1 Кралип 21
21
1И явдя́ Дави́до дрэ Номва кэ раша́й Ахимелехо, и заладжандыя Ахимелехо гил Давидо́стэ, и пхэндя́ лэ́скэ: “Со́скэ ту сан екхджино́, и никонэ́с нанэ ту́са?” 2И пхэндя́ Дави́до раша́скэ Ахимелехоскэ: “Кра́ли дыя́ ма́нгэ рэ́ндо и пхэндя́ ма́нгэ, мэк нико́н тэ на джинэ́л, пал со мэ бичхадём тут и со дыём ту́кэ”, пал-дова́ со манушэ́н мэ ячкирдём пэ джиндло́ штэ́то; 3и адя́кэ, со исын ту́тэ тэл васт, дэ ма́нгэ, марэ́ пандж, ци со латхэлапэ.” 4И отпхэндя́ раша́й Давидо́скэ, ракири́: “Нанэ ма́ндэ тэл васт просто маро́, а исын свэ́нто маро́, ко́ли фэ́ни (то́ка) тырэ́ мануша́ урикирдэпэ джувлендыр!” 5И отпхэндя́ Дави́до раша́скэ, и пхэндя́ лэ́скэ: “Джувле́н пашы́л амэ́ндэ на сыс ни тася́, ни три́то дывэ́с, долэ́ часостыр, сыр мэ выгиём, и сасу́ды тэрнэ́-манушэ́нгирэ исын жужэ́, а ко́ли дром исын нажужо, тэды маро́ ячэ́лапэ жужэса дрэ сасу́ды. 6И дыя́ лэ́скэ раша́й свэ́нто маро́; пал-дова́ со на сыс лэ́стэ маро́, апри́ч марэ́, савэ́ сыс тэ хан сыр свэ́нто, савэ́ лынэ́ сыс Ра́скирэ-Дэвлэ́скирэ мо́стыр, соб (кай) пир лэ́нгиро лыибэн криг тэ чхувэ́с тато маро́. 7Одо́й сыс екх ману́ш дро дова́ дывэ́с анги́л Растэ-Дэвлэ́стэ екх Сауло́скирэ дынарье́ндыр (слугэ́ндыр), пир лав Доико, Идумеянино, Сауло́скирэ ракхибнарискиро барыдыр. 8И пхэндя́ Дави́до Ахимелехоскэ: “Ци нанэ ада́й ту́тэ тэл васт чхурдыпнытко буст ци курта́ла? Пал-дова́ со мэ на лыём пэ́са ни курта́ла, ни яви́р марды́тко, адя́кэ сыр крали́скиро припхэныбэ́н сыс сы́гно.” 9И пхэндя́ раша́й: “Ѓа́да, исын курта́ла Филистимляниноскирэ-Голиафоскири, савэ́с ту замардян пэ дэмбитко до́ло, закрэнцындлы дрэ и́дя, пала́л эфо́до; ко́ли камэ́са, лэ ла; яви́р апри́ч далятыр нанэ ада́й.” И пхэндя́ Дави́до: “Нанэ фэды́р ла́тыр, дэ ма́нгэ ла.” 10И уштыя́ Дави́до, и настя́ дро дова́-паць дывэ́с Саулостыр, и явдя́ кэ Анхусо, Гефоскиро кра́ли. 11И пхэндлэ́ Анхусоскэ лэ́скирэ дына́рья: “Ци на адава́ исын Дави́до, саво́ исын кра́ли долэ́ ригакиро? Ци на лэ́скэ багандлэ дрэ хороводы и ракирдэ́ ‘Са́уло домардя́ тысёнцы, а Дави́до дэш тысёнцы?’” 12Дави́до чхудя́ далэ́ лава́ дро пэ́скиро ило́, и древа́н дардяпэ Анхусостыр, Гефоскирэ крали́стыр. 13И парудя пэ́скиро муй анги́л лэ́ндэ, и причхурдыяпэ дылынэса дро лэ́нгирэ якха́, и чхиндя́ пэ вудара́, и мэкця́ слина (саля) пир пэ́скири чхора (брода). 14И пхэндя́ Анхусо пэ́скирэ писхарье́нгэ: “Дыкхэ́на, ёв ману́ш исын дылыно́; ваш со тумэ́ яндлэ́ лэс кэ мэ? 15Нау́што куты́ ма́ндэ дылынэ́, со тумэ́ яндлэ́ лэс, соб (кай) ёв тэ дылнёл анги́л ма́ндэ? Нау́што ёв заджа́ла дро миро кхэр?”
Currently Selected:
1 Кралип 21: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
