Притчы 9
9
Годыпэ́н и Дылныпэ́н
1Годыпэ́н чхудя́ пэ́скиро кхэр, ёв вычингирдя пэ́скэ эфта́ (битринэ́нгиро дэш) сты́лбы; 2ёв чхиндя́ пэ́скирэ мурдалэ́н (жывотнонэн), ёв змешындя пэ́скири мол (вино), ёв адя́кэ-паць кэрдя́ пэ́скиро сками́нд (хабэ́н). 3Годыпэ́н бичхадя́ анги́л пэ́скирэ дынарицэн, ёв кхарэ́ла кэ пэ най вучэдыршонэ штэтэ́ндыр дро фо́ро: 4“Кон исын набарэ́ – годя́киро, рисёв адари́к.” Одолэ́скэ, саво́ бут на ґалёла, годыпэ́н пхэндя́: 5“Явэ́н, хан миро маро́ и пьен мол (вино), сави́ мэ змешындём. 6Мэкэ́н дылныпэ́н, соб (кай) тэ дживэ́н, псирэ́н годьварэ́ дромэ́са.” 7Ману́ш, кон сыкавэ́ла банг явирэ манушэ́скэ, саво́ сыкавэ́ла напатыв кэ яви́р мануша́, прилэ́ла ладжаипэ́н пэ пэ́стэ; кодова́ ману́ш, кон бангякирэла чорэ́ манушэ́с, дорэсэ́ла дош пэ́скэ. 8На сыка́в банг кодолэ́скэ, саво́ сыкавэ́ла напатыв кэ яви́р мануша́, соб (кай) ёв тэ на бидыкхэл тут: сыка́в банг годэ́ манушэ́скэ и ёв явэ́ла тэ сыкавэ́л паты́в ту́кэ. 9Подсыклякир годэ́ манушэ́с, и ёв явэ́ла годэдыр, сыкля́кир чачунэ́ (вортэ) манушэ́с и лэ́стэ явэ́ла бутэды́р джиныбэ́н. 10Англэды́р трэй тэ дарэс Ра́стыр-Дэвлэ́стыр, соб (кай) тэ явэс годо́: и джиныбэ́н пал Свэнтонэ́ Растэ-Дэвлэ́стэ, дэ́ла хор розлыибэн (розґалыибэн). 11Мэ, годыпэ́н Ра́стыр-Дэвлэ́стыр, дава́ буты́р дывэса́ ту́кэ тэ дживэ́с, и дава́ бутэды́р бэрша́ кэ тыро́ джиибэ́н. 12Ко́ли ту сан годо́, ту сан годо́ ваш пэ́скэ, ко́ли ту сыкавэса бипатыв кэ мануша́, ту кокоро́ явэ́са тэ тугинэс (тэ пиридживэс) пал дава́. 13Дылынинько джувлы́ нахратэс ракирэ́ла; ёй исын простонэ-годякири, и на джинэ́ла нисо́. 14И ёй исын бэшты пашы́л вуда́р ла́кирэ кхэрэ́скиро, ци пэ банко пэ вучэ́ штэ́ты дро фо́ро, 15соб (кай) тэ кхарэл кэ пэ одолэ́н, савэ́ джа́на пашы́л, савэ́ джа́на маму́й пэ́скирэ дромэ́са: 16Кон исын набарэ́-годя́киро, рисёв адари́к. Кодолэ́скэ, саво́ на́бут ґалёла, ёй ракирэ́ла: 17“Чордо пани́ исын гудло́, и маро́, саво́ ха́на чораханэ́с, исын дро́го.” 18Нэ кадалэ́ мануша́ на джинэ́на, со мынэ́ мануша́, кон гия́ кэ ёй, со ла́кирэ гости исын хор паштэ́ дро лю́но (адо).
Currently Selected:
Притчы 9: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
