Яви́р Зако́но 17
17
1На ян дрэ свэ́нто дыибэ́н Ра́скэ-Дэвлэ́скэ, Дэвлэ́скэ тырэ́скэ, гурувэ́с, ци бакрэ́с, пэ савэ́ндэ явэ́ла дош, ци вари-саво́ фуипэ́н, пал-дова́ со дава́ исын магирипэ́н ваш Ра́скэ-Дэвлэ́скэ, Дэвлэ́скэ тырэстэ. 2Ко́ли латхэлапэ вари-кон машки́р ту́тэ дрэ вари-саво́ тырэ́ кхэрэндыр, савэ́ Рай Дэвэ́л, Дэвэ́л тыро́, дэ́ла ту́кэ, мурш ци джувлы́, кон кэрэ́ла чорипэ́н анги́л Ра́скирэ-Дэвлэ́скирэ, тырэ́ Дэвлэ́скирэ якха́, и пхагирэ́ла Лэ́скиро завето, 3и джа́ла, и лэ́ла тэ дынаринэ́л явирэ дэвлорэ́нгэ, и лэ́ла тэ мангэ́лпэ лэ́нгэ, ци кхамэскэ, ци чхонэскэ, ци сарэ́-болыбна́скирэ чэргэнякэ, со мэ припхэндём тэ на кэрэ́с, 4и ту́кэ пхэндло́ явэ́ла, и ту шунэса, то тэды ту шука́р розродэ, и, ко́ли дава́ исын чачипэ́н, ко́ли кэрдо́ дава́ магирипэ́н дро Израилё, 5то вылыджа одолэ́с муршэ́с, ци одолья джувля́, савэ́ кэрдэ́ дава́ фуипэ́н, кэ тырэ́ вудара́ (по́рты) и мар лэн барэ́нца кэ мэрибэ́н. 6Пир дуе-якхитконэнгирэ (свидетеленгиро) лава́, ци тринэ́-якхитконэнгирэ, банго́ исын тэ мэрэ́л ману́ш, саво́ исын сэндиндло пэ мэрибэ́н. Нэ нашты́ тэ отдэс лэс мэрибна́скэ пир лава́ екхэ якхитконэскирэ (свидетелёскиро). 7О якхитконэнгиро васт исын банго́ пэ́рво тэ явэ́л пэ лэ́стэ тэ чхурдэл бар англэды́р сарэ́ндыр, соб (кай) тэ домарэн лэс, пал лэ́ндэ васт сарэ́-манушэ́нгиро; и адя́кэ традэ криг фуипэ́н машки́р пэ́стэ. 8Ко́ли пир саво́ рэ́ндо (де́ло) ваш ту́кэ явэ́ла пхаро́ тэ россэндякирэс машки́р рат и рат, машки́р сэ́ндо и сэ́ндо, машки́р марибэ́н и марибэ́н, и явэ́на мануша́, савэ́ на явэ́на дрэ екх годы́ дрэ тыри́ по́рта, то тэды ушты́ и джа́ пэ штэ́то, саво́ выкэдэ́ла Рай Дэвэ́л, Дэвэ́л тыро́, 9и яв кэ рашая́, Леви́ты, и кэ сэнда́ри, саво́ явэ́ла дрэ долэ́ дывэса́, и пхучпэ лэ́ндыр, и ёнэ пхэнэ́на ту́кэ, сыр тэ россэндякирэс; 10и кэр пир лав, саво́ ёнэ пхэнэ́на ту́кэ, пэ дова́ штэ́то, саво́ выкэдэ́ла Рай Дэвэ́л, и причху́в зор тэ кэрэ́с саро́, со ёнэ сыклякирэ́на тут; 11пир Зако́но, савэ́скэ сыклякирэ́на ёнэ тут, и пир сэндоскиро приракирибэн, саво́ ёнэ пхэнэ́на ту́кэ, кэр, и на отджа ни пэ чачо́ (право), ни пэ зэ́рво (ле́во) долэ́стыр, со ёнэ пхэнэ́на ту́кэ. 12А кон кэрэ́ла адя́кэ холямэ́ муршыпнаса, со на кандэ́ла раша́с, саво́ явэ́ла тэрдо́ одо́й пэ мангипэ́н анги́л Растэ-Дэвлэ́стэ, Дэвлэ́стэ тырэстэ, ци сэндаристэ, одова́ ману́ш исын банго́ тэ мэрэ́л, и адя́кэ традэ криг холы́ Израилёстыр; 13и сарэ́ мануша́ явэ́на тэ шунэ́н, и страхадёна, и на явэ́на буты́р тэ кэрэ́н холямэ́ муршыпнаса. 14Ке́ли ту явэ́са пэ пхув, сави́ Рай Дэвэ́л, Дэвэ́л тыро́, дэ́ла ту́кэ и ту явэ́са тэ хулаинэс ла́са, и ту лэ́са тэ дживэ́с пэ ла́тэ, и пхэнэ́са: “Чхува́ва мэ пэ пэ́стэ крали́с, сыр явирэ манушэ́ндэ, савэ́ исын пашы́л ма́ндэ”, 15то тэды чхув пэ пэ́стэ крали́с, савэ́с выкэдэ́ла Рай Дэвэ́л, Дэвэ́л тыро́; тырэ́ пшалэ́ндыр чхув пэ пэ́стэ крали́с; нашты́, соб (кай) тэ чхувэ́с пэ пэ́стэ крали́са манушэ́с явирэ рига́тыр, саво́ исын на пшал ту́кэ. 16Екх, соб (кай) ёв тэ на убарьякирэл (тэ на розлыджал) пэ́скэ бут грэн, и тэ на рискирэ́л манушэ́н дро Еги́пто ваш дова́, соб (кай) тэ убарьякирэл пэ́скэ буты́р грэн, пал-дова́ со Рай Дэвэ́л пхэндя́ тумэ́нгэ: “На рисён буты́р далэ́ дромэ́са”; 17и соб (кай) ёв тэ на скэдэл пэ́скэ бут ромнен, соб (кай) тэ на розмэкэлпэ лэ́скиро ило́, и, соб (кай) руп и сувнака́й ёв тэ на скэдэл древа́н бут пэ́скэ. 18Нэ ке́ли ёв бэшэ́ла пэ пэ́скирэ-кралипнаскиро престоло, исын банго́ тэ счхувэл ваш пэ́скэ списко далэ́ Законо́скирэ лылварьятыр, сави́ исын Левитэ́нгирэ рашандэ, 19и мэк дава́ списко тэ явэ́л лэ́стэ, и мэк ёв тэ гинэл лэс дрэ сарэ́ пэ́скирэ джиибна́скирэ дывэса́, соб (кай) тэ высыклёл тэ дарэл Ра́стыр-Дэвлэ́стыр, пэ́скирэ Дэвлэ́стыр, и тэ причхувэл зор тэ сполнинэл сарэ́ далэ́ Законо́скирэ лава́ и далэ́ упхэныбэна́; 20соб (кай) тэ на пхутёл лэ́скиро ило́ анги́л лэ́скирэ пшалэ́ндэ, и соб (кай) ёв тэ на отджал Законо́стыр ни пэ чачо́ (право), ни пэ зэ́рво (ле́во), соб (кай) ёв тэ явэ́л длуга дывэса́ ёв пэ пэ́скиро кралипэ́н и тэ явэ́н чхавэ́ лэ́скирэ машки́р Израилё.
Currently Selected:
Яви́р Зако́но 17: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
