Ио́во 16
16
Ио́во Бангякирэла Пэ́скирэ Битангипнаскирэ Малэн
1И отпхэндя́ Ио́во лавэ́нца: 2“Мэ шундём бут кадалэ́ чачипэна́; тумэ́ сан бэдытка подрикирибнаскирэ.” 3Ци явэ́ла ко́нцо (яго́ро) пэ далэ́ балвалитка лава́? Ци, со шпулэла (пихинэла) тут тэ отпхэнэс адя́кэ ма́нгэ? 4Мэ адя́кэ-паць могинавас тэ ракира́в, сыр ту: ко́ли тэ явэс пэ миро штэ́то. Мэ могинавас тэ скэдав лава́ пэ ту́тэ, и тэ тринскирав шэрэ́са пэ тумэ́ндэ; 5нэ мэ подрикиравас мирэ́ лавэ́нца, и мирэ́-уштэнгиро раманипэн (миро) локхякирэлас тырэ́-илэскири дукх. 6Мэк мэ и ракира́ва, мирэ́-илэскири дукх на локхия, и мэк мэ пириячава, ци ма́нгэ исын локхэды́р? 7Нэ акана́ Дэвэ́л кэрдя́ адя́кэ, со мэ сом кхинякирдо; Ту, Дэ́вла, хасякирдян сари́ мири́ сэ́м΄я (ири́); 8Ту кэрдя́н адя́кэ, со мэ сом саро́ дрэ моршки и дава́ исын досыкаибэн пэ ма́ндэ. Ту вышутькирдян ман дрэ петрёнка (измождёно) – и дава́ адя́кэ-паць исын досыкаибэн, кон допхэнэ́ла пэ ма́ндэ. 9Дэвэ́л кушэла ман Пэ́скирэ холякирибнастыр и Ёв бидыкхэла ман; Ёв рискирэ́ла скрежэтаса Пэ́скирэ данда́ пэ ма́ндэ. Миро вэ́рго востринэла пэ́скирэ данда́ пэ ма́ндэ. 10Э мануша́ путравэна пэ́скирэ якха́ пэ ма́ндэ, ёнэ пэкавэна ман пир чхама (шчоки), бангякири, ёнэ кэдэнапэ кхэтанэ́ пэ ма́ндэ. 11Дэвэ́л пиридыя ман надэвлытконэнгэ, и чхурдыя́ ман дрэ фуе́-манушэ́нгирэ васта́. 12Мэ дживдём штылэ́с, нэ Дэвэ́л запхагирдя ман, Ёв адя́кэ-паць лыя́ ман пал мэн и ростринскирдя ман пэ котэра́, и Ёв чхудя́ ман сыр бакрэ́с тэ дэн карье. 13Лэ́скирэ карье́-дыибнаскирэ (стрельцы) обгинэ трусця́л ма́ндэ, Ёв промардя миро ило́, и Ёв на тангинэла ман. Ёв вычхувэла миро жэлучо пэ пхув. 14Ёв пхагирэ́ла ман рискирибнаса дрэ маса́ екх пал екх; Ёв прастала пэ ма́ндэ, сы́рбы Ёв исын зоралыпнаскиро марибны́тко. 15Мэ сыдём пэ́скэ жалобно гоно́ пэ мири́ цы́па, и чхудём пэ́скиро шэро́ дро пра́хо. 16Миро муй исын лоло́ ясвэндыр, и пэ мирэ́ цымблы исын мэрибнаскири зэр (тень), 17мэк и нанэ нахрата рэ́нды пэ мирэ́ васта́, и мири́ па́тери (моли́тва) исын бидошэнгири.”
Ио́во раки́рла, со лэ́стэ исын якхи́тко пэ болыбэ́н
18Э пхув! На чхакир миро рат, и мэ тэ явэ́л шундлы мири́ го́дла. 19Ѓа́да, акана́, исын миро Якхи́тко пэ болыбэ́н, и дава́ исын Ёв, Кон затэрдёла пал ма́ндэ. 20Мирэ́ мала́ санапэ холямэс ма́ндыр, мирэ́ якха́ чхувэ́на ясва кэ Дэвэ́л. 21О, соб (кай) тэ явэ́л вари-кон тэ мангэ́л зоралэ́с пал манушэ́стэ анги́л Дэвлэ́стэ, сыр и ману́ш мангэ́ла зоралэ́с пал лэ́скирэ пашатунэстэ. 22Пал-дова́ со сыг явэ́ла ко́нцо (яго́ро) пэ кадалэ́ бэрша́, Мэ джа́ва дромэ́са одори́к, каты́р нанэ рисибэн.”
Currently Selected:
Ио́во 16: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
