Ереме́ё 17
17
Юдэя́киро Грэ́хо и Пхаро́-Розплэскирибэн
1“Юдэя́киро грэ́хо исын чхиндло́ саструнэ́ далтаса (резцоса), диамантытконэ (алмазытконэ) чхиныбнытконэса исын вычхиндло пэ лэ́нгири таблица пэ ило́ и пэ алтарёскирэ шынга́. 2Пал-дова́ со лэ́нгирэ чхаворэ́ рипирэна лэ́нгирэ алта́ри и лэ́нгирэ дэмбитка вэладиня (рошчы) [и лэ́нгирэ и́долы Ашэрахи#17.2 Ашэр/Ашэрах исын дасави́ идолытко дэвэлны сыр Астарта.-ю.о.], савэ́ исын пашы́л зэлэна дрэвы пэ вучэ́ бэ́ргицы, 3то Мири́ бэ́рга пэ фэ́лда, миштыпэ́н тыро́, саро́ барвалыпэ́н Мэ отда́ва тэ чорэн, и адя́кэ-паць вучэ́ штэ́ты пал грэ́хи пэ пхув кэ яго́ры. 4И тумэ́ кокорэ́ отдэна мэкно́ миштыпэ́н, саво́ Мэ отдыём тумэ́нгэ: и Мэ кэра́ва адя́кэ, со тумэ́ явэ́на тэ дынаринэ́н тумарэ́ вэргэ́нгэ пэ пхув, сави́ тумэ́ на джинэ́на: пал-дова́ со тумэ́ росхачкирдэ Мирэ́ – холякири яг; ёй явэ́ла тэ хачол пэ сарэ́ ве́ки. 5И дава́ Мэ, Рай Дэвэ́л, ракира́ва: “Тэ явэ́л прокошыбэ́н (арман)” пэ манушэ́стэ, саво́ допатяла зоралэ́с дрэ манушэ́стэ, и саво́ кэрэ́ла пэ́скирэ лочятыр (плотятыр) чачо́ васт, и савэскиро ило́ дурьёла Ра́стыр-Дэвлэ́стыр. 6Ёв явэ́ла сы́рбы ялоўцо (вереско) пэ чхучэ́ прахи, и ёв на удыкхэ́ла, ке́ли явэ́ла лачхипэ́н. Нэ ёв явэ́ла тэ дживэ́л пэ шуко штэ́то пэ хачкирды мал (степ), лонды пхув, кай нанэ мануша́. 7Тэ явэ́л бахтало́ ману́ш, саво́ допатяла зоралэ́с дрэ Растэ-Дэвлэ́стэ и конэ́скиро патяибэ́н исын дрэ Растэ-Дэвлэ́стэ. 8Пал-дова́ со ёв явэ́ла сыр дрэ́во, со исын почхудо пашы́л паня́, и саво́ роздзиндзькирдя пэ́скирэ ко́рни (рукха́) пашэ́ рэ́кица (лэнори́). И ёв на явэ́ла тэ дарэл, ке́ли явэ́ла хачкирибэ́н, нэ лэ́скири патри́н (листо) явэ́ла зэлэно, и лэ́скэ на явэ́ла трэй тэ дарэл дро шуко бэрш, адя́кэ-паць ёв на пириячэ́ла тэ дэл пхаба́. 9Ило́ исын хоханэдыр сарэ́стыр и древа́н бибахтало́, кон сашты́ тэ джинэ́л лэс? 10Мэ, Рай Дэвэ́л, розґалёвава кажно ило́, Мэ пропатякирава андра́л манушэ́с, соб (кай) тэ дав кажнонэ́скэ (сваконэскэ) пир лэ́скирэ дрома́, пир дова́, со ёв кэрдя́. 11Сыр куропатка, сави́ бэшэ́ла пэ парнорэ, со ёй на чхудя́, адя́кэ-паць исын ману́ш, кон дорэсэ́ла барвалыпэ́н на пир чачипэ́н: дро са́мо машкира́л лэ́скирэ дывэса́ барвалыпэ́н мэкэ́ла лэс и дро ко́нцо (дро яго́ро) ёв явэ́ла дылыно́. 12Амаро́ Свэ́нто штэ́то исын славу́тно троно, саво́ чхудо англыпна́стыр пэ вучэ́ штэ́ты. 13Раё Дэ́вла! Ту́тыр ужакирэ́ла лачхипэ́н Израилё! Сарэ́, кон мэкнэ́ Ту́тыр, явэ́на ладжакирдэ́. Сарэ́, кон дуринэ (отгинэ́) Ту́тыр, явэ́на чхиндлэ́ пэ пхув. Пал-дова́ со ёнэ ячкирдэ́ Рас-Дэвлэ́с, Саво́ исын джидэ́-пане́скири ґаны́нг.
