Псалм 50
50
[49-р.с.] 1Асафоскиро Пса́лмо.
Дэвэ́л дэвлэнгиро, Сарэзорья́киро Рай Дэвэ́л пхэндя́ и кхарэ́ла сари́ пхув ягоро́стыр, кай кхам уштэ́ла и кэ яго́ро (краё), кай кхам джа́ла тэлэ́.
2Сионо́стыр, бидошэнгирэ шукарипнастыр, Дэвэ́л зазяиндя. 3Амаро́ Дэвэ́л явэ́ла и Ёв исын на штыл; яг, сави́ ха́ла саро́, джа́ла анги́л Лэ́стэ и явэ́ла древа́н штормитко балва́л. 4Ёв прикхарэла Болыбна́скиро Раё вучипна́стыр и пхув тэ сэндякирэ́л Лэ́скирэ манушэ́н: 5“Скэ́дэ Мирэн свэнтонэн кхэтанэ́ кэ Мэ, савэ́ кэрдэ́ Завето Ма́нца свэнтонэ́ дыибнаса (жэртваса).” 6Мэк тэ пхэнэ́л Болыбна́скиро Раё сарэ́нгэ пал лэ́скиро чачипэ́н, со Дэвэ́л Кокоро́ исын сэнда́ри! Сэ́ла. 7“Шунэ́н, Мирэ́ мануша́лэ; и Мэ ява́ва тэ ракира́в. Мэ ява́ва тэ допхэнав пэ ту́тэ, о Изра́иле, Мэ сом Дэвэ́л, сом тыро́ Дэвэ́л! 8Мэ на ява́ва древа́н тэ бангякирав тут пал тырэ́ свэ́нта дыибэна́, ци пал хачкирибнаскирэ свэ́нта яныбэна́, савэ́ исын усады (сак) анги́л Ма́ндэ. 9Мэ на ява́ва тэ лав гурувэ́н тырэ́ кхэрэ́стыр ци бузнэн (козлэн) тырэ́ ґуртэндыр, 10пал-дова́ со кажно рискирибна́скиро мурда́л (зверё) дро вэш исын миро, и мурда́л пэ бэ́рги, савэ́ исын тысёнцы. 11Мэ джино́м (джина́в) сарэ́ чириклен бэргэндыр и сарэ́ мурдалэ́н (жывотнонэн) пир Мирэ́ фэ́лды ёнэ исын Мирэ́: 12“Ко́ли мэ явавас бокхало, мэ на пхэнавас Ту́кэ: пал-дова́ со свэ́то исын Миро и саро́, со́са ёв исын пхэрдо́. 13Ци Мэ хава гурувэнгиро мас, ци Мэ пьява бузнэнгиро рат? 14Ян свэ́нто дыибэ́н парикирибнаса Дэвлэ́скэ и отдэ́ палэ Най Вучэдырэскирэскэ, пал со ту дыя́н совла́х. 15И кхар Ман дрэ дывэса́, ке́ли Ту́тэ исын бари дар, и Мэ зракха́ва тут, и ту барьякирэса кэ вучипэ́н Ман.” 16Нэ Дэвэ́л ракирэ́ла фуе́ манушэ́скэ: “Со́скэ ту ракирэ́са сарэ́нгэ пал Мирэ́ стату́ты, и ракирэ́са пэ́скирэ мо́са пал Миро Завето? 17а усае́кх ту́кэ древа́н исын на пир ило́ Миро сыклякирибэ́н пал чачипэ́н и ту чхурдэса Мирэ́ лава́ пал пэ́стэ? 18Ке́ли ту дыкхэ́са чорэс, тэды ту зджасапэ лэ́са и ту са́нас кхэтанэ́ одолэнца, савэ́ кэрэ́на биладжаипэ́н. 19Ту дэ́са во́ля пэ́скирэ москэ тэ ракирэ́л чорипэ́н и пэ́скирэ чибакэ (чибьякэ) тэ счхувэл хохаибэ́н. 20Ту сан бэшто́ и ракирэ́са пэ пэ́скирэ пшалэ́стэ: ту бангякирэса хоханэ́с тырэ́-да́кирэ чхавэ́с. 21Ту кэрдя́н Дава́ и Мэ со́мас штыл (тихо); ту думиндян, со Мэ сом адасаво́, сыр ту сан. Нэ Мэ сыкава́ва тыри́ банг и чхува́ва дава́ екх пал екх анги́л тырэ́ якха́. 22Подуминэн пал дава́ тумэ́, кон бистрэла Дэвлэ́с, соб (кай) Мэ тэ на роскушав тумэн, со на явэ́ла никонэ́с тэ зракхэ́л тумэн. 23Кон парикирэла Дэвлэ́скэ свэнтонэ́ яныбнаса, кодова́ славинэла Ман и Мэ сыкава́ва лэ́скэ, сыр Дэвэ́л зракхэ́ла лэс, и саво́ придыкхэла пал пэ́стэ тэ дживэ́л пир чачипэ́н.
Currently Selected:
Псалм 50: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
