Псалм 118
118
[117-р.с.] 1Парикирэ́н Ра́скэ-Дэвлэ́скэ, пал-дова́ со ёв исын лачхо́! Пал-дова́ со Лэ́скири ла́ска явэ́ла пэ сарэ́ ве́ки. 2Мэк Израилёскиро кхэр тэ пхэнэ́л акана́: “Лэ́скири ла́ска ячэ́лапэ пэ сарэ́ ве́ки.” 3Мэк Ароноскиро кхэр тэ пхэнэ́л какана́, со Лэ́скири лачхэ́-илы́ткима ячэ́лапэ пэ сарэ́ ве́ки. 4Мэк одолэ́, савэ́ дарэ́на Ра́стыр-Дэвлэ́стыр тэ пхэнэ́н какана́, со Лэ́скири лачхэ́-илы́ткима ячэ́лапэ пэ сарэ́ ве́ки. 5Мэ кхардём Рас-Дэвлэ́с барэ́ дара́тыр (дарьятыр), Ёв отпхэндя́ ма́нгэ и вылыджия́ пэ баро́ штэ́то. 6Рай Дэвэ́л исын пал ма́ндэ, Мэ на ява́ва тэ дарав, со ману́ш могинэ́ла тэ кэрэ́л ма́нгэ. 7Рай Дэвэ́л исын пал ма́ндэ машки́р одолэ́ндэ, савэ́ дэ́на васт ма́нгэ: мэ дыкха́ва, сыр пэрэ́на одолэ́, савэ́ бидыкхэна. 8Дава́ исын фэды́р тэ ґарадёс тэ зракхэспэ пал Растэ-Дэвлэ́стэ, сыр тэ ґарадёс тэ зракхэспэ пал манушэ́стэ. 9Дава́ исын фэды́р тэ ґарадёс тэ зракхэспэ кэ Рай Дэвэ́л, сыр тэ рисёс тэ зракхэспэ кэ тхага́рья. 10Сарэ́ Наюды́тка на́цыи обгинэ трусця́л ма́ндэ, нэ мэ хасякира́ва лэн Ра́скирэ-Дэвлэ́скирэ лавэ́са. 11Ёнэ обгинэ трусця́л ма́ндэ, чачо́, обгинэ трусця́л ма́ндэ; нэ мэ хасякира́ва лэн Ра́скирэ-Дэвлэ́скирэ лавэ́са. 12Ёнэ обгинэ трусця́л ма́ндэ сыр бырлиня (пчолы), и ёнэ мурдинэ сыр яг дрэ хру́сты сувьенца; нэ мэ хасякира́ва лэн Ра́скирэ-Дэвлэ́скирэ лавэ́са. 13Ёнэ шпулдэ (толкиндлэ) ман и пэкадэ тэ пэрав; нэ Рай Дэвэ́л дыя́ васт ма́нгэ. 14Рай Дэвэ́л исын миро зоралыпэ́н и мири́ гилы́ радыма́са и Ёв зракхця́ ман. 15Шунэ́н заня́ радыма́са пал зракхибэ́н дрэ ша́тры, кай исын Дэвлэ́скирэ мануша́. 16Чачо́ васт Ра́скирэ-Дэвлэ́скиро ґаздыно́, чачо́ васт Ра́скирэ-Дэвлэ́скиро пиризорьякирэла. 17Мэ на мэра́ва, нэ мэ ява́ва тэ джива́в и тэ роспхэнав пал Ра́скирэ-Дэвлэ́скирэ бутя́. 18Рай Дэвэ́л пхарэ́с сыклякирдя́ ман, нэ Ёв на дыя́ ман мэрибна́скэ. 19Отпхандэн (псиравэ́н) ма́нгэ по́рта, кай заджа́на чачипнаскирэ, мэ джа́ва андрэ́, и мэ ява́ва тэ шара́в зоралэ́с и тэ парикира́в Ра́скэ-Дэвлэ́скэ. 20Дава́ исын по́рта кэ Рай Дэвэ́л: чачипнаскирэ заджа́на пир ла́тэ. 21Мэ ява́ва тэ парикира́в Ту́кэ, пал-дова́ со Ту отпхэндян ма́нгэ и Ту зракхця́н ман. 22Бар, Саво́ на прилынэ́ бутярнэ́, яця́ шэралэ́ барэса ваш кэрибэн кхэри́тко: 23дава́ яця́ Дэвлэ́стыр, дава́ исын дивно дрэ амарэ́ якха́. 24Дава́ исын дывэ́с, дро саво́ Рай Дэвэ́л адя́кэ кэрдя́, амэ ява́са тэ радынаспэ и амэ ява́са бахталэ́. 25Зра́кх ман, Раё Дэ́вла, мэ зоралэ́с манга́ва Тут! Раё Дэ́вла, мэ зоралэ́с манга́ва Тут, бахталякир амаро́ джиибэ́н. 26Бахтало́ исын одова́, саво́ явэ́ла Ра́скирэ-Дэвлэ́скирэ лавэ́стыр. Амэ бахтякирдям тумэн Ра́скирэ-Дэвлэ́скирэ Кхангирья́тыр. 27Рай Дэвэ́л исын амаро́ Дэвэ́л и Ёв дыя́ дуд амэ́нгэ: пхандэн свэ́нта дыибэна́ шэлэнца кэ алтарёскирэ шынга́ (ро́ги). 28Ту сан миро Дэвэ́л и мэ ява́ва тэ шара́в кэ вучипэ́н Тут, Миро Дэ́вла! Мэ ява́ва тэ парикира́в Ту́кэ. 29Парикирэ́н Ра́скэ-Дэвлэ́скэ, пал-дова́ со Ёв исын лачхо́: пал-дова́ со Лэ́скири лачхэ́-илы́ткима ячэ́лапэ пэ сарэ́ ве́ки.
Currently Selected:
Псалм 118: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
