Сыкадыипэ́н 1
1
1Сыкадыипэ́н (об΄явлениё) Исусо́стыр Христосостыр, Саво́ Дэвэ́л дыя́ Лэ́скэ тэ сыкавэ́л Пэ́скирэ писхарье́нгэ (рабэ́нгэ), со трэй сыг тэ явэ́л. И Христо́со пхэндя́ зорья́са дава́, ке́ли Ёв бичхадя́ Пэ́скирэ Янголо́с кэ Пэ́скиро писха́ри Иа́но (Иоано), 2саво́ пхэнэлас зорья́са Дэвлэ́скиро лав и Исусо́скиро Христосо́скиро допхэныбэ́н и дова́ саро́, со Иа́но дыкхця́. 3Бахтало́ исын одова́, кон гинэ́ла и шунэ́ла лава́ кадалэ́ ангилпхэныбна́стыр и рикирэ́лапэ долэ́скэ, со исын чхиндло́ дро дая́ лылвари́, пал-дова́ со часо явэ́ла сыг, ке́ли сарэ́ далэ́ чачипэна́ кэрэ́напэ.
“Паклоно” Эфта́ Кхангирье́гэ
4Иано́стыр эфта́ (битринэнгирэ дэшэ) кхангирье́нгэ, савэ́ исын дрэ Азия: Мэк бахталыпэ́н и рама́нё (миро) тэ явэ́л тумэ́нгэ Одолэ́стыр, Саво́ исын, Саво́ сыс, и Саво́ явэ́ла, и эфта́ духэ́ндыр, савэ́ исын анги́л Лэ́скиро троно; 5и Исусо́стыр Христосостыр, Саво́ исын патяибны́тко Якхи́тко (Свидетелё), Саво́ исын Пэ́рво, кон уштыя́ мулэ́ндыр и Саво́ исын Барыдыро́ пэ кралье́ндэ пир пхув. Лэ́скэ, Савэ́скэ яця́м дро́га амэ, Ёв отмэкця́ амарэ́ грэ́хи Пэ́скирэ ратэ́са, 6Саво́ создыя́ амэ́ндыр раша́нгиро Кралипэ́н тэ дынаринэ́л Лэ́скирэ Дэвлэ́скэ и Дадэ́скэ, мэк сла́ва и зоралыпэ́н тэ явэ́л пэ сарэ́ ве́ки. Ами́нь. 7Акэ, Ёв явэ́ла облокэ́нца, и кажно (сва́ко) ману́ш удыкхэ́ла Лэс, и кодолэ́, савэ́ пхусадэ́ Лэс чхурдыбнытконэ бустяса (копьёса) и сарэ́ пхувья́кирэ ро́ды явэ́на тэ дэн го́дла ясвэ́нца анги́л Лэ́стэ. Мэк адя́кэ тэ явэ́л. Ами́нь.” 8“Мэ сом Альфа и Омега, Англыпэ́н и Ко́нцо (Яго́ро), ракирэ́ла Рай Дэвэ́л, Сарэзорья́киро.” 9Мэ сом Иа́но, тумаро́ пшал, и мал (дру́го), кон исын кхэтанэ́ тумэ́нца дрэ би́да и дро кралипэ́н и кхэтанэ́ вырикирэ́ла пал Исусо́стэ Христосо́стэ. Мэ со́мас пэ о́строво (джип), саво́ кхарэ́лапэ “Патмосо” пал Дэвлэ́скиро лав и пал дова́, со мэ допхэна́вас манушэ́нгэ пал Исусо́стэ Христосо́стэ. 10Дро Ра́скирэ-Дэвлэ́скиро дывэ́с Ду́хо (Фа́но) лыя́ упралыпэ́н пэ ма́ндэ и мэ шундём пала́л зоралы́ зан, сави́ сы́рбы рого́стыр (труба́тыр) ракирдя́: 11“Мэ сом Альфа и Омега, Англыпэ́н и Ко́нцо (Яго́ро), дова́, со ту дыкхэ́са, чхин дрэ лылвари́ и бичха́в эфта́ кхангирье́нгэ, савэ́ исын [кэ Асия-р.с.]: дро Ефесо, дрэ Смирна, дро Пергамо, дрэ Фиатира, дро Сардисо, дрэ Филадэльфия и дрэ Лаодикия.” 12Мэ рисиём палэ тэ дыкха́в, кон ракирдя́ ма́нца, и дыкхцём эфта́ сувнакунэ́ момолытка (светильники), 13и машки́р эфта́ момолытка сыс вари-кон, Саво́ здэласпэ (сыс похожо) пэ Манушэ́стэ, Саво́ сыс дро длэнго урибэ́н кэ ґэра́, и сыс сувнакуны́ кусты́к трусця́л (кругом) Лэ́стэ: 14шэро́ и бала́ Лэ́скирэ сыс парнэ́ сыр са́мо парно́ тхан ци сыр ив, и Лэ́скирэ якха́ зяиндлэ сыр яг; 15и Лэ́скирэ ґэра́ сыс сыр харко́ма (медь), сави́ сыс пробиндлы дро бов, и Лэ́скири зан сыс сыр бутэ́-паненгирэ шоля; 16и сыс Лэ́стэ эфта́ чэргэня́ дро Лэ́скиро чачо́ васт, и Лэ́скирэ мо́стыр выджа́лас востро (чолалы́) дуе́-ригэ́нгири курта́ла (мечо), и Лэ́скиро муй зяинэлас сы́рбы кхам сарэ́ пэ́скирэ зорья́тыр. 17И ке́ли мэ дыкхцём Лэс, мэ пыём анги́л Лэ́скирэ ґэра́ сыр муло́. Ёв чхудя́ Пэ́скиро чачо́ (пра́во) васт пэ ма́ндэ, и пхэндя́: “На дар! Мэ сом Пэ́рво и Палатуно́ (Последнё), 18Мэ сом джидо́: и Мэ со́мас муло́, и, ґа́да, Мэ ява́ва тэ джива́в пэ сарэ́ бэрша́, Ма́ндэ исын клыдына мэрибнаскирэ люностыр (адостыр). 19Палдава́ чхин (рандэ), со ту дыкхця́н, со исын какана́, и кодова́, со явэ́ла тэ кэрэ́лпэ пало́ дава́, 20акэ, исын гарады зна́чыма пал дова́, со ту дыкхэ́са дро миро чачо́ васт и пал эфта́ сувнакунэ́ момолытка: эфта́ чэргэня́-дава́ исын Янго́лы эфта́ кхангирьендыр, и эфта́ момолытка-дава́ исын эфта́ кхангирья.
Currently Selected:
Сыкадыипэ́н 1: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
