Псалм 33
33
[32-р.с.] 1Тумэ́, сарэ́ чачипнаскирэ, радынэ́нпэ и бага́н Ра́скэ-Дэвлэ́скэ; дава́ исын мишто́, соб (кай) чачипнаскирэ тэ шарэ́н Лэс. 2Башавэн Ра́скэ-Дэвлэ́скэ пэ гусли тэ парикирэ́н Лэ́скэ; бага́н Лэ́скэ пэ дэшэ́-балытко арфа. 3Бага́н Лэ́скэ нэви́ гилы́; башавэ́н ра́нгирэс и лошалён (радынэ́нпэ) зоралэ́с. 4Пал-дова́ со Ра́скирэ-Дэвлэ́скиро лав исын чачуно́, и Ёв кэрэ́ла саро́ пир чачипэ́н. 5Ёв радынэ́лапэ чачипнастыр и сэндостыр: Ра́скирэ-Дэвлэ́скирэ чачипна́са исын пхэрды́ пхув. 6Болыбэ́н сыс создыно́ Ра́скирэ-Дэвлэ́скирэ лавэ́стыр, болыбна́скиро свэ́то сыс создыно́ пхурдыпнаса Лэ́скирэ мо́стыр. 7Ёв скэдэ́ла морьенгирэ паня́ дро екх штэ́то, Ёв чхувэ́ла паненгиро хорипэ́н сы́рбы дрэ кхэлтра (погребо). 8Мэк сари́ пхув тэ страхадёл Ра́стыр-Дэвлэ́стыр; мэк сарэ́ джиибна́скирэ пэ пхув тэ издран анги́л Лэ́стэ. 9Ке́ли Ёв пхэндя́, и саро́ кэрдя́пэ; ёв дыя́ припхэныбэ́н и саро́ яця́. 10Рай Дэвэ́л на дэ́ла во́ля Наюдытконэ́ нацыенгэ тэ кэрэ́н, со ёнэ задуминэна пэ́скэ: Ёв на домэкэла манушэ́н тэ кэрэ́н пир пэ́скирэ планы. 11Дэвлэ́скирэ ду́мы ячэ́напэ пэ сарэ́ ве́ки, лэ́скиро задумибэн сарэ́ родэ́нгэ. 12Бахталы́ исын нацыя, конэ́скиро Дэвэ́л исын Рай Дэвэ́л; бахталэ́ исын мануша́, савэ́н Ёв выкэдыя́ сыр Пэ́скирэ чхавэ́н. 13Рай Дэвэ́л роздыкхэла болыбна́стыр: Ёв дыкхэ́ла сарэ́ манушытконэ́ чхавэ́н. 14Ёв дыкхэ́ла пэ сарэ́ джиибнаскирэндэ пэ пхув Лэ́скирэ штэто́стыр. 15Ёв чхувэ́ла годы́ и во́ля дро лэ́нгиро ило́, Ёв дыкхэ́ла саро́, со ёнэ кэрэ́на. 16Ние́кх кра́ли на лэ́ла упралыпэ́н, ко́ли лэ́стэ исын бут халадэ́, ние́кх зорало́ ману́ш на лэ́ла упралыпэ́н, ко́ли лэ́стэ исын бари зор, 17Грай исын харты́тко (напро́чно) наде́я тэ явэс бидаракиро; лэ́скиро баро́ зоралыпэ́н на могинэ́ла тэ зракхэ́л. 18Чачэс, Ра́скирэ-Дэвлэ́скири якх исын пэ одолэ́ндэ, савэ́ндэ исын трашаибэ́н анги́л Лэ́стэ и пэ одолэ́ндэ, конэ́стэ исын наде́я пэ Лэ́скири лачхэ́-илы́ткима, 19со Рай Дэвэ́л зракхэ́ла Лэ́нгиро ди мэрибна́стыр и Ёв явэ́ла тэ ракхэ́л лэн джидэнца, сыр явэ́ла бокх. 20Амаро́ ди рикирэ́ла наде́я пэ Растэ-Дэвлэ́стэ; Ёв дэ́ла васт амэ́нгэ и Ёв исын амаро́ шчы́то. 21Амаро́ ило́ явэ́ла тэ радынэ́лпэ Лэ́стыр, пал-дова́ со амэ зоралэ́с патя́са дро лэ́скиро свэ́нто лав. 22Мэк тэ явэ́л Тыри́ лачхэ́-илы́ткима пэ амэ́ндэ, о Раё Дэ́вла, со амэ ужакираса лачхипэ́н Ту́тыр.
Currently Selected:
Псалм 33: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
