shina nicpi, Josafatca:
—Paica Dios ima nishcata huillangami— nirca.
Shina nicpimi, Israel llactata jatun mandacpish, Josafatpish, Edom llactata jatun mandacpish, Eliseopacman urai rircacuna. 13Chaipimi Eliseoca Israel llactata jatun mandactaca:
—¿Ñucaca canhuanca imatatac ricuna charini? ¡Cambac taita mamapac huillaccunapacman rilla!— nirca.
Shina nicpipish, Israel llactata jatun mandacca:
—Mana rishachu. Mandac Diosmi cai quimsa jatun mandaccunataca moabitacunapac maquipi churangapac tandachishca— nirca.
14Shina nicpimi Eliseoca:
—¡Ñuca servicuc tucuita Mandac Diospac shutipimi nini: Judá llactata jatun mandac Josafatta mana cazushpaca, cantaca mana uyaimanchu, ricunatapish mana ricuimanchu! 15Shina cashpapish, cunanca shuc arpapi tocac runata apamuichic— nirca.
Chai tocac runa ña tocai callaricpimi, Mandac Diospac poder Eliseopacman shamurca. 16Chaimantami Eliseoca: «Mandac Diosca: “Cai pugru pambapi yacu jundachun achca junducunata ruhuaichic. 17Ima huairata, ima tamyata cancunaca mana ricunguichicchu. Shina cashpapish, cai pugru pambapica yallitami yacuca jundanga. Shina jundacpica, soldadocunapish, caballocunapish, cancunapac huagracunapish ubiangami. 18Mandac Diosca mana chaillatachu ruhuanga. Ashtahuanpish moabitacunatapish cancunapac maquipimi churanga. 19Chaimantami jatun pircahuan muyundita jarcashca tucui pueblocunatapish, jatun pueblocunatapish tucui urmachishpa tucuchinguichic. Shinallatac tucui alli yuracunatapish pitishpami shitanguichic. Yacu llucshic junducunatapish tucuitami tapanguichic. Tarpuna allpacunapica rumicunatami jundachinguichic” ninmi» nirca.
20Tutamanta Diosman cushpa rupachina horasmi yacuca Edom llacta ñanta urai shamushpa, chai junducunapi jundarca.
21Moab llactapi causaccunaca quimsa jatun mandaccuna macanacungapac shamucushcata yachashpami, cunanlla macanacunata yachacucuc huambramanta callarishpa, tucui tandanacushpa Edom llacta linderopi shayarirca. 22Tutamanta moabitacuna jatarishpaca, yacu jundashcapi inti shitashpa pucayachishcatami carumanta ricurca. 23Chaita ricushpaca: «Caica yahuarmi. Chaica, jatun mandaccunami caishuc chaishuc macanacushpa, paicunapura huañunacushca canga. ¡Shina cashcamanta cunanca jacuchic, paicuna ima charishcacunata japishun!» nircacuna.
24Ashtahuanpish israelcunapac carpacuna ladoman chayacpica, israelcunaca macanacui callaricpimi, moabitacunaca paicunapac ñaupamanta miticushpa callparca. Shina callpacpimi, moabitacunataca tucui huañuchishpa, paicunapac pueblocunata tucuchirca. 25Pueblocunata llaquinayaita tucuchishpami, tarpuna allpacunapica rumicunata tucui jundachirca. Yacu llucshic junducunatapish tucuimi taparca. Alli yuracunatapish pitircami. Kir-hareset pueblollami mana ima tucushpa saquirirca. Shina cashpapish, huaracahuan macanacuccuna muyundita shayarishpami tucui tucuchirca.
26Moab llactata jatun mandacca macanacui sinchi tucucpimi, espadahuan macanacunata alli yachac canchis patsac soldadocunata tandachishpa, Edom llactata jatun mandac-huan macanacungapac shayarirca. Shina cashpapish mana pudircachu. 27Chaimantami paipac randi mandagricuc punta churita paipac diosman cushpa, pirca jahuapi tucuita rupachirca. Israelcunahuanca yallitami piñarirca. Chai quipaca jatun mandacpac ladomanta anchurishpami, paicunapac llactaman cutirca.
Currently Selected:
2 REYES 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.