Сэндарьенгири Лылвари́ 10
10
Пал Фоластэ
1Коригэды́р (позжэ) Авимелехостэ ґаздыя́пэ ваш Израилёс-киро зракхибэ́н о Фола (Тола), Фуискиро чхаво́, Додовоскиро-чхавэ́скиро, Исахароскирэ родыцо́стыр. Ёв дживдя́ кэ Шамиро пэ Ефремо́скири бэ́рга. 2Ёв сыс Израилёскирэ сэндариса биш тэ трин бэрш, и мыя́, и гарадо́ сыс дрэ Шамиро. 3Коригэды́р (позжэ) лэ́стэ ґаздыя́пэ Иаиро Галаадостыр и сыс Израилёскирэ сэндариса биш тэ дуй бэрш. 4Лэ́стэ сыс трия́нда (триндэша) чхавэ́, савэ́ традэнас пэ триндэшэ тэрнэн ослэндэ, и триндэша фо́рья сыс лэ́ндэ; лэн кэ дава́ дывэ́с кхарэ́на Иаироскирэ гавэнца, со исын пэ Галаадоскири пхув. 5И мыя́ Иаиро, и гарадо́ сыс дро Камоно.
Израилё исын Нэвэ́с Притасадо
6Израилёскирэ чхавэ́ дурэды́р кэрдэ́ фуипэ́н анги́л Ра́скирэ-Дэвлэ́скирэ якха́ и дынариндлэ́ Ваалэнгэ и Астартэнгэ, и Арамейсконэ дэвлорэ́нгэ, и Сидонсконэ дэвлорэ́нгэ, и Моавитсконэ дэвлорэ́нгэ, и Амонитсконэ дэвлорэ́нгэ, и Филистимсконэ дэвлорэ́нгэ; и ячкирдэ́ Рас-Дэвлэ́с и на дынариндлэ́ Лэ́скэ. 7И захачи́я Ра́скирэ-Дэвлэ́скири холы́ пэ Израилё, и Ёв отдыя́ лэн дрэ Филистимлянэнгирэ васта́ и Амонитянэнгирэ васта́. 8Ёнэ тасадэ и мэнчындлэ Израилёскирэ чхавэ́н долэ́ бэршэстыр дэшуохто (бидуе́нгиро биш) бэрш, сарэ́н Израилёскирэ чхавэ́н пир доя́ Иорданоскири риг пэ Амореенгири пхув, сави́ сыс дрэ Галаа́до. 9Пэ ко́нцо (яго́ро) Амонитяни пиригинэ́ Иорда́но, соб (кай) тэ лыджа́н марибэ́н Юдаса и Вениаминоса и Ефремо́скирэ кхэрэса, и древа́н (збит) тясно сыс Израилёскирэ чхавэ́нгэ. 10И задынэ го́дла Израилёскирэ чхавэ́ кэ Рай Дэвэ́л, и ракирдэ́: “Кэрдя́м амэ грэ́хо анги́л Ту́тэ, пал-дова́ со ячкирдям амарэс Дэвлэ́с и дынариндям Ваалэнгэ.” 11И пхэндя́ Рай Дэвэ́л Израилёскирэ чхавэ́нгэ: ци на притасавэнас тумэн Египтя́ни, и Амореи, и Амонитяни, и Филистимля́ни, 12И Сидоняни, и Амаликитяни, и Моавитяни, и, ке́ли тумэ́ годлынэ кэ Мэ, ци на зракхцём Мэ тумэн лэ́нгирэ вастэ́ндыр? 13А тумэ́ ячкирдэ́ Ман и лынэ́ тэ дынаринэ́н явирэ дэвлорэ́нгэ; пал-дова́ Мэ на ява́ва буты́р тэ зракхав тумэн; 14джа́н, годлэн кэ дэвлорэ́, савэ́н тумэ́ выкэдынэ́, мэк ёнэ тэ зракхэн тумэн дро пхаро́ ваш тумэ́нгэ часо. 15И пхэндлэ́ Израилёскирэ чхавэ́ Ра́скэ-Дэвлэ́скэ: “Кэрдя́м грэ́хо амэ; кэр амэ́нца саро́, со Ту́кэ исын пир годы́, екх зра́кх амэн акана́.” 16И отчхурдынэ пэ́стыр явирэ дэвлорэ́, и лынэ́ тэ дынаринэ́н Ра́скэ-Дэвлэ́скэ. И на вырикирдя Лэ́скиро ди Израилёскирэ мэ́ньки. 17Амонитяни скэдынэ́пэ и тэрдинэ́ стано́са дро Галаа́до; скэдынэ́пэ адя́кэ-паць Израилёскирэ чхавэ́ и тэрдинэ́ стано́са дрэ Маси́фа. 18Мануша́ и тхага́рья Галаадо́скирэ пхэндлэ́ екх екхэ́скэ: “Кон зачнинэла марибэ́н проти Амонитянэндэ, одова́ явэ́ла барыдырэ́са пэ сарэ́ Галаадсконэ манушэ́ндэ.”
Currently Selected:
Сэндарьенгири Лылвари́ 10: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
