Ниеми́я 4
4
Ва́нта Зракхэ́ла Лэн Вэргэ́ндыр
1Ке́ли шундя́ о Санавалато, со амэ кэрасас ва́нта, то холя́сыя ёв и бут ту́ги лыя́, и ёв саласпэ Юдэндыр; 2и ракирлас пашы́л пэ́скирэ пшалэ́ндэ и пашы́л Самаритка халадэ́ндэ, и пхэндя́: “Со кэрэ́на адалэ́ чорорэ́ Юдэи? Нау́што (неуж) лэ́нгэ дова́ домэкэна? Нау́што лэ́на ёнэ тэ янэ́н свэ́нто дыибэ́н? Нау́што ёнэ вари-ке́ли скэрна саро́? Нау́што ёнэ ґаздэ́на прахостыр, отджидякирэна хачкирдэ́ бара́?” 3О Товия Амонитянино, кон сыс пашы́л лэ́стэ, пхэндя́: “Мэк тэ кэрэ́н лэ́нгэ, джа́ла локхны (лиса), и пхагирэ́ла лэ́нгири баруны ва́нта. 4Шун, амаро́ Дэ́вла, дрэ сави́ напатыв амэ сам, обрискир кошыбэ́н лэ́нгиро пэ лэ́нгиро шэро́, отдэ́ лэ́нгэ дрэ напатыв пэ пленытко пхув; 5и на учхакир лэ́нгирэ бизаконытка рэ́нды, и, мэк грэ́хо лэ́нгиро тэ на выкхосэлапэ анги́л Тыро́ муй, пал-дова́ со ёнэ кэрдэ́ киркипэн бутярьенгэ! 6Акэ, адя́кэ амэ кэрдя́м ва́нта, и сыс сари́ ва́нта кэ паш вучипэ́н ла́киро. И э мануша́ камэнас тэ кэрэ́н буты́ миштэ́с. 7Ке́ли шундя́ и Санавалато, и о Товия, и Аравитяни, и Амонитяни, и Азотяни, со Ерусалимо́скирэ ва́нты (сцяны) ґаздынэ́ исын упрэдыр, со пхагирдэ́ штэ́ты закэрнапэ, то ваш лэ́нгэ сыс бари ту́га. 8Доракирдэпэ ёнэ сарэ́ кхэтанэ́ тэ джа́н марибна́са пэ Ерусалимо, и тэ пхагирэн тэлэ́ лэс. 9И амэ мангдямпэ Дэвлэ́скэ амарэскэ, и чхудя́н проти лэ́ндэ э стрэ́га дывэсы́тко и рати́тко, соб (кай) тэ зракхаспэ амэ́нгэ лэ́ндыр. 10Нэ Юдэи пхэндлэ́: “Тыкныя зор лыджаибнарьенгирэндэ и шума (мусоро) исын бут; амэ́ндэ нанэ зор тэ кэра́с ва́нта. 11Амарэ́ вэ́рги ракирэ́нас: “На уґалёна и на дыкхэ́на, сыр амэ екха́тыр (сра́зу) заджасам машки́р лэ́ндэ, и пиримарасам лэн, и тэрдякирасам буты́. 12Ке́ли явэ́нас Юдэя́кирэ, савэ́ дживдэ́ пашы́л лэ́ндэ, и ракирэ́нас амэ́нгэ дэшвар сарэ́ штэтэ́ндыр, со кодолэ́ пэрна пэ амэ́ндэ: 13Тэ́ньци пэ тэлутунэ штэ́ты пашы́л фо́ро, палэ ва́нта, пэ шукэ́ штэ́ты чхувавас мэ о народо пир дадэ́скири-сэмэ́нца (пле́ми) курталэнца лэнгирэнца, э чхурдыибнытконэ бустенца, и лукэнца лэнгирэнца. 14И обдыкхцём мэ, и уштыём, и мэ пхэндём э славутнэнгэ, и барыдырэ́нгэ, и явирэ манушэ́нгэ: “На даран лэ́ндыр; рипирэ́н Рас-Дэвлэ́с барэс и трашадэс и марэ́нпэ палэ пэ́скирэ пшалэ́ндэ, пал пэ́скирэ чхавэ́ндэ, и палэ чхаендэ, пал пэ́скирэ джувлендэ и пал пэ́скирэ кхэра́.” 15Сыр дава́ шундлэ́ амарэ́ вэ́рги (вроги), со амэ́нгэ сыс джиндлэ́ лэ́нгирэ планы, то тэ́ньчи о Дэвэ́л пхагирдя́ лэ́нгиро годыпэ́н, и сарэ́ амэ рисиям кэ ва́нта, кажно кэ пэ́скири буты́. 16Кодолэ́ дывэсэ́стыр паш тэрнэ́ муршэндыр ма́ндэ кэрдэ́ буты́, и яви́р паш лэ́ндыр рикирэнас чхурдыибнытка бустя́ (коп΄и), шчы́ты и луки и панцыри (латы); и барыдыра́ сыс пала́л пал саро́ Юда́скиро кхэр. 17Кон кэрдя́ ва́нта и кон янэлас пхарипэна пэ пэ́стэ, савэ́ чхудэ́ пэ лэ́ндэ, екхэ вастэ́са ёнэ кэрдэ́ буты́, и явирэса рикирдэ о чхурдыибнытко буст (дрото). 18Кажно бутярьендыр рикирэлас курта́ла пэ кусты́к пашы́л пэ́стэ, и адя́кэ ёнэ кэрдэ́ буты́. Пашы́л ма́ндэ сыс о рогоскиро (трубачо). 19И мэ пхэндём славутнэнгэ и барыдырэ́нгэ и явирэ манушэ́нгэ: буты́ исын бари и буґлы, амэ сам дур екх явирэстыр пир ва́нта; 20палдава́, каты́р тумэ́ шунэ́на знико (звуко) рогоскиро, дро дова́ штэ́то кэдэнпэ кэ амэ; о Дэвэ́л амаро́ явэ́ла тэ марэ́лпэ пал амэ́ндэ. 21Адя́кэ амэ кэрдя́м буты́; и паш амэ́ндыр рикирдя чхурдыибнытка бустя́ (друты) зорицакирэ ґаздыпнастыр кэ чэргэнэнгиро явибэн. 22Упра́л далэ́стыр, дро дова́ часо мэ пхэндём манушэ́нгэ, соб (кай) ёнэ тэ ратькирэн дро Ерусалимо сарэ́ пэ́скирэ писхарье́нца, и тэ явэ́н ёнэ амэ́ндэ ратя́киро пэ стрэ́га, а дывэсэ́ пэ буты́. 23Ни-да мэ, ни-да мирэ́ пша́ла, ни-да дына́рья мирэ́, ни-да стрэгарья, савэ́ сыс ма́нца, на злэнас пэ́стыр урибэ́н лэ́нгиро, каждонэстэ сыс тэло васт курта́ла и пани́.
Currently Selected:
Ниеми́я 4: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
