Римлянэнгэ 14

Нашты́ тэ Сэндинэ́с Пэ́скирэ Пшалэ́с

1Манушэ́с, савэ́стэ нанэ зорало́ патяибэ́н, прилэ́н би пхучибнаскиро. 2Пал-дова́ со екхэскиро патяибэ́н дэ́ла во́ля лэ́скэ саро́ тэ хал, а ману́ш, савэ́стэ нанэ зорало́ патяибэ́н, мэк фэ́ни ёв тэ хал шаха (овошчы). 3Одова́, кон ха́ла, на сэндякир одолэ́с, кон на ха́ла; и кон на ха́ла, на сэндякир одолэ́с, кон ха́ла, пал-дова́ со Дэвэ́л прилыя́ и лэс. 4Кон ту адасаво́ сан, со ту сэндякирэса явирэ – хула́скирэ писхари́с? Ёв исын тэрдо́ ци пэрэ́ла анги́л пэ́скирэ хуластэ. И ёв нэвэ́стыр уштэ́ла, пал-дова́ со Дэвэ́л могинэ́ла тэ чхувэ́л лэс, соб (кай) ёв тэ явэ́л тэрдо́. 5Екх ману́ш гинэ́ла, со екх дывэ́с исын буты́р свэ́нто, сыр яви́р, а яви́р ману́ш гинэ́ла екх дывэ́с адя́кэ-паць, сыр и яви́р. Мэк кажно ману́ш тэ кэрэ́л саро́ пир пэ́скиро патяибэ́н. 6Одова́, кон гинэ́ла, со екх дывэ́с исын главнэдыр явирэстыр, гинэ́ла ваш Дэвлэ́скэ. И одова́, кон ха́ла, ха́ла ваш Дэвлэ́скэ, пал-дова́ со ёв парикирэла Дэвлэ́скэ пал дава́; и одова́, кон на ха́ла, ёв кэрэ́ла дава́ ваш Дэвлэ́скэ, и парикирэла Дэвлэ́скэ. 7Пал-дова́ со нико́н амэ́ндыр на дживэ́ла ваш пэ́скэ и нико́н на мэрэ́ла ваш пэ́скэ. 8Палдава́, ко́ли амэ дживаса, амэ дживаса ваш Дэвлэ́скэ; а ко́ли амэ мэраса, амэ мэраса ваш Дэвлэ́скэ: а палдава́, ци амэ мэраса, амэ ўса́ды (сак) сам Дэвлэ́скирэ. 9Ваш дава́ и мыя́ Христо́со, и отджидыя́, соб (кай) Лэ́скэ тэ явэ́л Ра́са-Дэвлэ́са и пэ джидэндэ и пэ мулэндэ. 10Нэ со ту сэндякирэса пэ́скирэ пшалэ́с? Ци и ту, со ту обракирэса пэ́скирэ пшалэ́с? Пал-дова́ со амэ сарэ́ ява́са тэ тэрдёвас анги́л Дэвлэ́скиро сэ́ндо.

Нашты́ тэ Змарэ́с Пшалэ́с Дромэ́стыр

11Палдава́ исын чхиндло́: “Мэ джива́ва, – ракирэ́ла Рай Дэвэ́л, – анги́л Ма́ндэ тэрдёна пэ чанга́ мануша́ кажнонэ́ родо́стыр и мануша́ пэ кажна чиба́ (чибья́) приджинэна, со Мэ сом Дэвэ́л.” 12Тэды кажно амэ́ндыр явэ́ла тэ отпхэнэл кокоро́ пал пэ́стэ анги́л Дэвлэ́стэ. 13На ява́са буты́р тэ сэндякирас екх екхэ́с; нэ фэды́р ява́са тэ думинас пал дова́, сыр тэ на домэкас пшалэ́скэ тэ змарэлпэ дромэ́стыр, тэ на злыджас пшалэ́с кэ грэ́хо. 14Мэ джино́м и патя́ва дрэ Растэ-Дэвлэ́стэ Исусо́стэ, со нанэ нисо́, соб (кай) тэ явэ́л нажужо кокоро́ пир пэ́стэ; нэ ко́ли ману́ш гинэ́ла вари-со нажужэса, тэды ваш лэ́стэ дова́ исын нажужо. 15Ко́ли тыро́ пшал холясо́ла пал хабэ́н, тэды ту кэрэ́са на пир ило́. На хасякир тырэ́ хабнаса одолэ́с, пал конэ́стэ Христо́со мыя́. 16Мэк мануша́ тэ на ракирэ́н чорипэ́н пал тумаро́ лачхипэ́н; 17пал-дова́ со Дэвлэ́скиро Кралипэ́н-дава́ исын на хабэ́н и пибэ́н, а чачипэ́н, рама́нё и ра́дыма пир Свэ́нто Ду́хо (Фа́но). 18Пал-дова́ со, кон адя́кэ дынаринэла Христосо́скэ, одова́ исын дрэ ра́дыма Дэвлэ́скэ и ёв исын мол шарибнаскэ манушэ́ндыр. 19Тэды ява́са тэ причхувас зор тэ кэра́с дова́, со лыджа́ла кэ рама́нё (миро) и кэ екх екхэскиро ґалыибэ́н. 20На хасякир Дэвлэ́скирэ рэ́нды ваш хабэ́н. Саро́ хабэ́н исын жужо́ (чысто); нэ фуес одолэ́ манушэ́скэ, кон ха́ла и далэ́са лыджа́ла явирэ манушэ́с кэ грэ́хо. 21Фэды́р тэ на хас мас, и тэ на пьес мол и тэ на кэрэ́с нисо́ дасаво, со́стыр тыро́ пшал могинэ́ла тэ змарэлпэ дромэ́стыр, соб (кай) тэ на злыджас пшалэ́с, ци тэ на кэра́с дова́, со́стыр ёв на могинэ́ла тэ зрикирэлпэ. 22Патяибэ́н, саво́ исын ту́тэ, исын ваш пэ́скэ анги́л Дэвлэ́стэ. Бахтало́ исын одова́ ману́ш, кон на сэндякирэ́ла пэс пал дова́, со ёв выкэдыя́. 23Нэ одова́, кон пиридуминэла, ко́ли ёв ха́ла, явэ́ла сэндякирдо, пал-дова́ со ёв кэрэ́ла на пир патяибэ́н; а саро́, со на пир патяибэ́н, исын грэ́хо. [ 24А Дэвлэ́скэ, саво́ дэ́ла зор тумэ́нгэ тэ патяс пир мири́ бахталы́ зан (звесь) и пир пхэныбэ́н пал Исусо́стэ Христосо́стэ пир чораханыбнаскиро откэрибэн, Саво́ сыс гарадо́ ґаратунэ́ бэршэ́ндыр, 25нэ Саво́ акана́ дыно́ тумэ́нгэ пир пророкэнгиро чхиныбэ́н и пир Дэвлэ́скиро ве́чно упхэныбэ́н и сыс роспхэндлы сарэ́ нацые́нгэ, соб (кай) сарэ́ могиндлэ́ тэ упатян и тэ кандэ́н, 26Екхджинэ́скэ и Най Годьварэдырэ Дэвлэ́скэ, пир Исусо́стэ Христосо́стэ тэ явэ́л сла́ва пэ сарэ́ ве́ки. Ами́нь.-р.с.]

Currently Selected:

Римлянэнгэ 14: ROMBALT

Highlight

Copy