Ио́во 14
14
1О ману́ш, савэ́с джувлы́ бияндя́, дживэ́ла наґара, и лэ́стэ исын бут пхарипэна пэ ило́. 2Ёв выбарьёла сыр лулуди́ (цвэто) и лэс чингирэна тэлэ́; и ёв нашэла криг сыр зэр (тень) и буты́р лэс нанэ. 3Ци откэрэса Ту Пэ́скирэ якха́, Дэ́вла, пэ екхэ́стэ кадасавэстэ, сыр мэ; и ци лыджа́са Ту ман пэ сэ́ндо Пэ́са? 4Ци сашты́ тэ бияндёл бидошэ́нгиро ману́ш манушэ́стэ дошэнца? Ние́кх! 5Ко́ли лэ́скирэ дывэса́ ангилпхэндлэ, и лэ́скирэ-джиибна́скирэ дывэса́ исын джиндлэ́ Ту́кэ; и Ту ґаздыян вучэ́с лэ́скэ ме́жы, соб (кай) ёв нашты́ тэ пириджал лэн, 6тэды Ту рисёв лэ́стыр; и мэк ёв тэ откхинёл анги́л дава́, сыр ёв кончынэла, сыр андынаршчыко (наёмнико) пэ́скиро дывэ́с. 7Пал-дова́ со исын наде́я ваш кашт: ко́ли ёв чингирдо тэлэ́, ёв барьёла нэвэ́стыр, и лэ́скирэ сэнки (сучки) на хасёна; 8и мэк лэ́скиро корнё (рукх) пхурьёла дрэ пхув, и лэ́скиро корчо кирнёла дрэ пхув; 9нэ ко́ли ёв чхуиндя (шундя́) пани́, тэды ёв мэкэ́ла бутоны, и лэ́скирэ рандя́ выбарьёна сыр нэво́ выбарьякирибэн. 10Нэ ману́ш мэрэ́ла и роспэрэлапэ; ґа́да-лэ́скэ ко́нцо (яго́ро), и кай ёв исын? 11Паня́ нашадёнапэ зеростыр, и рэка (лэнь) пириячэ́ла тэ тхадэл: 12адя́кэ-паць и ману́ш пасёла и на уштэ́ла палэ. Анги́л дава́, сыр кончынэнапэ дава́ болыбэ́н, ёнэ на джангадёна, на уштэна пэ́скирэ соибнастыр. 13О, соб (кай) Ту, Дэ́вла, тэ гаравэсас ман дро лю́но (преисподня), соб (кай) Ту тэ рикирэс ман чораханэ́с, пака Тыри́ холы́ джа́ла пэ́скэ, соб (кай) Ту тэ ангилпхэнэс ма́нгэ часо, со Ту дыя́н ма́нгэ, и тэ рипирэс ман. 14Ко́ли ману́ш мэрэ́ла, ци отджидёла ёв нэвэ́с? Мэ ужакиравас сарэ́ дывэса́, дрэ савэ́ мэ кэрдём пхари́ буты́ адя́кэ ґара́, сыр явэ́ла локхэды́р ма́нгэ: 15Ту кхарэсас ман, и мэ отпхэнавас Ту́кэ; соб (кай) Ту́тэ древа́н камэсас тэ дыкхэ́с ман, конэ́с Ту создыян. 16Пал-дова́ со акана́ Ту гинэса мирэ́ шаги (ламня): соб (кай) ту тэ на дыкхэ́с ракхибны́ткэс пэ мирэ́ грэ́хи? 17Мирэ́ чорэ́ рэ́нды исын пхандлэ пэ якхи́тко (чэргэнори́) дро капшуко, и Ту запхандэса саро́ миро чорипэ́н. 18И, чачо́; сыр бэ́рги пэрэ́на и роспхарадёна сарэ́са, и ска́ла кхарэ́лапэ (зджа́ла) пэ́скирэ штэто́стыр, 19а паня́ роскэрэна пэ на́бут (куты́) бара́, и барэ́ панинга́ выморэна пыло пхувья́тыр, адя́кэ-паць ту хасякирэса манушэскири наде́я. 20Ту прилэса упралыпэ́н пэ лэ́стэ пэ ўса́ды (сак), и ёв уджала сарэ́са; Ту парувэса лэ́скиро муй и бичхавэса криг лэс. 21Тэ ячэн лэ́скирэ чхавэ́ дрэ паты́в, – ёв на джинэ́ла, ци ко́ли телякирэна лэ́скирэ чхавэ́н, – ёв на роздыкхэла дава́. 22Нэ адя́кэ ґара́ (длу́гэс), сыр лэ́скирэ маса́ (лоч) исын джидэ́, ада́кицы явэ́на и дукха́ лэ́стэ, и лэ́скиро ди явэ́ла зоралэ́с тэ тугинэл.”
Currently Selected:
Ио́во 14: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