Еремеёскири Па́тери (Моли́тва)
14Састякир ман, Раё Дэ́вла, и мэ ява́ва састякирдо; зра́кх ман, и мэ ява́ва зракхно, пал-дова́ со пал Ту́тэ исын миро шарибэ́н. 15Акэ, ёнэ пхэнэ́на ма́нгэ: ‘Кай исын Ра́скирэ-Дэвлэ́скиро лав! Мэк Ёв тэ явэ́л!’ 16Нэ мэ на со́мас сыго тэ явав чхупнариса (пастырёса), соб (кай) тэ джав пал Ту́тэ. Адя́кэ-паць мэ на камдём, соб (кай) тэ явэ́л хасибны́тко дывэ́с: Ту джинэ́са дава́, со выгия́ мирэ́ уштэндыр, саро́ сыс анги́л Ту́тэ. 17На трашакир ман: пал Ту́тэ мэ гарадёвава дро бибахтало́ дывэ́с. 18Мэк тэ явэ́н ладжакирдэ́ кодолэ́, савэ́ традэ́на ман, мэк ёнэ тэ замэрэн дара́тыр, нэ на домэк, соб (кай) мэ тэ явав ладжакирдо́. Нэ на домэк, соб (кай) ма́нгэ тэ замэрав дара́тыр. Ян пэ лэ́ндэ бибахтало́ дывэ́с. Пхагир лэн кэ хасибэ́н дуй мо́лы.”
Тэ Явэл Свэ́нто Саватытко (Суботнё) Дывэ́с
19Адя́кэ пхэндя́ ма́нгэ Рай Дэвэ́л: “Джа́ и тэрдёв дрэ по́рта, кай исын манушэ́нгирэ чхавэ́, пирда́л сави́ Юдэ́нгирэ кра́лья джа́на андрэ́ и пирда́л сави́ ёнэ выджа́на, и яв дрэ сарэ́ Ерусалимо́скирэ по́рты, 20и пхэн лэ́нгэ: ‘Шунэ́н Ра́скирэ-Дэвлэ́скиро лав, тумэ́, Юдэя́кирэ кра́лья и сари́ Юдэ́я, сарэ́ джиибнарья Ерусалимо́стыр, савэ́ джа́на андрэ́ пирда́л кадая́ по́рта. 21Адя́кэ ракирэ́ла Рай Дэвэ́л: “Ракхэ́н пэ́скиро ди и тэ на лыджа́н кэ пэ ничи́ дро саватытко (суботнё) дывэ́с пирда́л Ерусалимо́скири по́рта; 22И тэ на вылыджан нисаво́ пхарипэ́н дро саватытко дывэ́с, и тэ на кэрэ́н нисави́ буты́, нэ свэнцякирэн саватытко дывэ́с, сыр Рай Дэвэ́л припхэндя́ тумарэ́ дадэ́нгэ.” 23Нэ ёнэ на кандынэ́, и ёнэ на причхудэ пэ́скиро кан, а ёнэ штывакирдэ пэ́скирэ мэня, соб (кай) ёнэ на могиндлэ́ тэ шунэ́н ци тэ прилэ́н сыклякирибэ́н. 24И явэ́ла адя́кэ, ко́ли тумэ́ миштэ́с явэ́на тэ пришунэнпэ – ракира́ва Мэ, Рай Дэвэ́л, – и тумэ́ на явэ́на тэ лыджа́н пхарипэ́н андрэ́ пирда́л дая́ форо́скири по́рта дро саватытко дывэ́с, нэ соб (кай) тумэ́ тэ свэнцякирэн, саватытко дывэ́с, и тэ на кэрэ́н ни сави́ буты́ дро дава́ дывэ́с, 25то тэды тумэ́ явэ́на тэ заджа́н пирда́л дая́ форо́скири по́рта кра́лья и тхага́рья, савэ́ исын бэштэ́ пэ Давидо́скиро троно, ёнэ явэ́на тэ традэ́н пэ марибны́тка вурдэна́ (колесницы) и уклистэ́ ёнэ и лэ́нгирэ тхага́рья, пашы́л савэ́ндэ мануша́ Юдэя́тыр и джиибнарья Ерусалимо́стыр, и мануша́ усады (сак) явэ́на тэ дживэ́н дро дава́ фо́ро. 26И ёнэ явэ́на Юдэя́кирэ форье́ндыр и пашылатунэ пхувья́тыр пашы́л Ерусалимо и Вениамоноскирэ пхувья́тыр (югостыр), и фэлдэндыр и пхувья́тыр, кай исын бэ́ргицы, и паш-дывэсытконэ́ пхувья́тыр ёнэ явэ́на тэ янэ́н хачкирибнаскиро дыибэ́н, ратвало дыибэ́н, и свэ́нто дыибэ́н гивэстыр, и дрогонэ́-смолэнгиро тхув, и парикирибнытко свэ́нто дыибэ́н дро Ра́скирэ-Дэвлэ́скиро Кхэр. 27Нэ ко́ли тумэ́ на явэ́на тэ пришунэнпэ кэ Мэ тэ свэнцякирэн [тэ свэнкинэн-р.с.] саватытко дывэ́с, и тэ на лыджа́н пхарипэ́н, сыр тумэ́ заджа́на пирда́л Ерусалимо́скири по́рта дро саватытко дывэ́с, тэды Мэ росхачкирава яг дрэ доя́ по́рта, и яг похала сарэ́са Ерусалимо́скирэ барэ́ фэлатиня́, и дая́ яг на мурдякирэна.’”
Currently Selected:
Ереме́ё 17: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
