Исаёс 17
17
Пхэныбэ́н пэ Сирия и Израилё
1Пхэныбэ́н пэ Дама́ско. – “Акэ, Дама́ско пириячэ́ла тэ явэ́л фороса, и ёв явэ́ла груда руинэндыр. 2Ароэроскирэ фо́рья мэкэ́на мануша́, ёнэ явэ́на штэтоса ваш ґурты бакрэ́нгирэ, со явэ́на тэ пасён одо́й, и ние́кх на явэ́ла тэ трашавэл лэн. 3Твардыма Ефремо́скири и Дамаскоскирэ-кралипнаскири и кхэтанэ́ Сириякирэ ячаибнаса, явэ́ла дасави́-паць сыр и сла́ва Израилёскирэ чхавэ́ндыр”, – ракирэ́ла Рай Дэвэ́л, болыбна́скирэ-янголэ́нгиро. 4“И явэ́ла адя́кэ дро дова́ дывэ́с, со тыкнёла сла́ва Яковоскири, и тхулыпэн лэ́скирэ масэ́ндыр явэ́ла шукэдыр. 5И явэ́ла адя́кэ-паць, сы́рбы гива́-чхиныбнаскиро ману́ш, саво́ скэдэ́ла зя́рки и чхинэла колосы гивэнгирэ пэ́скирэ вастэ́са и сы́рбы яви́р ману́ш, саво́ скэдэ́ла колосы пэ долоскири пхув Ефраимоскири. 6И ячэ́напэ лэ́стэ сы́рбы дуй ци трин оливитка му́ри пэ са́мо упратуны рандь, ци штар ци пандж пэ са́мо пхабитко рандь пало́ дова́, сыр вымарэна (укэдэна) умалото оливитконэ каштэ́стыр”, – ракирэ́ла Рай Дэвэ́л, Дэвэ́л Израилёскиро. 7Дро дова́ дывэ́с о ману́ш явэ́ла тэ дыкхэ́л пэ Создыибнаскирэстэ, и лэ́скирэ якха́ явэ́на тэ сыкавэ́н паты́в Свэнтонэ́ Израилёскирэскэ, 8Ёв на явэ́ла тэ дыкхэ́л пэ алта́ри, со исын буты́ лэ́скирэ вастэнгири, ёв на явэ́ла тэ дэл паты́в, со кэрдэ́ лэ́скирэ ангушта (пальцы), ци пэ каштунэ и́долы Астартакирэ ци кхамитка (Ваалоскирэ). 9Дро дова́ дывэ́с зоралякирдэ фо́рья явэ́на сыр мэкно́ штэ́то дро вэш и пэ бэргакирэ вучипэна́, со явэ́на мэкнэ́ анги́л чхавэ́ндэ Израилёскирэндэ: и явэ́на руи́ны (чхучо́ штэ́то). 10Пал-дова́ со ту, Израилё, бистырдян Дэвлэ́с, тырэ́с Зракхибнаскирэс, и ту на рикирдян дрэ годы́, ска́ла тырэ́ – форо́скирэ рипирибнастыр; палдава́ ту почхудян камибнытка унты (сады) и вычхудян на тумарэ́ пхувья́кирэ-раслинакирэ рандёрья. 11Дро дова́ дывэ́с ту кэрэ́са саро́ адя́кэ, соб (кай) тыри́ раслина тэ барьёл, и, соб (кай) тася́рлэс (ра́нэс) пэ зло́ко (ра́нко), тыри́ зя́рка тэ лулудёл (тэ цветинэл); нэ дро счхиныбнаскиро (скэдыибнаскиро) дывэ́с явэ́ла ту́га смэнтнымаса пэ руинэнгири груда. 12Бида и шумо бутэ́-манушэ́нгиро, ёнэ шуминэна сыр мо́рё (дэрья́в) брилинэла (ревинэла), пэ сы́гно шумо манушытконэ́-нацые́нгиро, савэ́ нашэ́на шумоса сыр шумо бутэ́-паненгиро! 13Манушы́тка на́цыи брилинэна (ревинэна) сыр шумо бутэ́-паненгиро, нэ Дэвэ́л дарьякирдя, и ёнэ явэ́на тэ нашэ́н дур, и лэн явэ́на тэ традэ́н сыр пра́хо пэ бэ́рги балваляса, сыр прахинка (пыло), со крэнцынэлапэ рискирибна́скирэ балваляса. 14Тэ́ньци, акэ, бэльвэле́ бари дар! И анги́л зло́ко (ра́нко), лэс буты́р нанэ. Кадасави исын до́ля одолэнгири, кон обчорэла амэн, и жребие (тала́но) кодолэнгиро, савэ́ откэдэна зорья́са амаро́ миштыпэ́н.
Currently Selected:
Исаёс 17: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
